محتويات المقال
تأخر المشي عند الأطفال من الظواهر اللي بتقلق الأمهات، مجرد لما الأم تحس إن الطفل مش زي أقرانه في الحركة والآداء بتبدأ تبحث عن أسباب تاخر المشى عند الاطفال، وهل تأخر المشي عند الأطفال بسبب الخوف ولا مشاكل في الأعصاب، الخوف بيكون أكبر لو تأخر المشي بعد السنتين. بعد لما الأم بتعرف إذا كان كان التأخر طبيعي أو لا، بتبدأ رحلة تانية تدور فيها على علاج تأخر المشي عند الأطفال، خاصة لو كان المشي غير متوازن.
اقرأي أيضا: أسباب تأخر التسنين عند الأطفال؟
تجربتي مع تأخر طفلي بالمشي
خلال السنة الأولى من عمر طفلي كنت متشوقة جدا إني أوصل للمرحلة اللي أشوفه فيها بيمشي، وكنت بتمنى أقدر أسجلها بالكاميرا، ولأني كنت لأول مرة كنت بربط بين الحبو والمشي، ومتصورة إن الطفل لازم يحبي الأول وبعدين يمشي، لكن اللي حصل إن عدت أول سنة من عمر ابني بدون ما يمشي أو يحبي وده كان عاملي رعب شديد جدا وكنت بسأل نفسي هيمشي إمتى؟
قرأت كتير عن الموضوع واكتشفت مع الحبو مش شرط يكون مقدمة للمشي وده اللي حصل مع ابني، واللي كان حركي جدا لدرجة إنه مكنش عنه صبر يحبي فقرر يمشي على طول ولأنها خطوة صعبة اتأخرت لعمر سنة وشهرين، اتعلمت خلالها إني مستعجلش المشي طالما طفلي علامات النمو عنده طبيعي في الطول والوزن والباقي المؤشرات التانية.
اقرأي أيضا:تأخر الكلام عند الأطفال .. أسبابه وطرق علاجه
السن الطبيعي لبدأ المشي عند الأطفال
سواء طفلة حبى أو ماحباش المفروض تتوقعي إنه يبدأ يمشي من عمر8 شهور لسنة، ممكن يتأخر عن المعاد ده شوية، والمشي هنا بنقصد بيه الوقوف ومحاولة مد خطوة لوحده بدون ما يسند على كنبة أو طرابيزة، لكن محاولات الوقوف وإنه يسند ويحاول ده مؤشر جيد يخليكي ماتخافيش، حتى لو اتأخر شوية بعد السنة شهر أو اتنين ولحد 6 شهور، مفيش مشكلة مادام بيحاول، لأن كل طفل بيختلف عن التاني وإنتي أكتر واحدة تقدري تعرفي هل طفلك طبيعي والتأخير عنده عادي ولا حاسة إن فيه مشكلة.
أسباب تأخر الحبو والمشي عند الأطفال
أيا كان السبب فانتي محتاجة تتعاملي بهدوء شديد جدا مع الوقف عشان تتصرفي صح وماتسببيش هلع لطفلك:
- أسباب غير مرضية
- زيادة وزن الطفل
- الحبو لأن الطفل اللي بيحبي بيحس بالإنجاز فبيكمل ومش بيفكر يمشي بسرعة
- غياب الدافع وده عامل نفسي يعني مفيش أطفال حولين إبنك يشجعوه أو العكس موجودين لكن بيتريقوا عليه ويحبطوه لما يقع يضحكوا عليه
- أسباب مرضية
- وجود خلل في العظام أو الجهاز العصبي
- صغر حجم الدماغ نتيجة التحام وصلات الجمجمة قبل سن 24 شهرا
- نقص التغذية وخاصة نقص فيتامين د وده بيظهر في صورة تقوص الأرجل وكبر حجم الرأس وتشوه بالقفص الصدرى، وتأخر فى المشى.
- مشاكل من وقت الولادة زي خلع رأس عظمة الفخذ أو التواء داخلى لمشط الرجل
- إصابة الأم بأمراض معدية زي التوكسوبلازما “مرض القطط” أو فيروس السيتوميجالو وده بيؤدى للشلل الدماغى وعدم القدرة على المشى نتيجة لتأثر أعصاب الأرجل وممكن توصل لاستسقاء الدماغ لو ماتمش العلاج بدري.
- إصابة الطفل بالأمراض المعدية زي شلل الأطفال أو الالتهاب السحائى.
- إصابة الطفل بمرض في العضلات سواء كانت وراثية وخلقية ودي بتظهر من لحظة الولادة في صورة صعوبة فى البلع وارتخاء الجفون وصعوبة فى المشى.
تأخر المشي بعد السنتين
لو طفلك مامشيش لحد سن سنة ونص فده مقبول لكن مش معتاد، لذلك محتاجة تطمني إنه معندهوش واحدة من المشاكل دي واللي بتكون سبب في تأخر المشي لحد السنتين:
- الرجلين المنحنية عند الأطفال: مفيش أم تقريبا مش بتقول إن طفلها رجله متنية وتفضل الأمهات تصور رجلين البيبيهات وتسأل الدكاترة هو ده طبيعي؟ في الواقع هو طبيعي والرجلين بتتعدل من نفسها على سن السنتين، كمان طبيعي الأطفال الصغيرين يمشوا بالجنب ومايتقدموش لقدام زي الكبار، وده بيخلي الرجلين متنية أكتر لكن لو فضلت الرجلين متنية لبعد السنتين وركبتين الطفل داخلين لجوه فانتي محتاجة تراجعي طبيب.
- الأصابع المنحنية للداخل: لو صوابع طفلك متنية لجوه، فده طبيعي لحد سن السنتين برضو، ظاهرة عادية اسمها انحناء القدم نحو الداخل لكن لو استمرت بعد سن السنتين فاحنا هنا بنعاني من مشكلة في عظمة الفخذ أو عظام الساق أو أسباب تانية طبيب الأطفال يقدر يحدد ويعالجها بسهولة.
- المشي على رؤوس الأصابع: الأطفال الصغيرين بيكونوا زي البالرينا ماشيين بخفة على أطراف صوابعهم وبيبطلوا يعملوا ده على سن سنتين أو ثلاث سنين، لكن لو الطفل استمر يمشي على طراطيف صوابعه بالشكل ده فيفضل استشارة الطبيب لأنها ممكن تكون إشارة لمشكلة في الجهاز العصبي المركزي.
- الأقدام المسطحة لدى الأطفال: الفلات فوت واحد من الأسباب اللي بتعفي ناس كتير من دخول الجيش وهي برضو من أسباب مشاكل المشي بعد سن السنتين، لكنه في النهاية مشكلة وراثية والطفل بيتعود وبيمشي مع الوقت.
- خلل مفصل الورك: خلال السنة الأولى من حياة الطفل ممكن بعاني من خلل التنسج في مفصل الورك اللي هي باختصار ضعف الأربطة اللي بتربط الورك، ودي مشكلة بتحصل لخمسة من أصل ألف طفل وممكن تسبب تأخر المشي عند الأطفال، أسبابها مش معروفة لكن بتحصل أكتر عن البنات لكن عموما ليها حلول كتير بمجرد زيارة الطبيب هتقدري تحليها معاه.
اقرأي أيضا: ليه ممارسة رياضة المشي في البيت مهمة؟
المصادر
ويب طب
التعليق باستخدام حساب فيس بوك