واحنا أطفال، كنا فاكرين إن الشعر الأبيض أو الشيب دي حاجة بعيدة خالص، بتحصل لتيتة وجدو كده. احنا مالناش دعوة! لكن في عشريناتنا الجميلة وفي زهرة شبابنا، ابتدينا نشوف إن الشعر الأبيض ابتدا يظهر وفي تلاتيناتنا أكد حضوره أكتر، ومش هاكمل بقى عشان ما نزعلش. في المقال ده، عايزين نعرف إيه أسباب ظهور الشعر الأبيض خصوصًا في السن الصغير، وإيه طرق علاجه.
إيه هو الشعر الأبيض مبدئيًا؟
الشعر الأبيض بيظهر لما بصيلة الشعر تبطل تنتج الصبغة اللي بتلون الشعرة فتطلع الشعرة من غير لونها الأصلي، فتطلع بيضا. وعشان كده، أحب أقول لكل واحدة أول ما تشوف شعراية بيضا، تشدها بسرعة، إنها كده ما بتعملش حاجة خالص! الشعراية دي مهما اتشالت، هتطلع بيضا برضه. خلاص، البصيلة مش هتلونها تاني.
الطبيعي إيه في ظهور الشعر الأبيض؟
الحقيقة إنه بيختلف على حسب العِرق، يعني الطبيعي مثلًا للعرق القوقازي (الأبيض) إنهم يبدؤوا يطلع لهم شعر أبيض في النص التاني من التلاتين. في آسيا (أو اللي من أصول آسيوية) في الأربعينات، وفي أفريقيا (أو اللي من أصل أفريقي) في الخمسينيات. قبل الأعمار دي يعتبر شيب مبكر.
أسباب شيب الشعر المبكر
- مش التوتر! التوتر اتظلم معانا وبيتقال كتير إنه هو اللي بيشيب الشعر بدري. لكن مفيش إثبات علمي بيقول إن الشخص المتوتر بيشيب أسرع من الشخص الهادي.
- الجينات. الحقيقة، كل ما كان عندك حد في العيلة شعره أبيض بدري، كل ما كانت احتمالية الشيب المبكر أكبر.
- نقص فيتامين ب12. الفيتامين ده لما بينقص، حاجات كتير في الجسم بتتأثر ومنها الشعر.
- مشاكل في الغدة الدرقية.
- نسبة كثافة العظام القليلة. وكثافة العظام لها أكتر من عامل منها الطول والوزن ومدى النشاط (بتمارسي رياضة أو لا) والعِرق كمان له دور.
علاج الشعر الأبيض
لو لسه الشعر الأبيض في أول الظهور، ولقيتي إن شعرة أو اتنين بس اللي ابيضوا، ممكن تلحقي الموضوع بطرق طبيعية.
علاج الشعر الأبيض بطريقة طبيعية
- خدي فيتامين ب خصوصًا ب12.
- فيتامين د.
- فيتامين هـ.
- فيتامين أ.
- زنك.
- حديد.
- ماغنيسيوم.
- بطلي تدخين لو انتي مدخنة، وتجنبي التواجد في مكان فيه دخان كتير.
- احمي شعرك من الشمس.
- خففي الضرر على شعرك: بلاش مكواة الشعر كتير، بلاش تشقير.
- استخدمي مشط واسع بدل الفرشاة.
- استخدمي الشامبو اللي يكون خالي من السلفات والسيليكون.
الصبغات
الصبغات اللي من الصيدلية
حاولي تختاري صبغات تكون ما فيهاش مواد ضارة.
الصبغات الطبيعية
اعرفي ازاي تستخدمي من مطبخك ومن العطار منتجات تصبغ شعرك بأقل ضرر ممكن.
التعليق باستخدام حساب فيس بوك