محتويات المقال
أجمل حاجة تقدري تبدأي بيها يومك كأم هي ضحكة البيبي بتاعك، وتأخر التسنين عنده من الحاجات اللي بتشغل بال أمهات كتير مننا وبيبدؤوا يحتاروا بين الآراء في موضوع تأخر التسنين عند الأطفال: اللي يقول لهم عادي والموضوع مش مستاهل، واللي يقول لهم أكيد فيه مشكلة ولازم نروح لدكتور بسرعة، طيب امتى المفروض ياخدوا رأي أخصائي أسنان أطفال؟ أو السؤال الأصح .. متى يبدأ التسنين عند الاطفال؟ .. وما هي أفضل طرق علاج تأخر التسنين عند الأطفال؟
في المقال ده، لجأنا للمتخصصين عشان نساعدك تفهمي أكتر عن فترة التسنين وعن أسباب تأخيرها عند الأطفال. (ممكن تشوفي هنا علامات وأعراض التسنين عند الأطفال)
سألنا الدكتور أحمد عصام (أخصائي طب أسنان الأطفال وعضو الجمعية المصرية لطب أسنان الأطفال وذوي الاحتياجات الخاصة) عن أهم أسباب تأخر التسنين عند الأطفال وطرق علاجها.
دكتور أحمد قال لنا أن مرحلة التسنين عند الأطفال بتتقسم لمرحلتين:
- مرحلة التسنين الأولى: ظهور الأسنان البنية واللي بتبدأ من عمر 6 شهور، وبتستمر الأسنان في الظهور حتى نهاية السنة الثانية من العمر.
- مرحلة التسنين الثانية: ظهور الأسنان الدائمة ودي بتبدأ بعد تساقط الأسنان البنية، بعد عمر 6 سنين.
ونصح الأم إن مفيش داعي للقلق لو تأخر ظهور أسنان الطفل لغاية عمر سنة وشهرين، لكن لو الطفل تأخر في التسنين بعد السن ده، فالأم هتحتاج لاستشارة أخصائي أسنان أطفال وهيقوم بعمل آشعة على فك الطفل عشان يتأكد من وجود الأسنان في مكانها داخل فك الطفل، وإن مفيش مشاكل تمنع ظهور الأسنان.
سألنا دكتور أحمد عن أسباب تأخر التسنين عند بعض الأطفال، قال لنا أن تسنين الأطفال بيختلف طبيعي بسبب الفروق الفردية بين الأطفال وإن فيه أسباب طبية مهمة أبرزها الأسباب اللي هنكلمكم عنها. (هنا 6 نصائح لتخفيف آلام تسنين الأطفال)
أسباب تأخر التسنين عند الأطفال
العوامل الوراثية
أوقات كتير بيكون تأخر ظهور الأسنان عند الطفل بسبب أن الأب أو الأم عانى من نفس المشكلة، وفي الحالة دي مفيش قلق خالص لأن الأسنان هتظهر في معادها الوراثي.
سوء التغذية
بيضيف دكتور أحمد عصام إن سوء التغذية من ضمن أسباب تأخر التسنين، إما بسبب عدم وجود العناصر الغذائية الكاملة اللي بيحتاجها البيبي أو بسبب نقص كمية الطعام.
مشاكل الغدة الدرقية
وبيقول لنا دكتور أحمد إن فيه سبب تالت ورا تأخر التسنين وهو وجود قصور في الغدة الدرقية واللي بيسبب خلل في وظيفتها وإفرازاتها وده بيسبب اضطرابات في النمو ومن بينها تأخر التسنين. وده أمر نادر الحدوث ومش بيكون تأخر التسنين هو العرض الوحيد، لكن بيكون فيه بطء تطور الطفل بشكل عام زي تأخر في المشي.
نقص فيتامين (د)
وأخيرًا بيضيف دكتور أحمد إن تأخر التسنين ممكن يكون بسبب نقص فيتامين (د) في جسم الطفل.
طرق علاج تأخر التسنين عند الأطفال
- دكتور أحمد بيقول إن في الحالات ده وفي حالة تأخير التسنين عن السن الطبيعي، لازم نعمل فحوصات لقياس مستوى الكالسيوم وفيتامين “د”، لتحديد سبب المشكلة وعلاجها عن طريق طبيب أسنان أطفال متخصص.
- عمل فحوصات للتأكد من عدم وجود أسباب مرضية كقصور الغدة الدرقية.
- من أهم الضروري في علاج تأخر التسنين .. أن يتعرض الطفل بصفة يومية لآشعة الشمس في فترات النهار.
وفي النهاية بينصح دكتور أحمد بأهمية المتابعة المستمرة مع طبيب الأطفال من وقت الولادة لفحص الطفل والتأكد من نموه بشكل سليم، ويؤكد إن تغذية الحامل بشكل سليم بتنعكس على أسنان طفلها لأن براعم الأسنان الصغيرة بتتكون تحت اللثة قبل الولادة ونبه على ضرورة حصول الأم على كمية كافية من الكالسيوم قبل وبعد الولادة لضمان نموه بشكل سليم.
التعليق باستخدام حساب فيس بوك