محتويات المقال
الموهبة هي أحلى نعمة أنعم بيها ربنا على البشر. هدية ربانية الإنسان مالوش دخل بيها. لكن من ناحية تانية، لازم يدعمها وينميها. ومن هنا بتيجي أهمية دعم الأهل لموهبة الأبناء. واللي بتختلط عند كتير من الآباء، وتتحول مع الوقت لضغط مش لدعم. في مقالنا، هنشوف مجموعة نصائح مهمة لكيفية التعامل الصحيح مع الطفل الموهوب. بحيث ندعمه ونشجعه بدون ما نكون وسيلة ضغط عليه.
ساعدوا أولادكم لاكتشاف مواهبهم
في فترة نمو الأطفال، بتبدأ مجموعة من المهارات المختلفة تظهر عليهم. ومعظم الأطفال بيظهروا ميل لأكثر من هواية وموهبة. هنا بيكون على الأهل أنهم يقعدوا مع أولادهم ويشوفوا بجد هم موهوبين في إيه ومش موهوبين في إيه.
من الضروري هنا أن الأهل تفهم أن الأطفال مختلفين عن بعض، ومختلفين عن الأهل نفسهم، ومش معنى إن الأب أو الأم مهتمين بمجال معين أو موهوبين في حاجه معينة أن الأولاد لازم يكونوا موهوبين في نفس المجال.
تجنب المقارنات
فيه دراسة عملتها أكاديمية أكسفورد الملكية نصحت فيها الآباء بضرورة عدم مقارنة أولادهم بأقرانهم اللي بيمارسوا معاهم نفس الهواية. ودي غلطة شائعة باشوفها في الأهل اللي أولادهم بيمارسوا لعبة تنافسية زي التنس مثلًا أو الشطرنج أو كرة القدم. وهي إنهم طول الوقت يقارنوا أداء أولادهم بالآخرين. وده بيحط عبء خفي على أولادهم، وبتخليهم يكرهوا المجال اللي حققوا تفوق فيه.
ابدأوا بدري
من المهم جدًا إننا كأهل ننتبه لموهبة أولادنا بدري. فحسب دراسة نشرها موقع theconversation.com، كل حوالي ٢٤ شخص موهوب، ٢٢ منهم بيتم اكتشافهم في سن من ٢ الى ٥ سنوات. للأسف ده نفس السن اللي كتير من الأهل بيتعاملوا فيه مع أولادهم بعدم اهتمام ومراقبة حقيقية علشان يكتشفوا فيه بداية ظهور الموهبة عليهم.
وبما أننا بنتكلم على البدء من الصغر، لازم كمان نتكلم عن ضرورة البدء بجدية. يعني لازم يحاول الأهل يخصصوا جزء من الموارد المادية لدعم الموهبة. ولازم كمان نستشير المتخصصين في مجال موهبة الأبناء ودي نقطة هنتكلم عنها بالتفصيل في الفقرة القادمة.
استشيروا المتخصصين
المثل القديم بيقول “إدي العيش لخبازه” علشان كده من المهم إننا نفرق بين ما إذا كان الطفل فعلًا موهوب أم إن اللي عنده مجرد رغبة في إثارة إعجاب الأهل أو التباهي بأنه مهتم بمجال معين. موقع greatschools.org بيعطي نصيحة للأهل بضرورة استشارة المتخصصين في مجال موهبة الابن قبل ما نقرر هل اللي عند الطفل موهبة حقيقية أم مجرد اهتمام؟
وحتى بعد التأكد من موهبة الابن، لازم نتابع مع المتخصصين في المجال ده. يعني مثلًا، لو ابنك موهوب في لعبة الشطرنج، ضروري ترجع فورًا للمتخصصين في تدريب الشطرنج علشان تناقش معاهم الطريقة الأفضل لإدارة الموهبة دي.
أولادنا نعمة من ربنا لنا، وموهبتهم تعتبر نعمة إضافية. أرجوكم ركزوا على مواهب أولادكم وساعدوهم يطوروها. واستثمروا فيهم، أحسن ما تستثمروا لهم!
المصادر
8 Ways to Support Your Gifted Child
5 ways to develop children’s talents
Is your child gifted?
التعليق باستخدام حساب فيس بوك