فترة الحمل والولادة بتؤدي إلى تغيرات هرمونية مختلفة في جسم المرأة، والموضوع ده بيختلف من واحدة للتانية. فيه بعض النساء بتحس بانخفاض الرغبة الجنسية بشكل واضح وممكن فعليًا يأثر بالسلب على حياتها الزوجية. فإيه هي أسباب انخفاض الرغبة الجنسية لدى المرأة بعد الولادة؟ وهل فيه حلول؟
أسباب انخفاض الرغبة الجنسية للمرأة بعد الولادة
ممكن يحصل فقدان الرغبة الجنسية لعدد من الأسباب، منها:
الحالة النفسية السيئة
في المرحلة دي بتحس المرأة بقلق وتوتر نتيجة الآلام اللي مرت بها، ده غير الشعور إنها بتمر بتجربة جديدة وبالتالي فيه مهام شاقة وده من أسباب انخفاض الرغبة الجنسية عند المرأة بعد الولادة. اقري أكتر عن اكتئاب ما بعد الولادة هنا.
إنشغالها بالطفل الجديد
طبيعي إن الطفل الرضيع ياخد كل وقت الأم، وخصوصًا خلال السنة الأولى من عمره لأنه بيحتاج إلى رعاية خاصة طوال الوقت. وبالرغم من مساعدة الآخرين اللي ممكن تتلاقاها الأم، إلا أنه لا يمكن لأحد غيرها يقوم بدورها، فهي اللي بتتولى رضاعة الطفل وتغيير الحفاض ونومه وغيرها من الأمور الخاصة بيه.
تغيرات جسدية
بتعاني المرأة بعد الولادة من الام وتورمات في منطقة المهبل وده في حالة الولادة الطبيعية،وفي حالة الولادة القيصرية شعور بالام من جرح القيصرية وصعوبة الحركة، بالإضافة إلى نزول الدماء لفترة طويلة، وكل ده من أسباب انخفاض الرغبة الجنسية لدى المرأة بعد الولادة.
غير إن تغيير شكل لجسم زي: بروز البطن، أو زيادة الوزن عموما بيخلي المرأة تحس بالضيق وده بيخليها تتهرب من اللقاء الجنسي.
اعرفي أسباب خوف بعض الستات من الجماع بعد الولادة الطبيعية
الرضاعة الطبيعية
سبب من أسبابانخفاض الرغبة الجنسية للمرأة بعد الولادة هي الرضاعة، لأن إفراز هرمون الحليب خلال الرضاعة بيمنع من إنتاج هرمون الأستروجين والتستوستيرون، وبالتالي المرأة مش بتحس بالحاجة إلى الجنس زي ما كانت قبل كده.
الشعور بآلام أثناء الجماع
بسبب الألم اللي ممكن تحس بيه المرأة في أول جماع بعد الولادة واللي بيكون سببه جفاف المهبل، واحدة من الأسباب اللي بتخليها تتجنب الجماع، والسبب وراء ده بيرجع إلى انخفاض هرمون الأستروجين، وبالتالي بتنقص الإفرازات المهبلية الطبيعية اللي بتساعد في ممارسة العلاقة الجنسية دون الشعور بألم.
وسائل منع الحمل
بعض أنواع وسائل منع الحمل قد تكون من أسباب انخفاض الرغبة الجنسية عند المرأة بعد الولادة، ةعلشان كدة هتحتاجي استشارة الطبيب حول وسائل منع الحمل الأقل ضررًا على الصحة الجنسية.
قلة النوم
حسب دراسة إتعملت سنة 2015، إتضح أن كل ساعة نوم إضافية تقدر تزود من رغبتك الجنسية بنسبة 14%.
بس زي ما كلنا عارفين النوم في الشهور الأولى بعد الولادة بيعتبر حلم الأمهات، ضيفي ده كله اضطرابات النوم زي الأرق اللي بيصيبك في المرحلة دي، علشان كدة قلة النوم بيعتبر وأحد من أشهر أسباب قلة الرغبة بعد الولادة.
الإرهاق
مع زيادة الأعباء والمهام الجديدة، بيزيد مستوى الضغط الواقع عليك، فيحرمك الإرهاق المتواصل وفاهية التفكير في العلاقة الحميمة أو الميل إليها.
الاستياء من الزوج
ممكن يكون سبب ضعف الرغبة بعد الولادة هو استيائك أو ضيقك من زوجك، نتيجة عدم مشاركته في مسؤوليتكم الجديدة، وتهربه من البيت طوال الوقت، وفيه بعض الأزواج بيتحول لعبء إضافي بمطالبته المستمرة من زوجته عدم التقصير في البيت، دون اي تقدير لمجهودها أو رحمة بيها.
