آلام الظهر في الحمل من المشاكل اللي معظم الأمهات بتواجهها طول فترة الحمل وللأسف بتزيد في الثلث الأخير من الحمل بشكل ملحوظ وممكن ألم الظهر يسبب لها بطء وثقل في الحركة وبتشتد الآلام دي في وضعيات نوم معينة أو عند الوقوف لفترات طويلة.. في الموضوع ده هانتكلم عن ألم الظهر في الحمل وأسبابه وطرق علاجه والتخفيف منه.
أسباب آلام الظهر في الحمل
أسباب آلام الظهر في الحمل
آلام الظهر في فترة الحمل بتبقى مختلفة من أم للتانية، لكن في معظم الحالات الآلام دي بتكون آلم اسفل الظهر وتسببلها عقبات كبيرة في ممارسة حياتها اليومية بشكل طبيعي ومن ضمن أسباب ألم الظهر:
- التغييرات الهرمونية في فترة الحمل: التغييرات الهرمونية في فترة الحمل بتسبب في حصول إرخاء في المفاصل في منطقة الحوض والظهر وبالتالي إحساس باللألم في المنطقة دي.
- زيادة الوزن في فترة الحمل: كل الأمهات بتزيد في الوزن في فترة الحمل لكن بعض الأمهات بتزيد زيادة كبيرة والزيادة دي بتسبب ضغط على المفاصل والعضلات.
- زيادة حجم الجنين: زيادة حجم الجنين وبالذات في الشهور الأخيرة بتسبب ضغط على رحم الأم وبالتالي الضغط على المفاصل والأربطة في منطقة الظهر.
- المجهود: المجهود البدني زي الوقوف والمشي لمسافات طويلة وكمان قلة الراحة من ضمن العوامل اللي تسبب ضغط ووجع في منطقة الظهر.
- الأوضاع الخاطئة: الجلوس أو النوم بشكل خاطىء ممكن يسبب آلام أسفل الظهر.
علامات الخطر في الحمل اعرفيها من هنا
طرق علاج والتخفيف من آلام الظهر في فترة الحمل
آلام الظهر في الحمل
لو أول مرة تسمعي عن تمارين كيجل فهي مهمة في فترة الحمل تمارين كيجل للحوامل
آلام الظهر أمر طبيعي وللأسف ممكن تزيد في شهور الحمل الأخيرة، لكن ممكن تتبعي خطوات بسيطة تقدري تخففي بيها من الوجع ومن ضمنها:
- الأنشطة البدنية والتمارين الرياضية: بعد مراجعة دكتور النسا، ممكن تمارسي بعض التمارين الرياضية اللي بتقلل من الضغط على أسفل الظهر زي اليوجا وتمارين الحوض، وحاولي تواظبي على الأنشطة الخفيفة على مدار يومك زي المشي والحركة الخفيفة في البيت.
- الوضعيات الصحيحة: اختاري الوضعيات الصحيحة اللي متسببش ألم في أسفل الظهر،زي الوقوف والجلوس بطريقة مستقيمة، وفرد الظهر عند المشي، ووضعيات النوم المناسبة للحمل زي النوم على الجانب.
- التدفئة والتدليك: ممكن تستشيري دكتور النسا عن أفضل كريمات العضلات اللي ممكن تستخدميها للمنطقة وتدلكي برفق وتستخدمي قربة من الميه الدافية لتسكين الألم.
- البعد عن التوتر والقلق: التوتر والقلق ممكن يسبب في حصول شد عضلي في الجسم كله عشان كده حاولي تسترخي وتبعدي عن مسببات التوتر وممكن تستعيني بتمارين اليوجا أو البيلاتيس للتقليل من التوتر.
- اختيار الأحذية المناسبة في فترة الحمل: ابعدي عن لبس الكعب العالي اللي ممكن يسبب ضغط على الظهر واستبدليه بأحذية مناسبة زي الأحذية الرياضية أو الطبية.
اقري عن تورم القدمين في فترة الحمل
بنحب نفكرك إن كل حمل مختلف عن التاني وإن بالرغم من إن ألم الظهر أمر طبيعي وشائع جدًا في الحمل إلا إنه ممكن يكون مؤشر على أعراض تانية خطر لا قدر الله عشان كده بننصحك إنك تستشيري دكتور النسا الخاص بيكي لو الألم مش بيقف أو زاد مرة واحدة وبنتمنى ليكي رحلة حمل سهلة وجميلة 🙂
المصادر:
mayoclinic
webteb
dailymedicalinfo
التعليق باستخدام حساب فيس بوك