بكاء المرأة بعد العلاقة الحميمة شيء عادي وطبيعي لكن لما بيحصل، بيكون فيه استغراب كبير من الزوج وأوقات من الزوجة نفسها لإنها ساعات بتكون مش عارفة هي بتعيط ليه. في المقال ده، هنقول لك أسباب البكاء بعد العلاقة الزوجية، عشان نحل اللغز ده، وهنقول لك ازاي تتعاملي مع البكاء بعد الجماع بالتفصيل.
أسباب جسدية للبكاء بعد العلاقة الجنسية
- رد فعل بيولوجي:
الهرمونات اللي بتندفع جدًا في العلاقة الحميمة، أوقات المخ ما بيتخض من اندفاع الهرمونات الكبير ده، فبيكون رد الفعل هو العياط عشان يهدّي المخ من الاندفاع ده.
- ألم أثناء العلاقة الحميمة:
ممكن يكون السبب هو ألم في المهبل أثر على العلاقة الحميمة وعلى استمتاعك بيها. لو المهبل مش رطب كفاية، أو درجة الاستثارة عندك مش عالية، ففيه احتمالية كبيرة إنك تحسي بألم عند الإيلاج وأثناء العلاقة الحميمة. كمان لو فيه أي التهاب في المهبل، هيكون مؤلم جدًا وبالتالي هتكوني عرضة للعياط غصب عنك من الألم أثناء أو بعد العلاقة الحميمة. بانصحك في الحالة دي، توقفي تمامًا العلاقة وتقولي لجوزك إنك مش هتقدري تكملي.
اقري هنا أكتر عن الشعور بالألم أثناء العلاقة الزوجية
أسباب نفسية للبكاء بعد الجماع
- التوتر والاكتئاب
بكاء المرأة بعد العلاقة الحميمة طبيعي لو انتي مريضة توتر anxiety أو مريضة اكتئاب، الوقت ده بنكون فيه في أكتر حالاتنا النفسية هشاشة، وعشان كده، لو فيه أي مشكلة نفسية، تأثيرها هيبان في الوقت ده.
- عدم الرغبة
لو العلاقة الحميمة ما كانتش بإرادتك، طبيعي جدًا تكوني بتعيطي أثناء العلاقة وبعدها. لو رفضتي العلاقة وجوزك أجبرك عليها، سواءً جسديًا أو ابتزك عاطفيًا عشان تعملي معاه العلاقة، طبيعي ما تكونيش مبسوطة وطبيعي جدًا يكون فيه بكاء.
- تذكر حاجة مؤلمة
لو اتعرضتي للتحرش أو أي نوع من الاعتداءات الجنسية في أي مرحلة في حياتك، ممكن الزوج غصب عنه وانتم مع بعض، يعمل حاجة تستحث الذكرى دي، وبالتالي هتلاقي رد فعل جسدي برفض العلاقة حتى لو في نصها، وببكاء.
- اتبسطتي قوي
غريبة، صح؟ لكن الحقيقة إنها مش غريبة خالص. أوقات كتير ما بنعرفش نعبّر عن مشاعرنا بشكل “منطقي”، وبنلاقي نفسنا من كتر الانبساط عينينا بتدمع ومش عارفين نقول إيه، “أكاد من فرط الجمال، أذوب” دي حقيقة!
- الإحساس بالذنب
وده مش مرتبط بالعلاقة غير الشرعية خالص، حتى المتزوجات بيكون عندهم ساعات إحساس بإنهم بيعملوا حاجة غلط وقت العلاقة الحميمة. ونقس الإحساس ده بيكون ساعات السبب في حالة التشنج المهبلي اللي بتصيب بعض الستات نتيجة للتنشئة الصارمة.
تعملي إيه لو عيطتي بعد العلاقة الحميمة؟
اسألي نفسك إيه السبب، لو السبب ألم عضوي، لازم تتعاملي مع المشكلة الأساسية المسببة للألم، حللي وتابعي حالة مهبلك دايمًا. لو السبب مش ألم، فيه مجموعة أسئلة ممكن تساعدك تعرفي لو فيه مشكلة وتحلّيها:
- هل أنا دمعت؟ ولا عيطت عياط كتير؟
لو انتي دمعتي بس، ممكن جدًا يكون ده رد فعل الجسم البيولوجي وممكن يكون انبساط. لكن لو عياط أو بكاء شديد، من الأفضل تعرفي انتي ليه عيطتي؟ هل انتي مكتئبة؟ هل فيه حاجات مؤثرة على العلاقة؟ هل العلاقة كانت غصب عنك؟ هل العلاقة فتحت تروما أو صدمة نفسية قديمة؟ ممكن تحتاجي معالج نفسي يساعدك في الحالة دي.
- هو أنا كنت بافكر في إيه؟
وقت ما ابتدا البكاء، يا ترى كنتي بتفكري في إيه أو إيه الحاجة اللي جات في راسك؟ وهل الحاجة دي كانت كويسة ولا وحشة؟
وهنا فيه خطوات لازم تاخديها وانتي بتفكري في أسباب البكاء:
- خدي وقتك
مش لازم تلاقي إجابات الأسئلة اللي فاتت دي كلها في نفس الساعة ولا حتى في نفس اليوم. إدي عقلك وجسمك فرصة للراحة والهدوء وبعدين فكري.
- كلمي جوزك
لو السبب كان أي شيء له علاقة بعلاقتكم برا العلاقة الحميمة، لازم تحلوا المشكلة دي لإن وجودها هيفضل مؤثر.
- كلميه عن الجنس
كل إنسانة (وكل إنسان) في الدنيا لها تفضيلات معينة ولها كمان حاجات ما بتحبهاش في العلاقة الحميمة. تفضيلاتك والحاجات اللي ما بتحبيهاش والحاجات اللي بتقرفي منها كمان لازم تكوني قايلة عليهم لجوزك لإن مهم جدًا يكون عارفهم!
أتمنى لك علاقة حميمة هادية وسعيدة.
راحة بالي هي منصة لراحة كل أم، انضمي لأكبر وأهم مجتمع دعم للأمهات في مصر هنا. وفري احتياجاتك ومصاريفك اليومية من خلال كارت خصومات راحة بالي هنا. اخسري وزن الحمل والرضاعة وكلي أكل صحي في برنامج رياضي ونظام غذائي متفصل على احتياجاتك هنا.
التعليق باستخدام حساب فيس بوك