محتويات المقال
من المشاكل اللي بتعتبر مزعجة لأي حد بتظهر عنده سواء راجل او ست هو موضوع اصفرار الأظافر، النهارده هنتكلم عن أسباب الاصفرار والعلاج كمان. في الحقيقة، إن أسباب الحالة دي متنوعة، منها اللي عضوي بسبب أمراض، وفيه اللي بسبب عادات يومية بتكون السبب في المشكلة دي. علشان كده، لو حسيتي إن فيه حاجة منهم موجودة في حياتك، كده هتعرفي طريقة العلاج الصح هتكون ازاي، فتعالى نشوف سوا.
أسباب اصفرار الأظافر
طلاء الأظافر
لاحظتي قبل كده اصفرار الأظافر بعد استخدام نوع معين من المناكير؟ أو لاحظتي أن الاستخدام الزيادة والمستمر للمناكير ممكن أن يحول لون الأظافر إلى الأصفر؟
هتلاقي ألوان معينة من المناكير ممكن تسبّب تحول لون الأظافر إلى الأصفر، ومش بس كده، لكن استخدام المناكير بشكل مستمر مسبب أساسي لتلون الظفر. حتى إن بعض أنواع مزيلات المناكير بتسبب اصفرار الأظافر، ودي من أكتر أسباب اصفرار الأظافر، ومش بتسبب أي خطر أو مشكلة صحية.
الإصابة بالسكري
الإصابة بمرض السكري بييجي معاها العديد من المضاعفات، ومن بينها اللي بتصيب الأظافر، بالتالي بتسبب زيادة في سماكتها، واصفرارها وضعفها.
عدوى فطرية
العدوى الفطرية من أسباب اصفرار الأظافر اللي عادة ما بتكون ظاهرة أكتر في أظافر القدم مقارنة باليدين. من الممكن إن لون الأظافر الأصفر بيظهر أكثر لما بتتلبس أحذية ضيقة ولفترة طويلة، وده اللي مخلّي الحالة دي ترتبط بالإصابة بمشكلة القدم الرياضي. وبالتالي الإصابة بعدوى فطرية في الأظافر من شأنها أن تسبب زيادة في سماكة الظفر وتشوهه إلى جانب طبعًا تحول لونه إلى الأصفر.
متلازمة الأظافر الصفراء
متلازمة الأظافر الصفراء عبارة عن مرض نادر بيتسبب في تحول لون الأظافر سواء القدمين أو اليدين إلى اللون الأصفر، مع ظهور أعراض مختلفة زي:
- مشاكل في الجهاز التنفسي.
- تورم القدمين.
مشاكل في الكبد
في بعض الحالات، بيكون اصفرار الأظافر ناتج عن وجود مشكلة في الكبد، يعني مثلًا الإصابة بمرض اليرقان بيسبب اصفرار البشرة إلى جانب الأظافر في بعض الأحيان.
سقوط أو انفكاك الظفر
سقوط الظفر (Onycholysis) مشكلة بتصيب الأظافر وبتعني انفكاك الظفر عن مكانه، الأمر اللي بيسبب تحول لونه إلى الأصفر وده بسبب تعرضه للهواء، وفي العديد من الأسباب التي قد تؤدي إلى الحالة دي زي مثلًا:
- إصابة الظفر بضربة ما.
- الصدفية.
- أثر جانبي لتناول أنواع معينة من الأدوية.
الصدفية
في أحيان كتيرة، بيكون اصفرار الأظافر ناتج عن الإصابة بالصدفية. وفي الحالة دي، ممكن تلاحظي زيادة سمك الأظافر بالإضافة إلى ظهور حفر فيها.
مشاكل في الغدة الدرقية
تعد الإصابة بمشاكل في الغدة الدرقية واحدة من أسباب اصفرار الأظافر، وخصوصًا لو الحالة مرتبطة بقصور في الغدة الدرقية، فالمشكلة دي بتسبب زيادة في سمك الظفر نفسه وضعف نموها وترققها.
علاج مشكلة اصفرار الأظافر
من الممكن اتباع شوية طرق ممكن تساعدك في التقليل من خطر تحول لون الأظافر إلى الأصفر زي مثلًا:
- غسل القدمين وتنظيفهما بالصابون والماء بانتظام.
- تجفيف أظافر القدمين كويس جدًا.
- استخدام مقص أو قصافة أظافر نظيفة ومعقمة.
- لبس أحذية تناسب حجم قدميك.
- استخدام طبقة مناكير حامية ومحاولة تجنب الألوان الداكنة لإنها بتزود من مشكلة اصفرار الأظافر.
أعتقد دلوقتي انتي عرفتي إيه إللي ممكن يكون مسبب لك اصفرار الأظافر لو عندك أي شك في جزئية إن السبب مرض عضوي يبقى مهم جدًا ترجعي لطبيب مختص علشان تقدري تحصلي على العلاج الصحيح.
راحة بالي هي منصة لراحة كل أم، انضمي لأكبر وأهم مجتمع دعم للأمهات في مصر هنا. وفري احتياجاتك ومصاريفك اليومية من خلال كارت خصومات راحة بالي هنا. اخسري وزن الحمل والرضاعة وكلي أكل صحي في برنامج رياضي ونظام غذائي متفصل على احتياجاتك هنا.
التعليق باستخدام حساب فيس بوك