محتويات المقال
ليه الناس بتتطلق؟
سؤال يبدو بسيط وسهل، لكن الصراحة إنه إجابته معقدة جدًا وده لإن الناس عادة مش بتقول على سبب الطلاق الحقيقي.. بيكون فيه سبب بنعتبره “القشة التي قصمت ظهر البعير” لكن مش بالضرورة يكون ده السبب الحقيقي ساعات كتير بيكون فيه تراكمات.
في الحقيقة إنه فيه دراسات كتير اتعملت علشان تجاوب على السؤال ده لكن الأسباب بتختلف ساعات من دراسة لدراسة وكمان النسبة المئوية لكل سبب بتختلف..
الطبيبة النفسية ANNE Gold Buscho المتخصصة في شئون الأسرة والطلاق وضحت في مقالها على موقع سايكولوجي توداي مجموعة من الأسباب إللي بتخلي الناس تتطلق تعالوا نشوفها مع بعض..
الأسباب دي مش مرتبة وبتخلف في أهميتها عند كل زوجين وحسب المجتمع..
1-مفيش توافق
ساعات بيكنوا الطرفين كويسيين، كل واحد لوحده، لكن الاتنين مع بعض مش نافعين بسبب إنه قيم كل منهم ورؤيته للحياة مختلفة تماما عن التاني.
2-الأمور المادية
كل واحد فينا عنده علاقة مع الفلوس زي علاقته مع البني آدمين بالظبط.. فيه إللي بيحب يحوّش ويكنز ، فيه إللي عايش بمبدأ “اصرف ما في اجيب ياتيك ما في الغيب”.. فيه إللي بيحب يتبرع كتير .. ساعات بيكون الزوجين مختلفين تماما لدرجة بتخليهم يتخانقوا كل يوم على الفلوس والموضوع بيضرب اللايف ستايل تماما وقد يكون سبب من أسباب الطلاق.
3-قلة التواصل
دايما بنسمع الجملة دي بين الناس إللي قرروا يتطلقوا :” إحنا ما بقيناش عارفين نتكلم مع بعض” والجملة دي إشارة قوية لقلة التواصل إللي أكيد هيتبعها الخناق المستمر أو الخرس الزوجي.
4-الخناق والصراع المستمر
الخناق والصراعات المستمرة سام جدًا لأي علاقة لإنه بيدمرها.. عادة الناس قبل مرحلة الطلاق بيتخانقوا كتير على أسباب مختلفة وساعات بيتخانقوا على نفس الأسباب هي هي كل يوم، ولو ما عرفوش يوصلوا لحلول وسط في مشاكلهم ممكن الموضوع يوصل للطلاق.
5-الخيانة الزوجية
واحدة من أبشع وأهم الأسباب إللي بتسبب الإنفصال أو الطلاق. والحقيقة إنه فيه ناس كتير بتستحمل علشان العيال خصوصا الستات في مجتمعنا الشرقي، لكن فيه ستات كتير مش بتوافق على الخيانة الزوجية وبتطلب الطلاق.
6-قلة أو انعدام العلاقة الحميمة
في مجتمعتانا العربية، مشاكل العلاقة الحميمة من أكتر الأسباب الخفية للانفصال.. الأسباب المسكوت عنها، وعادة الناس بتتحجج بأسباب تانية علشان مش بيتكلموا في الموضوع ده.. ومشاكل الجنس تشمل انعدام الانجذاب بين الشريكين أو وجود مشكلات عضوية تمنع العملية الجنسية إنها تتم بشكل طبيعي او قلة عدد مرات الجنس نتيجة لإنه فيه طرف عنده قلة شديدة في الرغبة الجنسية أو عنده علاقات تانية خارج إطار الجواز أو مدمن للاباحيات.
7-الزواج في سن مبكر
المشكلة مش في الجواز المبكر في حد ذاته، فيه ناس كتير بتتجوز بدري وبتنجح المشكلة بتحصل لما طرف من الاتنين ينضج بسرعة ويكون شخصية جديدة ناضجة مختلفة تماما عن الشخصية المراهقة إللي اختارت الطرف التاني ساعة الجواز لما حصل بدري.
