العنوان صادم شوية ويمكن يبان إنه بيشجع على عنف الزوج ضد الزوجة أو العنف ضد المرأة. لكن الحقيقة إن ده مش المعنى المقصود نهائيًا. الموضوع اللي بنتكلم عليه النهارده هو العلاقة الحميمة الخشنة أو القوية، وده فيه رجالة بتحبه وفيه ستات بتحبه. لكن في المقالة دي، هنتكلم عن أسباب حب الرجل للعلاقة الزوجية العنيفة أو أسباب عنف الرجل في العلاقة الحميمة.
تعريف عنف الرجل في العلاقة الحميمة
تعالوا الأول نعرّف مرة تانية العنف اللي احنا بنتكلم عنه. عنف الرجل اللي نقصده في العلاقة الحميمة هو بعض الممارسات اللي الرجالة بتفضّل تعملها أثناء العلاقة الحميمة ولكن وتحتها ألف خط لازم تكون بالتراضي. يعني إيه تراضي؟ يعني تكون الزوجة موافقة على كل حاجة بتتعمل في العلاقة، مفيش أي غصب من الزوج على ممارسة معينة ضد الزوجة. إيه هي بقى الممارسات العنيفة دي؟
- صفع المؤخرة.
- شد الشعر.
- العض.
- ربط الإيدين سواء بحبل أو كلابشات.
- الخربشة.
- الكلام الجنسي (ساعات بيكون في هيئة شتايم جنسية).
- صفعات على مناطق مختلفة من الجسم.
فيه طبعًا أشكال أكتر من دي في العنف أثناء العلاقة الحميمة زي الضرب بحاجة (عصاية/خرزانة/كرباج) أو ربط الجسم كله بحبال أو ربط الفم. لكن كل دي بتقع تحت ما يسمى بالإخضاع والسيطرة (أو الممارسات السادية والمازوخية) ودي برضه لازم تكون بالتراضي بين الطرفين.
أسباب عنف الرجل في العلاقة الحميمة
عرفنا إيه هي الممارسات اللي بتتعرف على إنها عنف في العلاقة الحميمة، تعالوا نشوف إيه اللي بيخلي بعض الرجالة تحبها؟
- الإحساس بالسيطرة.
- أزمة الراجل المؤدب.
- الحرية.
الإحساس بالسيطرة
بعض الرجالة بيحبوا الجنس العنيف لإنه بيحسسهم إنهم هم اللي بيقودوا العلاقة وهم المتحكمين وهم اللي قادرين يعملوا في الزوجة أي حاجة. الأحاسيس دي بتغذي شعورهم بنفسهم، وبتقوّي إحساسهم بالثقة في النفس.
أزمة الراجل المؤدب
الجملة هذلية طبعًا. الراجل المؤدب ده طول الوقت بيعاملك كملكة متوجة، وست الكل. بيعاملك برقة ولطف قدام الناس وبينك وبينه وقدام الولاد. هو متربي وذوق. لكن كل إنسان له رغبات، وكل إنسان عنده شوية قلة أدب نفسه يطلعهم. فما تتخضيش لما تلاقي الراجل المهذب المحترم الرقيق الذوق ده وانتم في السرير بيشتمك شتايم فظيعة أو بيعمل ممارسات زي اللي قلناها أو حتى بيطلب منك انتي تعمليها معاه. هو عايز يخرّج طاقات معينة عندكم انتم الاتنين انتم طول الوقت بتخبوها أو بتعتبروها مش مهذبة. وعليه مفيش مشكلة خالص في شوية قلة أدب في المكان الوحيد المسموح فيه بقلة الأدب.
الحرية
زي ما قلت لك في النقطة اللي فوق: ممارسة الحاجة اللي بتخلي الراجل يحس إنه إنسان طبيعي وعادي وبيشتم وبيضرب (وبيتشتم ويتضرب برضه) بتديه إحساس بالحرية والانطلاق، والجموح كمان. هو حاسس إنه حر ويقدر يقول ويعمل كل حاجة براحته. ممكن يكون اللفظ اللي هاستخدمه صادم شوية بس هو بيطلّع “الحيوان” اللي جواه. الرغبات الجنسية والرغبة في العنف والضرب والشتيمة هي رغبات مايلة لكونها حيوانية في الآخر. ولو هو مش بيمارسها ولا انتي بتمارسيها بره نطاق العلاقة الحميمة، هتكون موجودة لكن مكبوتة. وطلوعها في العلاقة الجنسية – ما دام انتم الاتنين موافقين وراضيين – ما فيهوش عيب أو مشكلة.
نتمنى لك حياة سعيدة خالية من العنف .. وعلاقة حميمة مشبعة.
التعليق باستخدام حساب فيس بوك