أسئلة الأطفال المحرجة: لما بنتي سألتني “يعني إيه ختان”

من كام يوم، صاحبتي كلمتني بتقول لي: الحقيني بنتي اللي عندها 9 سنين شافت إعلان بيقول “لا لختان البنات” وسألتني “يعني إيه ختان؟” وكانت مش عارفة مفروض تقول لها إيه وتشرح لها ازاي وهل مناسب لسنها إنها تعرف حاجة زي دي ولّا لأ أصلًا؟

القاعدة

طبعًا زي ما اتفقنا وقلنا كتير قبل كده، إن الطفل ما دام سأل، يبقى مستعد يعرف واحنا لازم نجاوب وما نسيبهوش لفضوله يوديه و يجيبه، فأول حاجة قلتها لها طبعا إنها لازم تجاوبها و تفهمها هو إيه الختان، طيب هتشرح لها ازاي؟ ده اللي هنتكلم فيه في مقال النهارده من غير ما نتطرق لإيه الصح والغلط ولا لقناعات كل واحد الشخصية.

تبسيط المعلومة

فكرة الختان ببساطة ممكن توصل للطفل إنه عبارة عن قطع جزء من العضو التناسلي للولد أو البنت، ونتكلم معاهم عن العادات اللي بيعملها الناس من زمان. ونشرح لهم إيه رأي الطب في موضوع ختان الولاد وهل هو ضروري أو مش ضروري ووجهة نظرنا الشخصية في الموضوع ده.

ونشرح لهم كمان ليه ختان البنات بقى يعتبر جريمة دلوقتي وبيتعاقب عليه الطبيب اللي بيقوم بيه، وده بحسب كلام منظمة الصحة العالمية وإنه في بنات زمان لما اتعرضوا له سبب لهم صدمة نفسية وبعض البنات حصل لها نزيف أدى للوفاة.

السبب

طيب لما يسألونا ليه كانوا بيعملوه؟ لإنه كان عُرف وكان من عادات معظم العائلات زمان، وكانوا متخيلين إن لها فوايد صحية ومع تقدم الطب، اكتشفوا إنها بتؤذي البنات مش بتفيدهم، ونبين كويس موقفنا وقناعتنا الشخصية سواءً لختان البنات أو الولاد، ويا سلام لو نحكي تجاربنا كمان الشخصية في الموضوع ده، لإنها مفيدة قوي في تقوية العلاقة بيننا وبين الولاد واستمتاعهم في الكلام معانا وطبعًا في النهاية من حق الطفل كمان إنه يعرف هل هو حصل له ولّا لأ.

وما ننساش إنه مهم واحنا بنكلم الأطفال في أي موضوع حساس ما نكونش متوترين كده ومبينين لهم إن فيه مشكلة، فنحاول على قد ما نقدر نكون بنتكلم عادي ونشجعهم يسألوا اللي يخطر في بالهم، ومهم كمان إننا نتأكد إن المعلومات اللي بنقولها بتعرض كل وجهات النظر: يعني رأي الدين ورأي وعادات المجتمع اللي احنا عايشين فيه ورأينا الشخصي وقيمنا اللي عايشين بيها في أسرتنا الصغيرة واللي بنربي ولادنا عليها.

راحة بالي هي منصة لراحة كل أم، انضمي لأكبر وأهم مجتمع دعم للأمهات في مصر هنا. وفري احتياجاتك ومصاريفك اليومية من خلال كارت خصومات راحة بالي هنا. اخسري وزن الحمل والرضاعة وكلي أكل صحي في برنامج رياضي ونظام غذائي متفصل على احتياجاتك هنا.

مصادر:
WHO
WHO