من المتداول قوله إن الرضاعة مهمتها تغذية الطفل، بس الحقيقة هي بالنسبة للطفل وسيلة لأشياء أخرى غير الشبع. حتى إن فيه أمهات كتير بتقلق يمكن لدرجة الخوف إن مهما هي رضعت فطفلها جعان. وده بيسبب لها شعور غير طبيعي بالإحباط، في الوقت اللي الطفل أصلًا بيتعامل مع الرضاعة على إن لها أهداف تانية بالنسبة له غير بس الشبع. وده اللي هنتكلم فيه النهارده وهنقول لك على أشهر 8 أسباب بتخلّي الطفل يرضع كتير غير الجوع.
عصر الثدي: العصر اليدوي في الرضاعة الطبيعية
طفرة النمو بتخلي الطفل يرضع كتير
يمر الأطفال بمراحل متعددة من النمو السريع اسمها طفرات النمو. ولما بيجي ميعاد واحدة من الطفرات دي، هتلاقي بطبيعة الحال إنهم بيحتاجوا ياكلوا/يرضعوا بشكل أكتر من المعتاد ولفترات أطول. وده علشان يزوّدوا نفسهم بالطاقة اللي محتاجين لها. لو لاقيتي عند طفلك رغبة في تناول الطعام بعد فترة قصيرة من إطعامه آخر مرة، يبقى تقدري تعتبري ده مؤشر رئيسي على أنه بيمر بطفرة في النمو. هتلاقي إنه بقى مزعج أكثر من المعتاد وحتى روتين نومه بيتغير، وغالبًا الأطفال بيناموا أكثر من المعتاد في الفترة دي.
التغذية العنقودية Cluster feeding
التغذية العنقودية والمعروفة برضه باسم مجموعة التغذية bunch feeding، هي عبارة عن لما يرضع طفلك الصغير كذا مرة على مدى كذا ساعة. في أغلب الأحيان، بتحصل التغذية العنقودية في الليل، والرضعات المجمعة دي بتساعد على زيادة مخزون الحليب (لو كنتي بترضعي طبيعي)، وبتغذي نمو طفلك، وبتملأ بطنه قبل النوم.
الحاجة للامتصاص
أحيانًا بيكون الطفل شبعان ولكن ببساطة بيحتاج إلى المص. وفيه فعلًا مصطلح اسمه: المص غير الغذائي non-nutritive sucking واللي ساعتها الأم بتقول ابني عاملني التتينة بتاعته. المص في العموم هو رد فعل غريزي بدائي بيتولد بيه الأطفال. ولو كنتي بترضعي طفلك رضاعة طبيعية، فالمص بينشط رد الفعل المنعكس وبيحفز الثديين على إنتاج المزيد من الحليب. الموضوع ده صحي جدًا طالما أنه مش بيسبب إرهاق أو إزعاج للأم. وفيه خيار تاني وهو السماح لهم باستخدام التتينة بس ما تسيبيش طفلك يمتص زجاجة فارغة لأن ده ممكن يسبب في امتصاص هواء كتير وبالتالي كمية غازات مؤلمة.
عايز اهتمام
فيه أسباب كتيرة ممكن تخلي الطفل يرضع كتير رغم إنه مش جعان زي مثلا يكون تعبان أو حاسس بالوحدة أو بردان أو حران أو حاسس بالملل أو فيه حاجة مش مريحاه زي إنه عايز يغير الحفاضة بتاعته. فلو لسه مخلصة رضاعة طفلك بس لاقيتي إنه عايز برضع تاني رغم شبعه يبقى اعرفي إنه عنده مخاوف تانية حاولي تشوفي هي إيه وعالجيها قبل ما تاخدي خطوة إنك ترضعيه تاني.
محتاج يرتاح
سبب أن الطفل يرضع كتير برضو إن الأطفال أوقات بيستخدموا الرضاعة كوسيلة للاسترخاء بجانب طبعًا حبه لجذب الاهتمام.
التسنين يخلي الطفل يرضع كتير
لو كان طفلك بيعاني من التسنين، يمكن أن يساعد المص والمضغ أحيانًا في تهدئة اللثة الرقيقة. يمكن طفلك عايز الرضاعة بس لأن المص بيساعد في تخفيف آلامه.
ارتجاع حمض الطفل يرضع كتير
بعض الأطفال المصابين بمرض الارتجاع المعدي المريئي (GERD) ممكن يرضعوا بس عشان الامتصاص يغسل ارتجاع المريء. بس للأسف الإفراط في التغذية ممكن يخلي الارتجاع يتفاقم، فلو شكيتي إن ده اللي حاصل، حاولي تستخدمي التيتينة.
قلق الأطفال بيخلي الطفل يرضع كتير
القلق موجود عند الأطفال حقيقي زيهم زي البالغين. أحيانًا بعض الأطفال بيعضوا شفايفهم وكأنهم بيمصوها أو عايزين يرضعوا لإنهم قلقانين. المص والتغذية بيساعدوا بعض الأطفال على الهدوء أو الشعور بالأمان. تقدري تقولي إن هي دي الأسباب العامة لطلب طفلك للرضاعة غير الجوع، وزي ما قلنا هتحتاجي تعرفي إيه سبب الطلب الزايد للرضاعة قبل ما تاخدي خطوة الإرضاع نفسها خصوصا لو طفلك لسة مخلص الرضاعة من وقت قصير.
التعليق باستخدام حساب فيس بوك