سألتي نفسك قبل كده إيه اللي حصل بينك وبين جوزك بعد ما خلفتي؟ ليه الدنيا اتغيرت ما بينكم وصورته قدامك اختلفت؟ وصورتك قدامه اختلفت؟ وليه فيه خلافات مستمرة ما بينكم مع إن علاقتكم قبل الإنجاب كانت ممتازة؟ الحقيقة إن إجابة السؤال ده إن بعد الإنجاب واللي هو بالمناسبة تغير جذري حقيقي في كل جوانب حياة الأب والأم، حاجات كتير في نفسيتكم بتختلف.
الست بتروح فين بعد الولادة؟
الست بطبيعتها بتندمج تمامًا في شعور أمومتها، والأب في الأغلب بيكون عنده رغبة قوية جدا في التمسك بصورة حياته السابقة وإنه يخلي الأبوة تشغل جزء بسيط من حياته يكاد لا يذكر. وده طبعا غير قابل للتطبيق في الحياة الواقعية، ومن هنا يبدأ الصراع الحقيقي. الأم الجديدة بيكون تفكيرها الأساسي إنها أم أولًا وزوجة/ست ثانيًا، والأب الجديد بيكون تفكيره الأساسي إنه زوج أولًا وأب ثانيًا، هنا باين إن ترتيب الأولوية مختلف، وبمجرد ما الأولويات تختلف الأهداف بتختلف وبالتالي بتظهر الصراعات.
نقطة المشكلة
الزوجة بتكون بتدوّر على أب لابنها، والزوج بيكون بيدور على زوجته، النقطة دي التعبير عنها تقريبًا منعدم. هي بتكون شايفة قد إيه هو مش بيساعدها وإنسان مش بيقدر وما عندهوش إحساس بالمسؤولية ومش بيرضى يشيل ابنه خمس دقايق. وهو بيشوف إنه فقد مكانته عندها وإن زوجته الجميلة المتفرغة ليه الرايقة باستمرار اختفت.
ده حقيقة حجم المشكلة، لما يحصل تجنب لتعريف المشكلة الموجودة بتضخم ومع الوقت بتقضي تماما على العلاقة، فيه تعبير جميل أوي إسمه الفيل في الغرفة Elephant in the room وده تعبير عن وجود مشكلة والكل عارف بوجودها وفي نفس الوقت محدش بياخد خطوة حقيقة لحلها، فالفيل أو المشكلة يعني يفضل يكبر لحد ما يسحق كل اللي موجودين في الغرفة دي، كناية يعني عن النهاية المدمرة للموقف.
علشان كدة لازم إنتوا الإتنين تقتنعوا بوجود المشكلة دي، وحلها الحقيقي بيجي في المقام الأول إن كل واحد يعبر عن أحلامه وإحبطاته اللي ظهرت مع تغير شكل الحياة بعد الإنجاب، والخطوة التانية لازم تقعدوا على طاولة المفاوضات، لأن المساوة في إن كل واحد يشوف إمكانيات الطرف التاني في الفترة الحالية شكلها إيه، ويبتدي يقدم عرضه، يمعنى إن علشان العلاقة تفضل في حالة تبادل وإزدهار لازم يحصل تكيف مع المعطيات الجديدة، يعني الموضوع محتاج مرونة وذكاء ونظرة رحمة إنسانية.
العلاقة الزوجية علاقة طويلة الأمد، وبالتالي إدارتها بتتميز بالصعوبة، وده معناه إحتياجها لمهارات إدارة حقيقية، بجانب إنها علاقة طويلة الأمد فهي في نفس الوقت علاقة مستحقة الدفاع عنها والكفاح بجد للحفاظ عليها، يعني مش بمجرد ظهور الإختلاف أو حتى الإحباط يبقى التفكير الأول في الإنفصال.
الإنفصال في الطبيعي مش هقولك يكون أخر حل، إنما هو مفروض يكون بعد أخر حل، مش معنى كدة إنك تقبلي بأي إهانة أو تعدي، إنما معناه الأساسي إن التفكير يكون في السعي للاستمرار مش للإنفصال.
الهروب دايما هو الإختيار الأسهل، والاستمرار هو القرار الأصعب وحقيقي الأكثر شجاعة ، علشان كدة اعتبري المقال ده طاقة نور، أو إشارة ليكي على مكان المشكلة وإزاي تحاولي بجد مع شريك حياتك إنكم مع بعض تحلوها.
كل يوم فات ما بيينكم وكل يوم لسة هتعيشوه مع بعض يستاهل إنكم إنتوا الإتنين مع بعض بكل شراكة وإخلاص تتعاونوا علشان علاقتكم مع بعض تزدهر، ونقطة أخيرة تمسكوا بفكرة استمرار التواصل والكلام ما بينكم، خليها قاعدة أساسية ( ممنوع الصمت ) لأن لو اتعودتوا عليه حقيقي مع الوقت هترجعوا إتنين أغراب بس عايشين تحت سقف بيت واحد.
راحة بالي هي منصة لراحة كل أم، انضمي لأكبر وأهم مجتمع دعم للأمهات في مصر هنا. وفري احتياجاتك ومصاريفك اليومية من خلال كارت خصومات راحة بالي هنا. اخسري وزن الحمل والرضاعة وكلي أكل صحي في برنامج رياضي ونظام غذائي متفصل على احتياجاتك هنا.
التعليق باستخدام حساب فيس بوك