الكام سنة اللي فاتت ناس كتير عرفت عن التربية الإيجابية والناس اتقسمت فريقين بين مؤمنين بيها وبأهميتها، وبين اللي شايفينها هتدلّع الولاد وتبوظهم.
عشان كده، قررت الفترة الجاية إني هاكتب سلسلة مقالات بتشرح كل أدوات التربية الإيجابية شرح مبسط عن طريقة تقدري تحددي كل أداة منهم تستخدميها إمتي وإزاي وبالتالي تقدري تاخدي من التربية الإيجابية اللي يناسبك ويناسب ولادك وظروف حياتك.
أول أداة هبتدي بيها هي “التايم اوت” بس مش التايم اوت اللي إحنا عارفينه ومتعودين عليه ده، لكن في التربية الإيجابية بنسميه positive time out أو ركن التهذيب الإيجابي.
طيب تعالوا نعرف شروطه إيه وبيتعمل إزاي وهيفيدنا ليه مع ولادنا؟
تخيلي نفسك كدة لما إنتي وجوزك تشدوا سوا ويروح قايلك “إتفضلي إدخلي إقعدي في أوضتك فكري في اللي حصل لوحدك عشان تعرفي إنك غلطانة” ياتري ممكن تفكري في إيه وقتها؟ هل فعلا هتفكري تصلحي اللي حص ده إزاي وإنتي ممنوعة وقاعدة مع نفسك جوا كدة وإنتي في قمة غضبك؟ واللا هتفكري أد جوزك راجل مفتري مثلا!
المشهد التاني: إنتي وجوزك في نفس الخناقة ونفس القفش بس قررتي إنك تاخدي بريك عشان إنتي متعصبة وتروحي تعملي حاجة تهديكي عشان تقدري تفكري فدخلتي اوضتك برده بس قعدتي علي كنبتك المفضلة وسمعتي مزيكا أو قعدتي تقري كتاب لحد ما التوتر يقل عشان تقدري تفكري لحل في حل المشكلة وتتكلمي مع جوزك بهدوء.
عايزاكوا تتخيلوا المشهدين دول وترطزوا في مشاعركوا وأفكاركوا وقتها!
وهو ده بالظبط اللي ولادنا بيحسوا بيه ويفكروا فيه وهو ده بالظبط بين التايم اوت التقليدي اللي في صورة عقاب وبين الركن الإيجابي اللي في صورة إقرار وإدارة لمشاعر الطفل وتدريبه علي حل المشكلة.
-
ركن التهذيب الإيجابي:
المصدر: Positive Discipline – أدوات التربية الإيجابية
عبارة عن مكان الطفل بيلجأ له لما يحس إنه غضبان أو في نوبة غضب أو في مشكلة ومحتاج ليها حل.
الإنسان وقت الغضب بيفكر بس بالجزأ المسؤل عن المشاعر وهو الجزأ البدائي وعشان نقدر نفكر بالجزأ العقلاني اللي بيسمح للطفل يتعلم من المشكلة يبقي لازم يكزن هادي، عشان كدة ركن التهذيب الإيجابي بيعلم الطفل يسيطر علي غضبه ويتعلم طرق يهدي بيها نفسه، يفكر بهدوء في المشكلة اللي حصلت ويقدر يدور علي حل من غير ما يحس إنه متعاقب أو منبوذ.
-
شروط ركن التهذيب الإيحابي:
- نكون متفقين إننا نعمله ونشرح للطفل المبدأ بتاعه في وقت يكون هادي فيه.
- نشرك الطفل معانا في تظبيطه وترتيبه ويحط فيه حاجات بيحبها وتساعده يهدي.
- نسميه إسم لذيذ مبتكر بمساعدة الطفل.
- نفكر الطفل وقت الغضب إنه محتاج يهدي ونسأله لو يحب يقعد في الركن ده لحد ما يهدي عشان نقدر نتكلم في المشكلة ونشوف حل وإحنا هاديين.
وقبل كل ده لازم إجنا كأهالي نتخلص من أفكارنا القديمة إن الطفل لازم يتعاقب ونشوفه ندمان وبيعاني كدة عشان يتعلم من غلطه، لأن أوقات بيبقي الحل أسهل بكتير ما إحنا متخيلين والتجربة نفسها وإن الطفل يصلح خطأه بنفسه هو كفيل يعلمه بدون تدخل قوي مننا.
أتمني تكون الأداة ده من التربية الإيجابية مفيدة ليكم ولو عندكوا أسألة سيبوها في الكومنتس وإستنونا في الأدوات اللي جاية.
- المصدر:
- Positive Discipline
- كتاب positive time out
1 comment
من سن ايه نبتدي موضوع التايم اوت؟
هل صح اسيبه وقت التايم اوت لوحده لو هو صغير ٣ سنين مثلا(ده لو ينفع تايم اوت ليه) ولا افضل قاعدة جنبه ؟