محتويات المقال
كتير مننا عنده إدمان اقتناء أدوات المطبخ خصوصًا اللي شكلها ملفت ولذيذ بنلاقي نفسنا اتشدينا لها بمنتهى البساطة وهووب نلاقينا بندفع تمنها على الكاشير. بس الحقيقة في ظل الظروف الاقتصادية اللي بقينا فيها وارتفاع الأسعار الرهيب لكل حاجة بقى مهم جدًا نرتب أولوياتنا في الشراء ونشتري بس اللي هينفعنا ويخلّي حياتنا أفضل.
عشان كده بننصحك لما تكوني بتجهزي بيتك أو حتى شوفتي حاجة في محل أدوات منزلية وعجبتك حاولي دايمًا تقفي مع نفسك وتسأليها سؤال مهم جدًا: أنا هاعمل بيها إيه؟ عشان ما ترجعيش تندمي إنك اشتريتيها أو تشتكي إن مطبخك مكركب وإن ما عندكيش مكان تخزني فيه أدواتك.
لازم كمان تحاولي دايمًا تراعي اهتماماتك المطبخية بمعنى إنك لو مش مهتمة قوي بالخبز، ما تروحيش تشتري أدوات لتزيين الكيك، لو مثلًا بتخافي من السكاكين الحامية، ما تشتريش طقم سكاكين كبيرة في الحجم!
عشان كده في المقال ده، قررنا نشارك معاكي مجموعة من الأدوات وأجهزة المطبخ اللي ما لهاش أهمية من وجهة نظري وممكن نستغنى عنها أو نستبدلها بأداة تانية ممكن تكون أوفر سعرًا أو تكون متعددة الاستعمالات فبكده هتبقي جيبتي أداة أو جهاز واحد بس، لكنه قام بأكتر من وظيفة. وطبعًا كل واحدة لها وجهة نظرها وحريتها في اختيار اللي يناسبها ويخلي شغلها في المطبخ أسهل.
عصارة الليمون
ممكن ناس كتير تختلف على أهميتها بس الحقيقة أنا باشوف إنها ما لهاش أي لازمة لأن بمنتهى البساطة هتعصري الليمونة بإيدك وتصفي البذر بالإيد التانية وتدعكي إيدك بقشرة الليمونة المليانة فيتامين سي المفيد جدًا لبشرتك، وعادة بتكون العصارة تقيلة وهتزودي مواعين واحنا مش ناقصين.
أداة فصل البيض
دي بقى كل ما باشوفها بتتباع في مكان بابقى مستغربة جدًا. لأن الحقيقة فصل البيض مش محتاج أي أدوات. ده غير إنه أصلًا عملية فصل البيض دي مش حاجة هتتكرر كتير في المطبخ إلا لو ليكي في الخبز والحلويات. حاجة تجيب شلل الحقيقة!
قطاعة التفاح
من الأدوات اللي أعتقد أٌقصى أهمية ليها إنك تديها للولاد يقطعوا بيها التفاحة وأعتقد إنهم هيقطموا من التفاحة عادي ويعملوها لعبة مش أكتر.
قطاعة البيض
مع إني كنت بحبها وأنا طفلة جدًا بس في الحقيقة هي برضه سهل الاستغناء عنها وتقدري عادي تقطّعيه بالسكينة.
مطحنة الملح والفلفل الإلكترونية
هي صحيح شكلها حلو، بس الحقيقة سعرها غالي جدًا. ده غير إن المطحنة اليدوية بتكون أرخص بكتير وبتؤدي نفس المهمة.
هراسة التوم
أداة وزنها تقيل، تنضيفها سخيف جدًا خصوصًا لو سيبتيها شوية في حوض المطبخ بتكون صعبة جدًا في التنضيف. تقدري تفرمي التوم بالسكينة أو تبشريه بمبشرة صغيرة.
الشوايات الكهربائية
لما جات لي هدية فرحت وقلت حجمها كبير وهتنفع في عزومة وتاخد كمية كبيرة. لكن الحقيقة كل توقعاتي كانت غلط لأنها ما بتسخّنش بصورة متساوية. ولأنها كهرباء، بتفصل كل شوية وتنزل درجة حرارتها وده بيؤثر على الأكل اللي بيتشوي. ده غير إن الشواية اللي بتتحط على البوتوجاز أو طاسة واسعة كعبها سميك بتحتفظ بالحرارة هتؤدي المهمة أفضل كتير والتحكم في درجة حرارتها هيكون أسهل بكتير. هي كمان للأسف حجمها كبير وبتحتاج مكان كبير للتخزين وكتير من الستات أجمعوا على عدم نفعها لهم.
حلة الرز والطهي بالبخار
برضه ممكن نختلف هنا. كتير قالوا بتسهّل عمل الرز وبتحافظ عليه سخن. لكن في الحقيقة، الحلة دي أصلًا اخترعها اليابانيين عشان يتعمل فيها الرز ويكون نتيجته زي الرز المسلوق أو الرز المستوي على البخار وبتستخدم كتير في تحضير رز السوشي. يعني بالنسبة لطرق المصريين في طبخ الرز، باشوف إنها ما بتساعدش خالص. الغريب إن المصريين عملوا فيها المحشي، سبحان الله!
القلاية الكهربائية
القلي فيها بيدي نتيجة كويسة جدًا، بس مشاكلها كتير قوي من أول استهلاكها لكمية كبيرة جدًا من الزيت، لاستهلاك كهرباء عالي قوي، للمساحة اللي بتحتاجها للتخزين، ده غير صعوبة تنضيفها. وبمنتهى البساطة، طاسة عميقة مخصصة للقلي هتحل لك المشكلة وتغنيكي عنها.
أطقم الحلل الكاملة
عرايس كتير بيلاقوا طقم حلل بالعشرين قطعة وعليه خصومات، فيشتروه. في النهاية، بتلاقي إنك بتستخدمي مقاسين تلاتة بالكتير، والباقي مالهش أي استخدام ومركون في الدواليب. يُفضّل إنك تشتري دايمًا الحلل فرداني حسب احتياجاتك.
ماكينة سلق البيض
أعتقد دي محدش هيختلف عليها. سلق البيض عملية بسيطة مش محتاجة لماكينة تعملها وتقدري تظبطي درجة تسوية البيض بالتحكم في الوقت اللي بتسيبيه فيه على النار ودرجة الحرارة المناسبة.
طاسة الكريب
كل الفرق عن أي طاسة عادية بيكون إنها بدون حواف عالية، تقدري تستخدمي أي طاسة لعمل الكريب. المهم تكون مصنوعة من مادة غير لاصقة زي التيفال عشان ما يلزقش معاكِ.
حلة سلق المكرونة
حجمها كبير جدًا وبتحتاج مكان كبير للتخزين. تقدري تستخدمي أي حلة عميقة عندك ومصفاة معدنية تصفي فيها المكرونة.
بكده نكون جمعنا لك مجموعة من الأدوات اللي مالهاش أي لازمة في المطبخ. طبعًا الموضوع ده ممكن البعض يختلف في الرأي بالنسبة لبعض الحاجات. في النهاية، يهمنا دايمًا إنك تعملي اللي يناسبك ويسهل عليكِ حياتك وإن وقفتك في المطبخ تكون مثمرة.
1 comment
انا اختلف جدا كل الادوات المذكورة مهمه جدا