محتويات المقال
أنا فاهم طبعًا إنك أكيد مش محتاج دليل يعرّفك ازاي تفسح أولادك وتبسطهم، لكن لو جيت للحق، الوقت الحلو اللي الولاد بيقضوه مش لازم يبقى حلو بالنسبة لنا احنا كرجالة. معظم الرجالة بتاخد وقت فسح الأطفال كمهمة ثقيلة على نفسهم أو شر لابد منه. ومش بيرتاحوا غير على الكافيه مع أصحابهم. ومن هنا، بتيجي أهمية إني أقول لك على شوية نصائح تخليك تقضي وقت ممتع مع أطفالك، لك ولهم.
نصائح قضاء الوقت مع الأطفال
- تناول الطعام مع الأطفال
- سيلفي كل يوم
- شارك هواياتك معاهم
- قضي معاهم وقت في السرير
تناول الطعام مع أولادك
الدكتورة جيسيكا ألفاردو، الأستاذة المساعدة في الجامعة الوطنية في أمريكا، كتبت مقال جمعت فيه مجموعة من النصائح المهمة بخصوص قضاء الوقت مع الأولاد. لفت انتباهي في مقال جيسيكا النقطة اللي بتتكلم فيها عن أهمية وضرورة تناول الطعام مع الأولاد. الوقت ده يعتبر الوقت الذهبي علشان تقدر تفتح معاهم موضوعات وتتطمن فيه على أحوالهم.
لكن حاول قدر الإمكان في الوقت ده ما تتنتقدش سلوكهم أو تعنفهم، خليك لين معاهم واتعرف أكتر على أنشطتهم اليومية. ساعتها بس انت كمان هتحس بالانبساط، وأنك أب كويس عارف أخبار ولاده وبيبني معاهم علاقة إيجابية.
سيلفي كل يوم
من الحاجات الجميلة اللي ممكن تغير علاقتك بأولادك. هي لعبة تلعبوها مع بعض. اسمها “سيلفي كل يوم”. يعني ما ينفعش يوم يعدي من غير ما نتصور مع بعض. وطبعًا علشان الصورة تطلع حلوة، مش لازم نضحك وبس، لازم كمان نتحرك ونزور أماكن جميلة وجديدة. ومن هنا، نلاقي إن نشاط “سيلفي كل يوم” روتين يومي بيغيّر الطريقة اللي بتلعب بيها مع أولادك بحيث تخليك تستمتع في نفس الوقت. وده جزء من حوالي ٢٠ نصيحة من موقع lemonlimeadventures.com اللي اتكلم عن طرق مختلفة وجديدة لقضاء وقت ممتع مع الأبناء.
شارك هواياتك معاهم
مفيش أحب على قلب الراجل من ممارسة هواياته المفضلة. سواءً متابعة برامج معينة في التليفزيون، أو التأمل في الطبيعة، أو حتى إنه يطلع رحلة للبحر.
كل المطلوب منك هنا هو إنك تدخّل أولادك لعالم هواياتك. ومع الوقت، هتلاقي إنك بتعمل هواياتك بضمير مستريح أكتر، لإنك حاسس إنك بتضرب أكتر من عصفور بحجر واحد. وده كمان هيخلي أولادك يقربوا منك ويفهموك بشكل أفضل وعلاقتكم تتحسن.
قضي معاهم وقت في السرير
أما النقطة اللي أشارت لها كل المراجع الأجنبية اللي قريتها وانا باحضّر للموضوع، فهي ضرورة قضاء وقت مع ولادك في السرير. لا تتخيل الموضوع ده مفيد ازاي لك ولهم. مفيد للأبناء علشان بيخليهم أكثر استعدادًا للنوم. ومفيد للأب لإنه بيخليه حاسس إن له تأثير إيجابي ومهم في حياة ولاده من أول صحيانهم لحد نومهم.
وحسب توصيات موقع flintobox.com المنشورة في مقال على صفحات الموقع، فالتوصيات للآباء بتخصيص وقت معين قبل النوم بحيث يكون “وقت الاستعداد للنوم”، ولازم نبعد فيه عن استخدام الهواتف أو الأجهزة اللي لها شاشات ممكن تكون مضرة على العين. ويستحسن نمارس فيه ألعاب بسيطة، ولازم الآباء يهتموا إن أولادهم ختموا يومهم بابتسامة واسعة وضحكة من القلب.
أولادنا هدية من ربنا لنا، لو ما اهتميناش بيهم وقضينا معاهم وقت جميل، هنبقى بنقصّر في حقهم وحق نفسنا بالمقام الأول. يا ريت تحكوا لنا بتعملوا إيه علشان تستمتعوا بالوقت مع أولادكم.
لو عايز تعرف صفاتك كأب من برجك، ادخل هنا.
التعليق باستخدام حساب فيس بوك