“سمرة بعيون كحيلة.. ابعد عني”
مفيش راجل في الدنيا هيفهم المعادلة دي! بصرف النظر عن لون البشرة، بس سعينا كبنات وستات للوصول لأفضل رسمة آيلاينر بيسبقه عملية تدريب صارمة ما فيهاش هزار. ومعجزة الوصول لرسمة مضبوطة بناخد عليها وسام شرفي. والجزء التاني من المعادلة اللي هو ابعد عني هو الجزء السري إن الآيلاينر لما بيحس إن في حد بيستعجلني وأنا بارسمه، بيتوتر وعمره ما بيظبط. علشان كده، أي حد يشوف واحدة في حالة المعادلة “عيون كحيلة، ابعد عني” يا حبذا يبعد بجد علشان هنقعد نرسم 15 مرة، وده وقت ضايع من عمرك انت، صدقني بانصحك بإخلاص. المقال ده بقى للستات: هاقول لك على خمس أخطاء ممكن تكوني بتعمليها وبتخلي تجربة رسم الآيلاينر مزعجة بالنسبة لك، واللي بمجرد ما هتتجنبيها هتلاقي الدنيا سهلة معاكي.
5 أخطاء بتقعي فيها وانتي بترسمي الآيلاينر:
موقع جلامور الأشهر في عالم الموضة والجمال بيقول لك إن فيه أخطاء تقريبًا مشتركة بين كل الستات، واللي بمجرد تجنبها هتلاقي نفسك محترفة في عالم الآيلاينر:
- شد العين أو جفن العين بشدة خلال الرسم.. الحركة دي بتبوّظ أي محاولة لرسمة عين مضبوطة ولازم تتوقفي عنها.
- استخدامك لنوع آيلاينر غير مناسب ليكي.. يعني زي ما تكوني لسة مبتدئة وتستخدمي الآيلاينر الجيل. هيكون صعب عليكي تحددي الكمية المظبوطة على الفرشة بجانب إنه بينشف بسرعة وهيكون استخدامه صعب علشان كده بينصحوا إنك تستخدمي القلم في البداية.
- قفلك لعينك وانتي بترسمي عين القطة.. رسمة عين القطة عمرها ما هتظبط لو قفلتي عينك وانتي بترسميها لأن النتيجة هتكون رسمة تانية خالص .. علشان كدة ممنوع تقفلي عينك طالما قررتي تستخدمي اللووك ده.
- ما ترسميش أبدًا جفنك السفلي.. كل رسمك والشغل كله على الجفن العلوي، لأن التصرف ده هيدي شكل سلبي مش هيعجبك. لكن كل الرسم على الجفن العلوي علشان يديكي منظر أكثر حيوية وشباب.
- ما تستخدميش الكحل الأسود على قد ما تقدري.. بسبب إنه على الرغم إنه بيدي شكل درامي أكتر بس مع بداية تعلم رسم الآيلانير، ممكن يدي انطباع إن عينيكي صغيرة وسنك أكبر. عمومًا في البداية، خليكي حريصة على إن الشكل يكون بسيط وحيوي وبعيد عن التعقيد.
التعليق باستخدام حساب فيس بوك