الرضاعة عمومًا هي أكتر حاجة الأم بتكون منتظراها تمشي بطريقة مظبوطة عشان البيبي يكبر بصحة وقوة. لكن المفاجأة إن بعض الأطفال بترفض الرضاعة الطبيعية، وأطفال تانية بترفض الرضاعة الصناعية. لكن الشيء الغريب إنه فيه أطفال بترفض الاتنين، وفي الحالة دي، بيكون الوضع فعلًا صعب وغريب خاصةً لو كان الطفل حديث الولادة، لإننا هنا بنتكلم عن مشكلة كبيرة ممكن تهدد حياة البيبي، أو على أقل تقدير، تكون سبب في سوء تغذيته، لكن يا ترى إيه هي أسباب رفض الطفل للرضاعة الصناعية فجأة.
رفض الرضاعة عمومًا بشكل مفاجئ
بعض الأطفال بتكون بترضع طبيعي أو صناعي بشكل عادي، لكن فجأة بترفض الرضاعة بدون مقدمات، سواءً في بداية الرضاعة أو بعد شوية شهور، وده له أسباب ممكن تختصرها في النقط دي:
- الانزعاج بسبب التسنين
- الألم بسبب التهابات الفم زي الهربس
- عدوى الأذن
- ألم التطعيم ممكن يسبب الألم في وضع معين خلال الرضاعة
- الزكام وانسداد الأنف
- ريحة جديدة في هدومك أو جسمك زي الصابون أو العطور أو مزيل العرق
- تغير طعم لبن الثدي بسبب الأدوية أو بعض أنواع الأكل أو قبل الدورة الشهرية
تعملي إيه لو طفلك منع رضاعة طبيعية؟
- امنعي احتقان الثدي وماتبطليش شفط اللبن عشان الضخ مايقفش
- ماتيأسيش وكملي محاولة مع طفلك
- حددي السبب وحاولي تعالجيه واستوعبي الرفض والاحباط
- غيري وضعية الرضاعة
- احضني البيبي
- تجنبي المشتات وابعدي عن الدوشة اقعدي في غرفة هادية وحاولي ترضعيه بهدوء
- استشيري طبيب لو الرفض مكمل
ليه الطفل بيرفض الرضاعة الصناعية
في أسباب كتير ممكن تخلي البيبي يرفض البيبرونة منها:
- فطام الطفل من الرضاعة الطبيعية، واللي بيخليه يرفض البيبرونة، حتى لو كان بياخدها في محاولة منه إنه يرجع تاني للرضاعة الطبيعية.
- الطفل ما يكونش جعان كفاية
- شعور الطفل بالغثيان أو المغص
- الوضع غير مريح. اعرفي هنا الأوضاع الصحيحة للرضاعة.
- الحليب سخن
- ملمس البيبرونة مضايقه
- ألم في الفم لأي سبب زي الالتهابات أو الهربس أو خلافه.
عمومًا معرفتك للسبب هتخليكي تعالجيه، وبالتالي المشكلة هتتحل، بنفكرّك إن كلها أسباب مؤقتة بتتحل بالصبر والهدوء وبنتمنى لك أمومة هادية وسعيدة.
التعليق باستخدام حساب فيس بوك