أغلبنا متخيل إن الحكة في فروة الرأس سببها بس الإصابة بالقشرة، بس في الحقيقة أسباب الإصابة بالحكة في فروة الرأس له أسباب عديدة، وفيه منها اللي ممكن بشوية علاجات منزلية الحالة تتحسن، وفيه حالات تانية بتطلب ضرورة التدخل الطبي، فخلينا الأول نعرف إيه هي أسباب الإصابة بحكة في فروة الرأس.
أسباب حكة فروة الرأس
- الإصابة بالقشرة Dandruff
اللي بيحصل إن فيه نوع من الخميرة بينمو بشكل طبيعي على فروة الرأس، بس بمجرد ما يحصل نمو مفرط للخميرة دي بيحصل رد فعل تحسسي بيسبب إلتهاب في فروة الرأس والرغبة في الحكة فيها.
وطبعا فيه حالات بسيطة بتتعالج عن طريق شمبوهات بتتصرف من غير الحاجة لأي رجوع للطبيب، لكن في الحالات الحاجة ممكن يلجأ الطبيب لأنواع من الأدوية المقاومة للفطريات والكورتيزونات في شكل كريمات أو محلول أو رغوة.
- رد فعل تحسسي
أوقات خلال إستخدامك أو حتى تجريبك لأوناع مستحضرات للعناية بالشعر، ويكون في واحد منهم مواد كيميائية، أو عناصر بتسبب لك حساسية، فبمجرد إستخدمها بيظهر رد الفعل التحسسي المتمثل في إحمرار فروة الرأس وشعور مزعج بالحكة.
وده بيظهر جدا لو إستخدمتي نوع سيء من الشمبوهات أو استخدمتي نوع صبغة قبل ما تعملي على جلدك إختبار الحساسية، في الحالة دي لازم ترجعي لطبيبك علشان يديكي العلاج اللي يناسبك.
- قمل الشعر
أوقات بتحصل إصابة بحشرات في الرأس زي القمل، واللي بينتقل بسهولة من المصاب إلى غير المصاب، والموضوع ده بيحصل بشكل شائع بين الأطفال، والموضوع مالوش علاقة بالنضافة الشخصية، هي مجرد عدوة سهل الإصابة بيها، وفي نفس الوقت سهل العلاج منها بإستخدام علاجات مقاومة القمل في الصيدليات، بس لازم تنفذي التعلميات اللي بتكون مع المنتج.
- تينيا الرأس Tinea capitis
هي نوع من انواع الفطر أو التينيا بتصيب الجلد وفروة الرأس، وبتظهر الأول في شكل حبوب حمرا صغيرة أوقات تكون بس مجرد بروز أو تكون ملتهبة وبتسبب شعور قوي بالحكة.
ودي من الحالات اللي بتحتاج تدخل طبي وخضوع لكورس علاج ممكن يمتد من شهر لثلاث أشهر بأدوية مقاومة للفطريات.
- الأرتكاريا Urticaria
الأرتكاريا ممكن تصيب أي جزء من الجسم سواء بسبب أو من غير سبب، اللي بيحصل إن المنطقة اللي بتظهر فيها بتنتفخ وبتكون حمرا ومثيرة للحكة بشكل غير عادي، وفي الحالة دي لو عارفة مسببها فعليكي الحرص على تجنبها، أما لو كان مجهول بالنسبة لك فحاولي تتجنبي أكبر قدر ممكن من المسببات، ودي من الحالات اللي بيوصف لها الطبيب علاج مقاوم للحساسية يستخدم وقت اللزوم.
- الضغط العصبي
الضغط العصبي اللي ممكن تتعرضي ليه ممكن يكون جدا واحد من أقوى مسببات الشعور بحكة الرأس، علشن كدة من المهم جدا على قد ما تقدري تتجنبي الضغط العصبي خصوصا لو بيظهر على فروة رأسك في شكل حكة سخيفة.
- أسباب أخرى
في أسباب تانية بتسبب الإصابة بحكة الرأس زي الصدفية، والإكزيما، والجرب، وحتى الإصابة بسرطان الجلد، وكل الحالات دي بتطلب تدخل طبي، ومش هتنفع معاها العلاجات المنزلية البسيطة.
