محتويات المقال
بعض الستات الحوامل بيشتكوا من وجع في الأسنان واللثة، وممكن تكون الحامل أسنانها صفين لولي قبل الحمل وما بتشتكيش من أي ألم أو أعراض غريبة، لو حصلت لك الحالة دي، اتطمني إنتي مش لوحدك، دي حالة بتيجي لكتير من الحوامل، تعالي اتعرفي على أسبابها:
أسباب التهاب ونزيف اللثة في فترة الحمل:
الهرمونات
هرمونات الحمل (الإستروجين والبروجسترون) من وظيفتها إنها بتزيد من تدفق الدم لكل الأغشية المخاطية اللي في الجسم، علشان كده لثتك بتكون حساسة جدًا وممكن تورم وتنزف.
قلة إفراز اللعاب
من مهام اللعاب تنظيف الأسنان واللثة من البكتيريا الموجودة في مادة “البلاك” اللي بتتواجد على الأسنان، ومع الحمل بيقل إفراز اللعاب عند بعض الحوامل، فبيأدي لتراكم “البلاك” وطبعًا بالبكتيريا اللي فيه اللي بتسبب تسوس الأسنان وأمراض اللثة.
التغييرات في اللعاب
عند بعض الحوامل بتتغير درجة حمضية اللعاب وبتزيد، وده ممكن جدًا يأدي لتآكل الأسنان وتسوسها.
تغير النظام الغذائي
ممكن الحامل تميل للأطعمة غير الصحية، زي إنها تزود من السكريات أو تاكل بنسبة أكبر الوجبات السريعة، وده أكيد بيأثر على صحة الأسنان واللثة.
الغثيان الصباحي
واللي الشعور بيه مكتوب على جبين كل حامل حتى لو اختلفت المدة، وغالبًا ما بيوقف عند الإحساس بالقئ بس لكن بيوصل للقيئ المتكرر سواء الصبح بس أو طول اليوم، ومع القيئ بتطلع أحماض المعدة للأسنان واللثة، علشان كده لازم تغسلي فمك كويس جدًا بالمياه العادية أو تغسلي أسنانك بعد ساعة -لأن أحماض المعدة بتأدي لتليين طبقة المينا- بالمعجون والفرشاة.
الأعراض المرافقة لالتهاب ونزيف اللثة أثناء الحمل:
- تورم اللثة والتهابها.
- في بعض الحالات بتوصل للتقرحات.
- احمرار شديد في اللثة.
بس الخبر الحلو إنك مهما تعبتي من آلام الأسنان واللثة في حملك، فده كله مؤقت وهيروح أول لما طفلك يجي للدنيا.
التعليق باستخدام حساب فيس بوك