أمهات كتير بتعاني من قلة كلام ولادها وإنهم ما بيحكوش إيه اللي بيحصل في المدرسة في يومهم ودايما يعرفوا أخبارهم في المدرسة بالصدفة وطبيعي أنا كأم هكون محتاجة طفلي يحكي لي إيه اهم الأحداث اللي بتحصل في يومه في المدرسة عشان اتطمن عليه بالذات لو أول سنة له أو لسة صغيرومحتاجة أتطمن لو في حد بيضايقه أو لو مبسوط أو حتي بيتعلم إيه.
في أطفال طبيعتها مش متكلمة أو مش متعودة تعبرعن نفسها كفاية وبالتالي مش بيعرفوا يجاوبوا بإيه أصلا وغالبا إحنا بنسأل السؤال الغلط اللي ملوش إجابة محددة اللي هو السؤال الشهير “عملت إيه في المدرسة النهاردة”! وبتكون إجابتهم هي الإجابة الشهيرة برده اللي هي “الحمد لله” طيب يا إبني قولي شوية تفاصيل أكتر متلاقيش!
في المقال ده جمعتلك أكتر أسئلة تقدري تساعدي طفلك بيها إنه يحكي ويتكلم اكتر عن يومه في المدرسة:
- أسألة مفتوحة:
بلاش الأسئلة اللي إجابتها “أه أو لا” فبالتالي الطفل هيقول اه او لا ويسكت مش هيحاول يحكي زيادة، فإحنا نسأل أسئلة تحمس الطفل يتكلم اكتر زي
” إيه أحسن حاجة عملتها في المدرسة النهارة \ إيه أكتر حاجة ضحكتك مع أصحابك النهاردة \ إيه اللي حصل زعلك النهاردة او خلاك مش مبسوط\ إيه أكتر حاجة إتعلمتها عجبتك النهاردة”
- نبدأ السؤال بملاحضة:
بمعني إننا بدل ما نسأل الطفل عن الأطفال الجديدة اللي معاه في المدرسة السنة ده بشكل عام فيقول كويسين وخلاص نخلينا محددين اكتر زي
” أنا عرفت إن في ولاد جدية معاك السنة ده، مين اكتر حد بتحب تلعب معاه؟ \ أنا أخدت بالي إن الجدول النهاردة تقيل، إيه أكتر سيشن حبيتها في يومك؟\ إيه اكتر سيشن مش بتحبها؟”
- دور المفتش كورومبو:
بلاش وإحنا بنسأل الطفل نحسسه إن إحنا بنحقق معاه وقاعدين مترقبين للإجابة، نحاول نكون relaxed وإحنا بنكلمهم ونحكي عن نفسنا وإحنا في وضعهم ولو كنا عارفين من المدرسة او من أصحابهم إن في مشكلة بلاش كلام من نوعية “أنا بعرف كل حاجة بتعملها\ العصفورة قالت لي”.
- الإنصات بإهتمام:
أكتر حاجة بتشجع الأطفال وتعودهم علي الكلام والحكي معانا هي إننا لما يتكلموا نسمعهم بإهتمام وتركيز من غير ما نفضل نقاطعهم عشان نقول ملاحظات أو نعلق علي حاجة غلط مثلا، مهم إننا نبقي أه مركزين معاهم لكن في نفس الوقت مش بنقاطعهم ولا ساكتين خالص ونرد بكلمات بسيطة زي ” أه فاهماك \ وبعدين \ إممم وإيه كمان؟”.
وطبعا مهم إننا نركز إن رغبتنا نتطمن علي ولادنا ونشدعهم يحكوا ماتكونش بتشكل ضغط عليهم بطريقة تنفرهم من الكلام أصلا، فنحافظ إننا في حياتنا اليومية نحكي كتيرمعاهم إحنا عن يومنا ماشي إزاي ونتفاعل معاهم ونهتم بحواديتهم الصغيرة.
مصادر ساعدتنا:
التعليق باستخدام حساب فيس بوك