محتويات المقال
حاجة جميلة إننا ننزل نشتري موبايل جديد. لكن مع الموديلات الكتيرة في السوق، كتير مننا بيحس إنه تايه ومش عارف ياخد قرار صح. علشان كده جمعنا لكم في الموضوع ده أحسن 5 تليفونات ذكية أقل من 5000 جنيه بحيث لما تدوروا تبقوا عارفين الأنواع الأحسن حسب ميزانيتكم.
اعرفي أفضل انواع التابلت في مصر بالأسعار
XIAOMI Pocophone F1
السعر 4999 جنيه
لو سألتيني عن أكتر حاجة بتميز الـ(بوكوفون) هقولك التصميم العصري الجميل اللي بيخليه شبه تليفونات أيفون. كمان الفرجة على الفيديوهات واللعب على التليفون ده هايكون ممتع علشان الشاشة واخدة مساحة كبيرة من التليفون من الأمام.
صحيح التليفون مش بيقدم أعلى جودة في التصوير بالكاميرا الأساسية، لكن كاميرا السيلفي بتقدم دقة صور ممتازة (كاميرا 20 ميجا بيكسل) مع مؤثرات AI Beautify اللي بتخلي الصور أحلى بالذكاء الصناعي. كل ده مع بطارية 4000 ملي أمبير تقعد اليوم كله خاصة إنها بتيجي مع خاصية الشحن السريع.
Samsung Galaxy A51
السعر: 4999
أحلى مافي Galaxy A51 إنه جامع تقريبا 99% من مميزات التليفونات الذكية في تليفون واحد، والأحلى هو أنه من سامسونج اللي عملت اسم ممتاز في الشرق الأوسط ومصر. يعني مش هاتتعبي وراه في قطع الغيار والتصليح لو لاقدر الله جرى له حاجة.
التليفون بييجي بشاشة جميلة جدا بحجم 6.5 انش وبتدي أداء رائع تحت أشعة الشمس المباشرة. وبشكل عام سامسونج هي تقريبا أفضل مصنع شاشات في العالم (سواء تليفونات أو تليفزيونات) وده اللي بيخلي الـ A51 تليفون كويس جدًا بسعر كويس جدًا.
Samsung Galaxy A21s
السعر: 2966 جنيه
واحد من أرخص التليفونات اللي شوفناها في الفترة الأخيرة. لكن على الرغم من انخفاض السعر ده مش بييجي على حساب المواصفات. والمميز في التليفون إن الشاشة واخده معظم المساحة الأمامية يعني سهل قوي تقري عليه ملفات PDF أو الأولاد يلعبوا عليه ألعابهم المفضلة. كمان التليفون بطاريته عملاقه بتيجي بسعة 5000 ملي أمبير ودي سعة أكتر من رائعة ويقدر التليفون يقعد حوالي يومين من الاستخدام المعتدل قبل ما يحتاج يتشحن.
Huawei Y8p
السعر: 3250 جنيه
لو سألتيني ليه بحب تليفونات هواوي بشكل عام؟ هقول لك علشان بتقدم أعلى مواصفات فنية بأقل سعر. وده اللي شوفته في الـ Huawei Y8p.. التليفون تصميمه جميل وعملي وكاميرا أساسية 48 ميجا بيكسل وكاميرا سيلفي 16 ميجا بيكسل. يعني تقريبا أحسن جودة صور وفيديو في الفئة السعرية دي. كل ده بسعر أكتر من رائع. خاصة إن هواوي النهرده بتقدم خدمة صيانة وخدمة ما بعد البيع كويسه جدًا.
Oppo A92
السعر: 4426 جنيه
وطالما بنتكلم عن التصوير، تليفونات أوبو من التليفونات الممتازة في التصوير. و Oppo A92 بييجي بكاميرا خلفية 48 ميجا بيكسل وأمامية 16 ميجا بيكسل والفكرة مش بس في قوة الكاميرا بالأرقام. لكن أوبو بتهتم إن نظام التشغيل يوفر للكاميرا أحسن قدرة على التصوير واستغلال الذكاء الصناعي AI علشان يطلع أحسن نتيجة ممكنة.
وبكده نبقى استعرضنا معاكم مجموعة من أحسن التليفونات الذكية في حدود 5000 جنيه. نتمنى يكون فيها ارشاد كويس لكم أثناء الشراء.
التعليق باستخدام حساب فيس بوك