كتير مننا بتحب تحط المكياج، سواءً في مناسبات معينة أو خروجات معينة، أو في إنترفيو، أو حتى كل يوم. لكن بيبقى محبط قوي لما المكياج يبوظ، عشان كده، في المقال ده، جيبنا لك أكتر أخطاء متكررة بتتسبب في إن المكياج يبوظ. خلينا نشوف 15 خطأ من أخطاء المكياج.
أخطاء عند وضع المكياج
- غسيل الوش
- المكياج على بشرة ناشفة
- الإضاءة
- الكونسيلر
- كريم الأساس الزيادة
- كريم الأساس غير المتطابق
- الحواجب
- الجليتر
- الماسكارا
- قلم الشفايف
- أحمر الخدود
- عدم مسح المكياج
- تلوين المكياج على هدومك
- الشفاه غير المرطبة
- العيون مع الشفايف
أشهر الأخطاء عند وضع المكياج بالتفصيل
- غسيل الوش
طبعًا غسيل الوش هو أول وأهم حاجة في اليوم. لكن بتحصل مشكلة مع بعض أنواع البشرة إن بعد ما تحطي الميكاب، هتلاقي الميكاب شكله ناشف جدًا وبتقع أجزاء منه. ده دليل إنك غسلتي وشك أكتر من اللازم.
- المكياج على بشرة ناشفة
زي ما الغسيل الكتير ممكن يكون سبب في جفاف البشرة اللي بيسبب شكل جاف للمكياج، كمان إنك تحطي مكياج على وش ناشف من غير ترطيب خالص هيسبب نفس المشكلة.
- الإضاءة
لو هتخرجي بالنهار، وإضاءة التسريحة عندك خافتة ومش فاتحة الشباك، هتلاقي نفسك بتحطي كميات مكياج أزيد بكتير من اللازم، هتلاقي نفسك في النهاية حاطة مكياج ليلي مش نهاري. والعكس بالعكس، لو إضاءة التسريحة عالية قوي وانتي خارجة بالليل، ممكن تكوني حاسة إنك بتحطي زيادة قوي رغم إنك بتحطي مكياج هادي. حاولي تظبطي الإضاءة مع خروجتك.
- الكونسيلر
حاولي دايمًا تحطي كريم الأساس قبل الكونسيلر. لما تحطي كريم الأساس، هيكون اللون وضح قدامك، فمش هتحطي لا زيادة ولا أقل من اللازم.
- كريم الأساس الزيادة
كريم الأساس الزيادة بيضر بشرتك، وكمان بيخلي اللوك على بعضه وحش جدًا وإنك كإنك لابسة ماسك.
- كريم الأساس غير المتطابق
عشان تداري بعض عيوب البشرة أو تعملي كونتور، بتستخدمي درجتين من الألوان، لكن لو ما استخدمتيش ده بحرص، وكمان عملتي تكنيك البليندج أو الدمج صح، هتكون النتيجة لوك ملخبط وباين فيه إنك مستخدمة لونين، أو إن بشرتك مش موحدة اللون.
- الحواجب
الحواجب جميلة، بس جمالها في طبيعيتها. ابعدي عن قلم الحواجب وبلاش ترسمي رسمة مش موجودة في وشك الطبيعي لإنها بتبان مش طبيعية وبتوحش شكلك.
- الجليتر
لطيف إننا نستخدم الجليتر على مكان محدود جدًا أو في كورنر العين بس، في أضيق الحدود يعني. أكتر من كده، اللوك هيكون شكله بشع.
- الماسكارا
الماسكارا عشان تظبط، فيه كام حاجة كده محتاجة تعرفيها وتعمليها: إنك تختاري ماسكارا أغمق درجتين بس من لون شعرك، وإنك تستخدمي طبقة واحدة بس من الماسكارا. أكتر من كده، النتيجة غالبًا هتكون رموش ملزقة أو مش باينة.
- قلم الشفايف
خلينا نقول إنك أصلًا مش محتاجة تحددي شفايفك، هي أولها وآخرها باين لكل الناس، فمش لازم أبدًا تعملي كده في نفسك لإن اللوك هيكون عجيب وكإن طفل صغير رسم وشك.
- أحمر الخدود
بلاش أحمر خدود من غير كريم أساس. الموضوع نتايجه صعبة جدًا. كمان نصيحة بعد ما تحطي الفرشة في الباودر، اخبطي الفرشة خبطتين عشان تنزل الزيادات وبعدين حطيها على وشك.
- عدم مسح المكياج
عدم مسح المكياج يعني إتلاف للبشرة. وإتلاف البشرة معناه إنك مهما حطيتي مكياج بعد كده، هيبان الشكل مش لطيف، غير إنك بتتعرضي لحبوب ومشاكل كتير.
- تلوين المكياج على لون هدومك
تخيلي لو انتي لابسة فستان أخضر مثلًا، وحطيتي آيشادو أخضر؟ متخيلة؟ ما تعمليش كده بقى.
- الشفاه غير المرطبة
زي ما البشرة ترطيبها لازم قبل وضع المكياج، الشفايف لازم تترطب بمرطب شفاه عميق (وتتأكدي إنك بتشربي ميا كويس) قبل ما تحطي أحمر شفايف.
- العيون مع الشفايف
هتلاقي نصيحة متكررة من كل الميكب أرتيستس إنهم بيقولوا دايمًا ما تشتغليش على الاتنين مع بعض. يا إما تبقى الشفايف هي اللي ظاهرة جدًا يا إما العيون اللي ظاهرة جدًا. مش الاتنين.
التعليق باستخدام حساب فيس بوك