محتويات المقال
وقت دخول المدارس قرب، وفيه مدارس بالفعل دخلت، وطبعًا هييجي الوقت بتاع كل سنة لتحضير اللانش بوكس كل يوم. وعشان احنا كأمهات عاملات أوقات كتير مش بنلاقي وقت نبتكر وصفات، فأكيد هنحتاج مساعدات عشان نقدر نكمل الأسبوع، فيه بعض المنتجات الجاهزة والأدوات اللي ممكن تسهل عليكي وقت التحضير والجهد.. تعالي نعرّفك على المنتجات دي في الموضوع ده وكمان هنديكي منيو أسبوعي تستلهمي منه أفكار عشان تعملي لولادك لانشبوكس يفرحهم في المدرسة.
أجمد 10 منتجات هتسهل عليكي تحضير اللانش بوكس
- خضروات وفواكه متقطعة جاهزة
- أكلات صحية جاهزة
- قوالب الكب الكيك السيليكون
- قطاعات العجين
- مخبوزات صحية جاهزة
- العلب الصغيرة
- ميكس ألبان كيك
- عيش بلدي ميني
- حافظة الفواكه
- العصاير الفريش
اعرفي من هنا أجمد 10 لانش بوكس للمدارس بالأسعار
خضروات وفواكهة متقطعة جاهزة
View this post on Instagram
لو ما عندكيش وقت تغسلي خضروات وفواكه بسبب ظروف يومك المشغول، فيه منتجات كتير جاهزة بتعمل خضار متقطع جاهز على الأكل زي الجزر البيبي والخس والطماطم الشيري زي منتج Green House وده هيسهل عليكي كتير وقت التحضير.
منتجات صحية جاهزة
لو ولادك بيتأخروا في المدرسة وهتحتاجي تبعتي معاهم نوع من أنواع الغدا الخفيف بس ما عندكيش وقت للتحضير، هاتي منتجات جاهزة صحية زي ناجتس الفراخ بالخضروات المستخبية من V-licious والتشيكن بوبس اللي أكيد ولادك هيحبوا شكله جدًا.
قوالب الكب الكيك السيليكون
ودي من أكتر أفكار الأكل السريعة اللي ممكن تعمليها بيها، مافن البيض، مافن الخضروات، كب كيك وغيرهم كتير من الوصفات السريعة اللي ممكن تعمليها في القوالب دي واللي شكلها بيعجب كل الأطفال.
قطاعات العجين
كل الأطفال بتحب التغيير وخصوصًا للي بيتعبونا في الأكل، القطاعات بتاعت العجين ممكن تستخدميها في تقطيع الساندوتشات على شكل قلوب أو دواير كنوع من انواع التغيير وممكن تقطعيه من قبلها وتشيليه في الفريزر عشان تستخدميه على طول وقت التجهيز، وطبعًا باقي العيش اللي بيتقطع ممكن تستخدميه في عمل بقسماط مطحون عشان ما تهدريش العيش.
بالفيديو: أفكار لعمل اللانش بوكس غير الساندوتشات
مخبوزات صحية جاهزة
ممكن تجيبي مخبوزات جاهزة وصحية زي مافن الكوسة من بريدفاست أو الباوند كيك وتحطيها على طول في اللانش بوكس، من غير ما تشيلي هم الخبيز والتحضير وهتكوني ضامنة إن المنتج ده صحي ونضيف كمان.
العلب الصغيرة
لو اللانش بوكس بتاع ولادك فيه مساحة كبيرة، ممكن تستخدمي العلب الصغيرة دي عشان تحطي فيها أكلات متنوعة زي المكسرات والفواكه.. وهتلاقي ماركات كتير من العلب دي زي ماركة مينترا وبتتباع في أمازون مصر وكارفور وأماكن تانية كتير.
ميكس البان كيك
وعلى سبيل التنويع، هاتي علبة جاهزة من البان كيك ميكس واعمليها كلها وشيليها في الفريزر، وطلعيها يوم المدرسة الصبح تفك وحطيها لولادك في اللانش بوكس، وممكن تزودي جنبها مربى في علبة صغيرة وأكيد هيتبسطوا بالحلو ده.
عيش بلدي ميني
العيش البلدي هو أصح عيش عشان فوايده الغذائية العالية، والعيش الميني الصغير هيكون أسهل ليكي في التحضير عشان هتقدري تنوعي لولادك أصناف كتير من غير ما تاخد مكان في اللانش بوكس، هتلاقي العيش البلدي الميني في أماكن كتير زي سوبر ماركت محمود الفار وبريدفاست.
حافظة الفواكه
لو ولادك مش بيحبوا الفواكه متقطعة أو لو بيشتكوا إن الفواكه ممكن تتهرس من الشنطة أو بتسود زي التفاح والموز، استغني عن التقطيع وهاتي منتج من منتجات المطبخ الجديدة زي حافظة التفاح والموز اللي هتحتفظ بالفواكه أطول وقت ممكن في شنطة الولاد.
بالفيديو: وصفة لانش بوكس تونة كاساديا
العصاير الفريش
لو ولادك بيحبوا العصير ومش بتحبي تديهم العصاير اللي فيها مواد حافظة وما عندكيش وقت تعملي فريش بنفسك، اشتري عصاير صحية جاهزة من مواد طبيعية زي ماركة Glow أو العصاير الفريش اللي بتتباع في السوبر ماركت الكبرى زي سعودي وفتح الله، بس خلي بالك عشان العصير ما يقعش منهم في الشنطة ويغرق الدنيا.
التعليق باستخدام حساب فيس بوك