هي الحباية بتظهر في الوش ليه؟ وليه قبل كل مناسبة مهمة لازم تطلع حباية المناسبات الشهيرة في مكان بارز في الوش عشان تنكد علينا، وتضايقنا؟ كام شخص متعكنن ومتضايق بسبب حب الشباب في البشرة اللي قلب حياته جحيم مع الآثار اللي بيسيبها والعلاجات الغالية اللي محتاجة تركيز واهتمام مستمر. عشان كده، كتبنا المقال ده النهاردة عن أسباب وعلاج حبوب الوجه.
إيه حكاية حباية المناسبات؟
لما بيكون عندنا حدث مهم بنكون متوترين، ونتيجة لحالة التأهب القصوى دي والضغط والتوتر بنبدأ نحط ايدينا على وشنا كتير، وكمان الجهاز المناعي بيقوم بالواجب وبيكمل معانا لأن في الحالة دي بترتفع مستويات الكورتيزول والتستوستيرون ومن هنا إنتاج الدهون في الجلد بيكون أعلى، فتتسد المسام وتظهر الحبوب الصغيرة.
إيه أسباب حبوب الوجه؟
الحبوب اللي بتطلع لما بنتوتر، وقبل معاد الدورة الشهرية ومع بعض الناس بيستمر 10 أو 20 سنة مثلًا. وبعض السيدات بتتفاجئ إنها لما بتستخدم موانع حمل، الحبوب بتروح! الحكاية ببساطة إن منابت الشعر في الوش بيحصل لها عملية انسداد بسبب الزيوت اللي بيفرزها الوش وبسبب الخلايا الميتة. من هنا بتبدأ تظهر رؤوس بيضا وسودا وبقع وحبوب. والكلام ده مش محصور على سن بعينه، رغم إن فيه ناس بتسميه حب الشباب، لكن هو بيحصل في أي وقت. والمشكلة الحقيقية إنه لما بتستمر فترة طويلة، الحبوب بتسيب أثر مش لطيف في البشر بيضايق ناس كتير، خاصة إنها مش حاجة عارضة بتروح وتيجي، لأ، دي حاجة مزمنة تروح حباية تطلع غيرها وهكذا، بس الخبر الحلو إن فيه حل وخصوصًا لو بدأنا فيه بدري.
أعراض بتقول لك إنك عرضة لظهور حبوب الوجه:
نتيجة للدهون والزيوت اللي على البشرة واللي بتسد المسام ومنابت الشعر، بتتجمع البكتيريا وبتحصل الالتهابات خصوصًا مع الجلد الميت، وبتظهر في صورة:
- رؤوس بيضا يعني المسام مسدودة.
- رؤوس سودا يعني المسام مفتوحة.
- فقاعات حمرا مؤلمة.
- حبوب مجمعة صديد.
- كتل تحت الجلد صديدية أو لا.
ليه لازم تعالجيها فورا؟
علاج الحبوب مش رفاهية خاصة لو بتظهر بانتظار لإنها بتسيب أثر سخيف، ومش بس كده، بتسيب “ندوب” كمان بتخلي لون البشرة أغمق، وعموما بيكون لون البشرة مش موحد.
إيه علاج حبوب الوجه؟
- أول خطوة هي الاحتياطات، نخلي بالنا ونعرف نوع البشرة عشان نقدر نختار روتين العناية المناسب، بعض أنواع البشرة بيصيبها حبوب فورا لما يلمسها أي كريم أو زيت او دهون عموما.
- لو في حبوب بالفعل بناخد بالنا من عدم ملامسة الشعر للحبوب لأنها بتزودها خصوصا عند النوم، وبنخلي بالنا من الحاجات اللي بتلمس وشنا زي الخوذة والتليفون الياقات وأي حاجة ممكن احتكاكاها مع الوش يسبب زيادة ف يالمشكلة، أصلا مش مفروض حاجة تحتك بالوش خالص، والنوم يكون على أغطية قطن، مش ستان أو بوليستر، والشعر مرفوع وملموم، مع تنظيف روتيني للبشرة حسب نوعها .
- وطبعا المسألة بتحتاج زيارة لدكتور جلدية كويس يوصف نوع غسول كويس وكريمات لعلاج أثر الحبوب وعلاجها، وأخيرا بفكرك انتي جميلة في كل الحالات.
التعليق باستخدام حساب فيس بوك