دلوقتي بعد ما عرفنا إيه أسباب الإصابة بحكة في فروة الراس، تعالي أقولك على شوية علاجات منزلية سهلة، تقدري تسخدميها بسهولة وتحسي بفاعليتها خصوصا لما يكون سبب حكة فروة الرأس عندك بسيطة.
طرق طبيعية لعلاج حكة فروة الرأس
- زيت جوز الهند
زيت جوز الهند الطبيعي بيتميز بوجود مادة حمض اللوريك، واللي بدورها بتتميز بقدرتها على مقاومة الجراثيم، ده غير إن المادة دي في حد ذاتها بتساعد على سهولة إمتصاص الجلد لزيت جوز الهند.
علشان كدة يعتبر من أفضل العلاجات المنزلية خصوصا في مقاومة حكة الرأس اللي بتيجي بسبب الإكزيما أو قمل الرأس عن طريق إستخدامه مخلوط مع مغلي اليانسون .
- زيت شجرة الشاي
زيت شجرة الشاي من الزيوت اللي بنسميها زيوت أساسية، وسهل توفيره جدا سواء في الصيداليات أو محلات العطارة أو حتى محلات الأغذية الصحية، وبيتميز بقدرته على مقاومة الجراثيم والفطريات .
وزي ما قولت لك هو زيت اساسي علشان كدة مينفعش يتم استخدامه بشكل مباشر على البشرة،لازم يكون مخفف عن طريق خلطح بزيوت خفيفة زي زيت الزيتون مثلا، أو حطي من 10 لـ 20 نقطة منه على شامبو أطفال مثلا ودلكي بيه فروة رأسك.
- زيت النعناع
من الزيوت الفعالة جدا في علاج قضرة الشعر وتسكين ألم الحكة في فروة الرأس، وهو زي زيت شجرة الشاي زيت أساسي مينفعش استخدامه بشكل مبالشر، لكن لازم خلطه بزيت تاني زي زيت الزيتون، وطريقة استخدامه الصحيحة إنك بعد ما تخلطيه بأي زيت خفيف دلكي فروة رأسك بيه لمدة 5 دقايق وبعد كدة اغسليه بالشامبو.
- خل التفاح
معروف عن خل التفاح خصائصه المضادة للجراثيم، وإنه من أقوى المطهرات الطبيعية، علشان كدة فعال جدا في مقاومة حكة الجلد، طريقة إستخدامه الصحيحة إنك تخلطيه بمياة دافية وأشطفي بيه شعرك بعد الشامبو علشان يقلل من قشرة الشعر ويخفف الحكة.
- زيت الزيتون الدافي
بيساعد في تليين القشرة اللي مسببة الحكة في فروة الرأس وكمان إزالتها بسهولة ، بس له طريقة معينة هقولك عليها
- دفي شوية صغيرة من زيت الزيتون.
- ادهني فروة رأسك بيه وهو دافي ودلكيه بعمق لمدة خمس دقايق.
- سيبي الزيت على فروة راسك كام ساعة ممكن ساعتين لحد 6 ساعات
- اغسلي شعرك بشامبو طبي يكون مثلا بيحتوي علىحمض الساليسيليك (Salicylic acid) أو الفحم (Coal tar).
- زيت عشبة الليمون
زيتعشبة الليمون من الزيوت الأساسية يعني يستخدم مخفف أو مخلوط بزيت خفيف، بيتميز الزيت ده إن له خصائص قابضة للأوعية الدموية والجلد، يعنييقدر يقلل من أفراز الدهون للبشرة الدهنية. وطريقة استخدامه في مقاومة حكة الرأس سهلة
- اخلطي نقطتين من زيت عشبة الليمون، مع ملعقة كبيرة من الشامبو بتاعك.
- حطيه على فروة رأسك ودلكي لمدة خمس دقايق.
- وبعد كدة اغسلي شعرك بالشكل المعتاد.
دي أشهر العلاجات المنزلية للحالات السهلة للإصابة بحكة في فروة الرأس، لو حسيتي الموضوع زايد عن المعقول يبقى لازم وضروري تجعي لطبيب جلدية.
التعليق باستخدام حساب فيس بوك