محتويات المقال
طول الوقت واحنا بنقلّب في السوشيال ميديا، بنشوف صور أكل حلوة قوي كلها ألوان متناسقة وتكوينات فنية وأطباق ومعالق مميزة، لكن لما بنيجي ناخد صورة لطبق عملناه، ما بتطلعش حلوة كده زي اللي بنشوفه على السوشيال ميديا وبنحس إن الصورة ما بينتش جمال الطبق وظلمته بدل ما تظهره، ما تقلقيش، دي مرحلة طبيعية بيمر بيها أي حد بيبدأ يظهر عنده شغف تنسيق وتصوير الأكل.
مجال تصوير الطعام بقى واحد من أهم المجالات المتعلقة بكل حد عنده اهتمام بالأكل بشكل عام، المطاعم بقت تهتم جدًا بصور أطباقها الموجودة في المنيوهات عشان دي من أهم طرق الدعاية ليهم. وكتير من الفوود بلوجرز والشيفات المشهورين بقوا يهتموا بتقديم أكلاتهم اللي بيطبخوها أو أكلات بياكلوها في أماكن مميزة على السوشيال ميديا من خلال صور مميزة وملفتة عشان يبهروا متابعيهم. وانتي كمان كأم وست بيت، ممكن يكون عندك الاهتمام ده، سواءً في صورة هواية أو حتى تكوني حابة تحترفي تصوير الطعام وتكون دي شغلتك اللي تحققي بيها ذاتك.
عشان كده، النهارده قررنا إننا نساعدك ونشاركك بمجموعة مباديء وأساسيات تخليكي تقدري تصوري أكلك في البيت زي المحترفين بأقل الإمكانيات. ولو كنتي مهتمة جدًا بالموضوع ده ممكن تكون المباديء دي هي نقطة البداية اللي تساعدك تنطلقي وتبدعي في مجال تصوير الطعام.
1. اتعلمي مباديء وأساسيات التصوير الفوتوغرافي
أهم حاجة تكوني بتعرفي مباديء أساسية للتصوير وخصوصًا لو هتستخدمي كاميرا مش موبايل. حاولي تتعرفي على الكاميرا بتاعتك وعلى إمكانياتها وكل الاختيارات المتاحة اللي ممكن توفرها لك وانتي بتصوري وبسهولة تقدري تعلمي نفسك عن طريق الفيديوهات اللي بقت مالية الإنترنت، أو كورسات أساسيات التصوير اللي بتقدمها بعض الأماكن في مصر اللي بتهتم بالتصوير بشكل عام مش بس تصوير الأكل.
تعليم التصوير – المصدر app.getoccasion
2. اختاري مكان مناسب في بيتك لعمل ستوديو تصوير مصغر
كل اللي هتحتاجيه في المكان هو شباك تدخل منه الإضاءة الطبيعية، ترابيزة تجهزي عليها محتويات الصورة وشوية معدات بسيطة. الإضاءة الطبيعية بتدي نتايج هايلة لصور الأكل، مش شرط يكون عندك مصادر إضاءة صناعية سعرها طبعًا مش رخيص عشان تطلعي صور حلوة. دايمًا خليكي حريصة إنك تستخدمي حامل الكاميرا Tripod عشان ده هيسهل عليكي جدًا عملية التصوير وكمان هيخلّي صورك تطلع مظبوطة وهتقدري تتحكمي أكتر في الزاوية اللي هتستخدميها وانتي بتصوري. هتحتاجي كمان حاجتين مهمين جدًا:
سطح لتشتيت الإضاءة اللي جاية من الشباك Diffuser
وده ببساطة مهمته إن الإضاءة اللي داخلة ما تكونش حادة عشان الصورة تكون طبيعية بقدر الإمكان ومفيش فيها أماكن فيها إضاءة شديدة أو ساطعة أكتر من اللازم. ممكن تشتريه من محلات بيع مستلزمات وأدوات التصوير أو ممكن تستخدمي أي قماشة بيضا شفافة أو حتى ورق الزبدة الشفاف وتلزقيه على إزاز الشباك.
هسيبك مع الصور توضح لك الفكرة أكتر
تعليم التصوير. المصدر shopify
تعليم التصوير – المصدر cherylmalik
سطح عاكس للإضاءة Reflector
وده وظيفته إنه يعكس الإضاءة على الأماكن المظلمة في الصورة. ممكن برضه تشتريه من محلات بيع أدوات التصوير وممكن تستخدمي أي سطح لونه أبيض زي مثلا فرخ ورق أبيض مقوى أو حتى قماشة بيضا وتثبتيها على أي سطح عندك. هسيبك مع الصورة توضح لك الفكرة.
تعليم التصوير – المصدر flourandfloral
3. ابدأي في تجميع أدواتك المميزة
الخلفيات أو backdrops من أهم الأدوات اللي هتحتاجيها في تصوير الأكل. تقدري تشتريها أونلاين. كتير من الصفحات بتوفرها بأشكال وألوان مختلفة وممكن كمان يعملوا لك الشكل واللون اللي تحبيه، وممكن كمان تعمليها بإيدك بشوية خشب ودهانات بسيطة لو انتي بتحبي إنك تعملي حاجتك بإيدك وهتكون طبعًا أوفر. اتفرجي على youtube، مليان فيديوهات تساعدك.
مهم جدًا كمان إن يكون عندك مجموعة متنوعة من الأطباق المختلفة الأحجام والأشكال والمعالق وأدوات الغرف المميزة في شكلها وكمان فوط المطبخ الملونة اللي بتضيف روح حلوة قوي للصور، جمعي أدواتك من أماكن مختلفة وبستايلات مختلفة، يعني حاجات مودرن وحاجات أنتيكات وقديمة شوية عشان تكون صورك متنوعة وكل صورة ليها طابع مختلف.
تعليم التصوير – المصدر foodbloggersofcanada
4. اتفرجي على صور كتير جدًا
طول الوقت اتفرجي على صور الأكل وسجلي في نوتة الحاجات اللي عجبتك في كل صورة سواء التكوين بتاعها أو الأدوات المستخدمة، أو الإضاءة، أو الألوان. هتلاقي نفسك اتعلمتي حاجات كتير ومن غير ما تحسي اتكونت جوه راسك خبرة وأفكار هتبدأ تظهر لما تيجي تاخدي صورك انتي.
تعليم التصوير – المصدر blog.123rf
5. حطي من شخصيتك في الصورة
دايمًا حافظي على شخصيتك في أي حاجة بتعمليها حتى في صور الأكل، استخدمي الحاجات اللي حاسة إنها بتعبر عنك وعن أسلوبك وعن ألوانك المفضلة عشان تكوني دايمًا مميزة ومختلفة.
تعليم التصوير – المصدر tuttlecameras
التعليق باستخدام حساب فيس بوك