على أد ما أغنية “فاضي شوية” لحمزة نمرة معانيها رقيقة، ولما بنسمعها بنحس بحنين حقيقي لناس حبيناهم في يوم من الأيام، وبعدنا عنهم لأي سبب، على أد ما حسيت أني كبرت، مش بس سن، وكمان مشاعري نضجت جدًا، ومبقاش فنجان قهوة ممكن يحل لي زعل أو مشكلة في أي علاقة إنسانية.
وكلنا ملاحظين على السوشال ميديا كلام عن أهمية “الفرد” ومشاعره، وعدم التسامح مع الأخطاء، واعتزال الأذى، صحيح الكلام ده مرات بيتقال بصيغة متطرفة شوية، ومرات بيتقال بحزن ومرات بضحك، لكن في ناس كتير بتعارض الكلام ده بكل الصيغ بتاعته، لأن برأيهم إن الأفكار دي بتهدم قيم الترابط الأسري والعائلي والمجتمعي، وبيحسوا إن ده إلغاء لقيمة التسامح والتغافل.
وكأن المشهد هيكون إن واحدة صاحبتي إتأخرت في السؤال عني، فأنا هقولها خلاص ملكيش مكان في حياتي لازم نقطع علاقتنا، طبعًا دي سذاجة واللي يطبق كلام “الحفاظ على المشاعر” بالسطحية دي ومع أي أخطاء بشرية بسيطة في الحياة وطبيعية، يبقى هو اللي عنده مشكلة.
مين أهم، الفرد ولا المجتمع؟
طبعًا أنا ضد الأنانية، يعني ضد إن تكون مصلحتي في أي علاقة أنا طرف فيها هي الأولوية، بصرف النظر عن مصالح الآخرين، لأن بالطريقة دي مش هتكون علاقة سوية، دي استنزاف للآخرين.
لكن أنا مع الكلام اللي مع إعلاء قيمة الفرد، وخصوصًا لما يكون الفرد ده أم، لأن مطلوب منها عطاء متواصل وهي في كل حالاتها، لإن الأم معندهاش رفاهية إنها تستمر في علاقات مؤذية لنفسيتها، مهما كانت العلاقة دي مهمة، للأسف لأنها لو استمرت مشاعرها وطاقتها النفسية هتستنزف أول بأول، وفجأة تلاقي نفسها منهارة مع أولادها ومش قادرة تكمل “واجباتها” معاهم.
فمثلا: لو ليا صديقة كل كلامها معايا شكاوى من حياتها، ولو كلمتها الصبح تبدأ لي يومي بطاقة سلبية تقفل لي النهار كله، مينفعش أكمل معاها على نفس النسق ده، وأقول من حقوق الصداقة إني أسمعها، وخصوصًا لما يكون ده إسلوب حياتها مش بتعمل كده علشان بتمر بظرف ما وهترجع طبيعية تاني.
10 طرق لدعم صديقتك المصابة بالاكتئاب
لو قريبة بتخترع مشاكل من تحت الأرض، وفجأة تلاقي وقتك راح في سماع المشكلة دي، والدفاع عن نفسك في الموقف ده، وتوضحي كلامك لشخص مشترك بينكم، وتفضلي تلفي في مجالها المغناطيسي المسموم، وتلاقي أيامك بتخلص وأعصابك بتتلف، ونفسيتك بالتأكيد بتبوظ حتى لو إنتي مش حاسه، فالبتأكيد دي مش مطلوب منك تعالجيها، كل اللي مطلوب منك إنك تعالجي نفسك بالبعد عنها وعن مجالها تمامًا.
وكل الأمثلة اللي زي دي، لو قررتي تعتزليها، أنا شايفة إن ده مش معناه أبدًا إنك مقصرة أو أنانية، مهما سمعتي تعليقات إن قلبك أسود أو انتي اتغيرتي، أو إيه اللي حصل ما كنتي متسامحة وكيوتة.
ليه مانشربش قهوة في حتة بعيدة؟
النفسية السوية المستقرة هي رأس مالنا حاليًا، لازم نحافظ عليها قدر المستطاع، وما نضيعهاش على حاجات متستاهلش، والحقيقة اللي الواحد اتعلمها واتأكد منها: إن محدش هيحافظ لك على نفسيتك قدك، إنتي أدرى حد بتفاصيلك، وإنتي اللي عارفة إيه اللي بيتعبك وإيه اللي بيطلعك سابع سما وإيه اللي بينزلك سابع أرض، فمتستنيش من حد يقوم لك بالمهمة دي أبدًا.
فاضي شوية نشرب قهوة في حتة بعيدة؟
لكن طبعًا مستعدة أشرب قهوة في حتة بعيدة أو قريبة أو حتى في مكان افتراضي، بس مع حد بحبه ومفيش بينا لا عتاب ولا لوم ولا ماضي محتاج مجهود علشان نتخطاه، ساعتها بس هتكون القهوة سكر زيادة حتى لو هي سادة.
راحة بالي هي منصة لراحة كل أم، انضمي لأكبر وأهم مجتمع دعم للأمهات في مصر هنا. وفري احتياجاتك ومصاريفك اليومية من خلال كارت خصومات راحة بالي هنا. اخسري وزن الحمل والرضاعة وكلي أكل صحي في برنامج رياضي ونظام غذائي متفصل على احتياجاتك هنا.
التعليق باستخدام حساب فيس بوك