محتويات المقال
أنا عندي إقتناع إن لو جايزة أوسكار اتعملت للأمهات، أم التوأم هي اللي هتكسبها وعن جدارة كمان بس مش عشان هي أم فظيعة محصلتش ولا بطلة خارقة وليها جناحات بتطير وعضلات كتير وبتعمل 500 حاجة في نفس التوقيت وهي واخدة بالها من سمير وشهير وبهير.. لأ خالص كل الحاجات اللي اتقالت عن أم التوأم دي كوم وحوار الأسئلة اللي أم التوأم بتتسألها ده كوم تاني خالص، أم التوأم بجد تستحق جايزة الأوسكار عشان بتستحمل أسئلة كده من بره المنهج ملهاش تفسير علمي أو إجابات معقولة، أسئلة بيحتار فيها العلماء وبتتنافى مع نظريات النسبية والجاذبية لأينشتاين، أسئلة هنعرفكم عليها بس حاولوا تدونا إجابات منطقية عشان حقيقي مش عارفين.
هما توأم؟
مصدر الصورة: Resharelt
أول سؤال بنتسأله في أي خروجة عادية، وإحنا نازلين السوبرماركت في أمان الله وإحنا حتى طالعين السلم وعمو لطفي جوز طنط سعاد اللي شافهم 100 مرة بردو هيسألنا هما توأم، أنا ممكن أعذر الناس فعلًا عشان فيه ناس بتجيب عربية التوأم لو ولادهم فرق السن بينهم صغير فبيقعدوهم جمب بعض فممكن الناس تتلخبط وتسأل من باب الفضول، بس لو توأم متماثل حضرتك ونتسأل برضو نفس السؤال هما توأم؟ هنجاوب نقول ايه؟ هاااه؟ ايييه؟ لا فولة وإتقسمت نصين.. يخلق من الشبه أربعين.. كان فيه خصم على الأتنين يوم الولادة أيعقل؟
ايه ده دول وراثة عيلتكم فيها توآئم كتير؟
مصدر الصورة: People.com
السؤال ده اتهرس في 100 فيلم عربي وأجنبي قبل كدة وبقى ممل ملل السنين.. وطبعًا بقى مطلوب مننا نقعد نقول للي بيسأل عن كل حالات التوائم في عيلتنا الجميلة.. وبعدها لازم يرد الرد المعروف: “آآآآه علشان كدة”.. ولو قلنا مفيش حالات توأم في العيلة هيقول: “غريبة”!
يا حرام بتعملي بيهم ايه؟
مصدر الصورة: giphy.com
بصراحة مش حاسة إن فيه رد وإجابة منطقية على السؤال الرهيب غير إني بركب مراجيح وبنط حبال، أصل هنعمل ايه يعني غير إننا بنعمل كل حاجة الأم الطبيعية بتعملها بس مضروبة في إتنين، بنرضع مرتين ونغير ونشطف ونحمي مرتين ونأكل ونذاكر ونصوت مرتين وآآآآآآآآآآه يا عضمك يا رضا.
قريبين من بعض وبيحسوا ببعض مش كده؟
مصدر الصورة: Gfycat.com
وده سؤال برضو يا طنط دولت؟ دول جيران في الرحم وبينهم سائل أمينيوسي مشترك حضرتك ودي كانت آخر مرة أفتكرها فيهم كانوا قريبين من بعض، دلوقتي بنحاول ننمنعهم من إنهم يسببوا عاهة مستديمة لبعض، جو التوأم اللي بيحسوا ببعض لو واحد فيهم في خطر ده في أفلام أبيض وأسود بس يا طنط والله.
دول طبيعي ولا حقن مجهري؟
مصدر الصورة: Gfycat
وده بقا ليفل الوحش في الأسئلة ومش هنقدر نجاوب أكتر من كده عشان هو ملهوش رد الحقيقة..
التعليق باستخدام حساب فيس بوك