8-الإساءة والاستغلال
الإسادة دي تشمل (العنف- الشتيمة- الضرب – الإهانة ) وعادة بيكون فيه في العلاقة طرف واحد هو إللي بيتعرض للإساءات وطرف جاني.. والطرف الضحية بيستسلم لفترة ولكن بعد مالموضوع بيبقى غير محتمل وبيبدأ يطول الأبناء بيطلب الطرف الضحية الانفضال لإنه ما بقاش قادر يستحمل.
9-الإدمان
وده مش إدمان المخدرات بس، ممكن يكون إدمان الجنس أو الإباحيات أو القمار .. عادة علاقة الشخص بإدمانه بتكون أقوى من علاقته بشريكه ولو رفض يتعالج بيكون ده سبب قوي لطلب الطلاق.
10-التوقعات غير المنطقية
الموضوع ده برضه من الموضوعات الخفية إللي بتسبب الطلاق بيحصل لما كل طرف يبقى متوقع من شريكة حاجات غير منطقية.. بتحصل لما الراجل يبقى فاكر مراته هتلعب دور أمه أو الست تبقى فاكرة إنه الزوج هيلعب دول أبوها على سبيل المثال.
11-الصراع مع أهل الشريك
التدخل الشديد من أهل الزوج او الزوجة في حياة الزوجين أو تحكمهم الشديد ممكن يعمل مشاكل كتير بتؤدي للطلاق.
12-زيادة الوزن
مش زيادة الوزن في حد ذاتها هي المشكلة.. المشكلة إنه زيادة الوزن الشديدة إللي بتحصل ساعات بتخلي طرف يبطل يشوف الطرف التاني جذاب او شخص تاني غير إللي اتعود عليه فمع الوقت ممكن يبدأ يفقد جاذبيته الجنسية في عين شريكه فتحصل مشاكل في الجنس وكل الفيلم ده ممكن يخلي طرف يطلب الطلاق.
13-الشريك اتغير (اختلاف الهوية)
زي مثلا واحدة كانت بتحب واحد علشان ناجح قوي وفجأة بعد الجواز ساب الشغل وقرر يقعد في البيت وما يشتغلش وتحول لشخصية تانية تماما.. أو واحد اتجوزو واحدة علشان ناجحة ونشيطة وبتحب الحياة وبعد الخلفة قررت تسيب الشغل وفقدت هواياتاها وأصحابها وبقت شخص تاني خالص غير إللي كان بيعجبه في الأول.. ساعتها الشخص بيحس إنه مع شخص مش عارفه وممكن ما يعرفش يستوعب التغيير الجديد فتبدأ المشاكل ويقرروا الانفصال.
14-ما بقاش فيه مجهود بيتبذل في العلاقة
ساعات الطرفين بيبطلوا يعملوا مجهود علشان يرضوا بعض وبيكتفوا بس بمراعاة طلبات البيت والأولاد لكن مفيش أي حاجة بتتعمل مخصوص علشان خاطر الطرف التاني بيحبها.. يعني مممكن نلخص المشكلة دي في إنه العلاقة ما بقتش أولوية وبقى فيه طرف او حتى الطرفين ما بقاش عندهم استعداد يعملوا حاجة علشان بعض.
15-مرض نفسي أو جسدي أو إعاقة
ودي نقطة حزينة للاسف ساعات بيحصل مرض نفسي او مرض عضوي أو إعاقة بتخلي أحد الطرفين او كلاهما مش قادرين يستمروا في العلاقة ومش شرط إنه الطرف السليم هو إللي يطلب الطلاق ويستندل.. ساعات الطرف إللي عنده مشكله هو إللي بيرفض إحساس الشفقة من شريكة وبيرفض يكون عبء وبيصمم على الانفصال.
وفي النهاية، زي ما قولنا أسباب الانفصال بتختلف من الشخص للتاني.. لكن الأكيد إنه العلاج النفسي الزواجي ممكن ينقذ جوازات كتير من الفشل وممكن كمان يساعد المنفصلين يقدروا يتغلبوا على أسباب الانفصال ويرجعوا لبعض من تاني.
التعليق باستخدام حساب فيس بوك