الإسهال في كل الأوقات حاجة مش لطيفة أبدًا، لكن في الحمل كمان بتكون أصعب كتير في التعامل. الإسهال وكل صعوبات الهضم المختلفة بتتكرر كتير في الحمل. الأسباب في الإسهال والإمساك وصعوبات الهضم دي ممكن تكون تغير الهرمونات، أو القلق الزايد. ولها علاج بالأعشاب وبشكل طبيعي، لإن الإسهال عند الحامل لو ما اتعالجش ممكن يسبب مشاكل.
أسباب الإسهال عند الحامل
لو دخلتي الحمام أكتر من 3 مرات في يوم واحد وكان البراز طري، يبقى انتي عندك إسهال. ودي حاجة منتشرة في الحمل فمش لازم تقلقي جدًا. والأسباب ممكن تكون متعلقة بالحمل أو لا. الأسباب ممكن تبقى:
- تغير الهرمونات
- القلق الزايد في أول الحمل
- حساسية الطعام اللي ممكن تبدأ في الحمل
- فيروس أو باكتيريا
- ديدان في الأمعاء
- تسمم
- الآثار الجانبية لأدوية
- القولون العصبي
علاج الإسهال للحامل
إذا عرف السبب، بطل العجب. اعرفي الأول إيه السبب اللي ورا الإسهال. قبل ما تدوري على علاج الإسهال، اعرفي هل هو بسبب الحمل ولا من الأسباب اللي مش متعلقة بالحمل.
- لو السبب هو أكل مختلف أكلتيه، ممكن يكون تسمم أو حساسية أكل، وبالتالي فيه بكتيريا أو فيروس، وعليه اشربي ميا وسوائل كتير وهيخلص لوحده.
- لو السبب هو دوا ابتديتي تاخديه مع الحمل، كلمي الدكتور عشان يغيرها.
- لو الإسهال استمر لـ3 أيام، روحي للدكتور.
- بلاش تاكلي من بره البيت، بلاش الأكل المقلي أو المسبك أو المبهر أو الحراق. ما تزوديش اللبن ومنتجاته.
- أهم حاجة إنك ما تاخديش أي دوا للإسهال من نفسك لإنها ممكن تكون مش آمنة ليكي.
- اشربي ميا وسوائل كتير. اشربي عصاير طبيعية عشان تعوضي الفيتامينات والمعادن اللي بتفقديها في الإسهال.
هل الإسهال يسبب الإجهاض؟
الإسهال مش علامة من علامات الإجهاض ولا ممكن يهدد الحمل. لكن لازم تلتزمي بالقواعد اللي فاتت: الميا والسوائل والأكل النضيف. ولو زادت أكتر من 3 أيام، تروحي للدكتور.
راحة بالي هي منصة لراحة كل أم، انضمي لأكبر وأهم مجتمع دعم للأمهات في مصر هنا. وفري احتياجاتك ومصاريفك اليومية من خلال كارت خصومات راحة بالي هنا. اخسري وزن الحمل والرضاعة وكلي أكل صحي في برنامج رياضي ونظام غذائي متفصل على احتياجاتك هنا.
التعليق باستخدام حساب فيس بوك