فقدان الثقة بنفسك
مع اختلاف الوزن وتغير هيئة الجسم، ممكن تقعي فريسة لانعدام الثقة بالنفس وتفتكري إن التغيرات دي هتسبب إزعاج لزوجك، فتحسي بالحرج، وتتجنبي العلاقة.
الخوف من حدوث حمل جديد
بعد تجربة قصيرة مع الأمومة، تبدأ مخاوفك من فكرة حدوث حمل تاني بعد الولادة بفترة قصيرة، ومع انتشار قصص حدوث حمل غير مخطط له في الشهور الأولى بعد الولادة في كل الجروبات النسائية، الموضوع ممكن يتطور لدرجة الفوبيا، ويخليكي تتهربي من العلاقة أغلب الوقت.
الخوف من العلاقة الحميمة
العلاقة الحميمة مش عملية جسدية بس وإنما عقلية كمان، فالخوف والتردد بيأثروا جدا في الاندماج في أثناء
ممارسة العلاقة، وبيمنعوا دون الوصول إلى الإشباع، علشان كدة لو كنت بتخافي من العلاقة خاصة خصوصا المرة الأولى بعد الولادة، هتتأثر رغبتك بالتأكيد وهتبتعدي عن المحاولة مرة تانية.
تغير الهرمونات
تؤثرالهرمونات بدرجة كبيرة في انخفاض الرغبة بعد الولادة، لأن اللي بيحصل:
- بيقل مستوى هرمون الإستروجين بعد الولادة، وهو المسؤول عن الرغبة الجنسية.
- بيزيد هرمون البرولاكتين لتحفيز إنتاج اللبن في الرضاعة الطبيعية، وهو بيقلل مستوى الإستروجين.
- يفرز جسمك هرمون الأوكسيتوسين المعروف بهرمون الحب، وهو اللي بيقوي الرابطة بينك وبين طفلك،
فيخليكي بتحبيتحضني طفلك وتكتفي بيه أكثر من زوجك.
أسباب نفسية
قد يرجع ضعف الرغبة بعد الولادة إلى تأثر حالتك النفسية، بسبب مرورك بواحد من التجارب دي:
- اكتئاب ما بعد الولادة.
- قلق الأمومة.
- تجربة ولادة صادمة (Traumatic Birth).
بمرور الوقت بتستقر مستويات الهرمونات في جسمك، وبتتعودي على مسؤوليات طفلك الجديدة عليكي، وممكن يتحسن نوم طفلك وبالتالي نومك، ومن المتوقع انك تستعيدي رغبتك الجنسية من تاني بشكل تدريجي.
علاج انخفاض الرغبة الجنسية لدى المرأة بعد الولادة
بعد ما عرفنا أسباب انخفاض الرغبة الجنسية عند المرأة بعد الولادة نقدر نتكلم عن إمكانية عودة الرغبة الجنسية تاني بشكل تدريجي عن طريق القيام بالخطوات دي:
- تجنبي التفكير السلبي والي بيسبب العصبية والتوتر وبخليكي تتهربي من ممارسة العلاقة.
- مساعدة الزوج للزوجة علشان متحسش إن كل الأعباء بتقععليها لوحدها، وبالتالي هتهدى بعدما تقل الضغوط عليها.
- فقدان الوزن المكتسب خلال الحمل، وغنك تمشي على نظام صحي حسب إرشادات طبيب مختص، وده علشان تقدري تسترجعي ثقتك في نفسك وبالتالي رغبتك الجنسية من التاني.
- استخدامي مرطبات المهبل ولكن بعد استشارة الطبيب علشان تساعد في تقليل آلم الجماع اللي بتسبب انخفاض الرغبة.
- شفط حليب الثدي، ده يساعد في عدم تسربه بشكل كبير، ووقتها مش هتحسي بإحراج في ممارسة العلاقة .
غالبا تستعيد المرأة رغبتها الجنسية بعد فطام الطفل ولكن ده مش معناه إنها تفطم بدري لأن حليب الرضاعة مهم جدا لصحة الطفل، ولو حسيتي إن الوضع بعد الفطا ما اتحسنش هتحتاجي وقتها ترجعي لطبيب مختص علشان تعملي تحاليل للهرمونات لمعرفة أسباب استمرار انخفاض الرغبة الجنسبة عندك.
دلوقتي تقدري تستوعبي إن اللي بتمري بيه ده طبيعي وتتعاملي معاه بهدوء وكمان تشريحه لزوجك علشان بتفهم ويقدم لك الدعم المطلوب.
راحة بالي هي منصة لراحة كل أم، انضمي لأكبر وأهم مجتمع دعم للأمهات في مصر هنا. وفري احتياجاتك ومصاريفك اليومية من خلال كارت خصومات راحة بالي هنا. اخسري وزن الحمل والرضاعة وكلي أكل صحي في برنامج رياضي ونظام غذائي متفصل على احتياجاتك هنا.
التعليق باستخدام حساب فيس بوك