الحمل بيحصل فالدورة الشهرية بتقف، وبتستعد السيدة لفترة زمنية مفيهاش أي نزول للدم بس لما بتشوف الدم بيحصل لها هلع وخوف شديد متوقع طبعا، وفي المقال ده هنشرح هو إيه النزيف المهبلي في الحمل وأهم أسبابه:
ممكن نقسم النزيف المهبلي لقسمين:
- نزيف الشهور الثلاثة الأولى.
- نزيف ما بعد الشهور التلاتة الأولى إلى آخر الحمل.
نزيف الثلاث شهور الأولى:
حوالي 10 % من السيدات الحوامل بيحصل لهم نزيف في الشهور الأولى من الحمل وفي الغالب معظمهم بيكملوا الحمل بسلام وده ممكن يحصل للأسباب دي:
- الحمل خارج الرحم:
وفية بتتزرع البويضة بره الرحم وفي أغلب الأحيان بيكون ده في قناة فالوب وعادة بيصاحب النزيف الألم في واحد من جانبي البطن السفلى وفي حالة الشك فيه بيتم عمل تحليل حمل كمي وموجات فوق صوتية وفي حالة التأكد من التشخيص بيتم علاج بعض الحلات بالدواء وحالات تانية بالمنظار وحالات تالتة بالتدخل الجراحي .
- الحمل العنقودي:
بيحتوي الرحم في الحالة دي على أنسجة غير طبيعية سواء كان ده مع وجود الجنين أو في غيابه وبتحتاج المريضة إلى عملية تفريغ ومتابعة دقيقة لبعض الحالات.
- الإجهاض:
من أكتر الأسباب الموجودة للنزيف أثناء الحمل وممكن يحصل لحد الأسبوع ال28 وممكن يبقى معاه أعراض تانية زي تشنجات أسفل البطن.
أنواعه كتير منها:الإجهاض المنذر، والإجهاض المتروك، والإجهاض الغير كامل، والإجهاض الكامل .
وعلاجه بيكون على حسب نوعه، ففي حالات الإجهاض المنذر وهو حدوث نزيف مع انغلاق عنق الرحم ووجود نبض في الجنين، بالموجات فوق صوتية بيتم اعطاء مثبتات الحمل، والنصيحة بالراحة للسيدة أما في حالات الإجهاض المتروك وغير المكتمل بيتم عمل عمليات كحت وتفريغ.
أسباب تانية منها:
- تغيرات عنق الرحم أثناء الحمل.
- العلاقة الزوجية.
- العدوى.
الفرق بين طلق الولادة الحقيقي والطلق الكاذب
نزف ما بعد الـ 3 شهور في الحمل:
ممكن الإجهاض يحصل لحد الأسبوع ال28 بس في أغلب الأحيان بيكون النزيف في الوقت ده مرتبط بالمشيمة ومن أسبابه:
- وجود تجمع دموي ورا المشيمة نتيجة للانفصال المبكريعني بيحصل قبل ولادة الجنين وبيكون في الحالة دي ألم في البطن وبيتم العلاج على حسب كمية الدم والحالة العامة للمريضة مع وضع حالة الجنين في الاعتبار.
- المشيمة المنزاحة يعني وجود المشيمة في الجزء الأسفل من الرحم وهي درجات متعددة وبتحتاج إلى متابعة وفي بعض الأحيان تتطلب الولادة القيصرية.
- الأوعية المنزاحة وخطورة الحالة دي إن النزف بيكون من دم الجنين وممكن يؤدي – بعد الشر – لوفاته.
- انفجار الرحم وفي أغلب الأحوال ده ممكن يحصل نتيجة وجود جروح قديمة في الرحم زي قيصريات سابقة واستئصال أورام ليفية.
- أسباب تانية زي جروح المهبل وعنق الرحم.
- الولادة المبكرة ممكن تؤدي لخروج بعض الدم المصحوب بالمخاط وده بيدل على أن عنق الرحم بدأ في الفتح استعدادًا للولادة.
سيدتي لازم تعرفي إن نزول الدم أثناء الحمل هو من الأعراض اللي لازم فيها طلب الاستشارة الطبية العاجلة عشان يقدر الدكتور يعمل اللازم حفاظا على صحتك وحفاظًا على صحة جنينك.
جنبنا الله وإياكم كل سوء.
أسباب التهاب ونزيف اللثة خلال فترة الحمل
المصادر:
مقال لـ د.خالد إبراهيم استشاري أمراض النساء والولادة.
التعليق باستخدام حساب فيس بوك