محتويات المقال
من أيام جداتنا واحنا بنسمع عن معجزات الزيت في الشعر، وأيامهم كانت الستات بتحب تحط في شعرها زيت عشان يلمع ويتغذى في نفس الوقت. لكن مع تقدم العلم ووجود دراسات عن كل حاجة، خلينا نسأل سؤال بقى: هل الزيوت فعلًا مفيدة؟ ولو كده، ليه بعض الناس بيحصل لهم تساقط الشعر لما بيستخدموا زيوت؟ تعالي نشوف مع بعض أسباب تساقط الشعر عند استخدام الزيوت.
أسباب تساقط الشعر عند استخدام الزيوت
- ضغط كبير على الشعرة
- قشرة الشعر
- تكدس الأوساخ والتراب
- تغريق البصيلات
الضغط على الشعرة
والضغط هنا بمعنى التحميل أو الوزن، إن كتر الزيوت، خاصةً التقيل منها زي الخروع والكافور (اللي بيتقال عنهم مغذيين جدًا)، بيتقل على الشعرة وبيسحبها لتحت وده لو فيه ضعف في الشعر نتيجة الحمل أو الولادة أو إجهاد من التعرض للحرارة أو غيره من الأسباب، بيسبب تساقط الشعر.
اعرفي هنا أهم 8 زيوت طبيعية هتحل جميع مشاكل الشعر والبشرة
قشرة الشعر
بالرغم من إن فيه زيوت موصوفة لحل مشكلة قشرة الشعر، إلا إنك ساعات عشان تخلصي أو من كتر ما انتي مستعجلة النتيجة، ممكن تعملي حمام الزيت أكتر من مرة أسبوعيًا أو تزودي الزيت نفسه في المرة الواحدة. الفعلين غلط جدًا لإن حتى لو الزيت نفسه من خصائصه القضاء على قشرة الشعر، كتره هيعمل قشرة! فروة الراس ما عندهاش قدرة على استيعاب زيوت كتير وعشان كده، لو هتعملي حمام زيت، لازم تعرفي الزيت ده يتحط قد إيه منه ويفضل على الشعر قد إيه.
تكدس الأوساخ والتراب
لو انتي مش من مدرسة إن الزيت بيتعمل حمام زيت ويتغسل كويس ويتشطف وبتحبي تسيبي الشعر عليه زيت، فده معناه إنك كل ما تخرجي معرضة إن كل التراب اللي في الجو يلزق في شعرك، ده مهلك للشعر لإنه حِمل تقيل وحاجة مش نضيفة ومش لطيفة وبالتالي بيساعد على تساقط الشعر.
تغريق البصيلات
لو انتي بتعملي حمام زيت أكتر من مرة في الأسبوع أو بتستخدمي زيوت تقيلة من غير تخفيفها بزيوت أخف أو بتستخدمي كمية زيت كبيرة، انتي بتعرضي البصيلات للغرق في الزيت وعليه البصيلة هتضعف ومش هتعرف تطلع شعر صحي أو هتوقع الشعر.
الزيت مفيد بس مش كل الزيوت ومش بكل الكميات ومش دايمًا. عشان كده، خدي بالك دايمًا واسمعي لشعرك وشوفي هو بيرتاح لإيه.
التعليق باستخدام حساب فيس بوك