كلنا عرفنا إن محمد صلاح جاله بنت تانية سماها “كيان” والحقيقة إن أغلب الناس لما سمعوا اسمها عجبهم جدا، السبب المعروف إنها أي حاجة تيجي من ريحة الحبايب، والسبب التاني إن الاسم جديد وعربي زي اختياره لاسم بنته الكبيرة “مكة” وواضح إن ده ذوق محمد صلاح ومراته ماجي في اختيار أسامي أولادهم.
في المقال ده هنقولك على مجموعة أسماء جديدة للبنات والأولاد 2020 لو إنتي حامل أو لو صاحبتك اللي على وش ولادة محتارة في اسم للبيبي
أسماء بنات جديدة 2020:
يُسر: اسم عربي بضم الياء وتسكين السين، بيتسمى بيه الصبيان والبنات ومعناه التيسير والسهولة أو الغنى والفضل.
ورد: اسم عربي هو جمع وردة، ومعناه الزهور المعروفة بجمالها وريحتها الحلوة، وهو برضه ينفع للأولاد والبنات.
هدوى: اسم أصله من هدى ويعني الصلاح والتقوى والبعد عن الطريق الضال، وله معنى تاني مستوحى من الهدوء ومعناه الرقة والنعومة.
هازال: اسم تركي مؤنث يعني أوراق الأشجار الجافة والواقعة على الأرض.
ناي: اسم فارسي مميز بيتسمى بيه الأولاد والبنات، وهو أصله من آلة الناي المعروفة بصوتها الناعم والحزين.
ميسون: اسم فارسي يعني صاحبة الوجه الأحمر، واللي بتدل على الجمال والحسن في الشكل.
كيارا: اسم أجنبي يعني البريق أو التوهج، وفي اللغة الأيرلندية يعني صاحبة الشعر الأسود.
فُرات: اسم بيتسمى بيه الأولاد والبنات، ومعناه الماء العذب جدًا، وفي نهر في العراق اسمه نهر الفرات.
أسماء أولاد جديدة 2020:
هارون: اسم للأولاد أصله عبري ومعناه الجبل.
ناظم: يعني الشاعر، والمؤلف، والجامع، وناظم اللؤلؤ في سلكه، والمستقيم اللي مفيش فيه اعوجاج.
نائل: نالَ ينالُ يعني كسب ووصل مقصده ومراده، ويعني برضه اللي اتقدمت له هدية، ويعني كاسب الجود.
مؤيَد: يعني اللي بيتساعد وبيتقوى من حد تاني غيره.
ليث: اسم عربي الأصل مذكر يعني الأسد، والقوة، الشدَّة. وبيستخدم علشان يدل على الشجاعة والقوة.
كِنان: معناه الوقار أو الشخص الوقور، وبرضه الستر والغطاء.
قسّام: اسم عربي مذكر، وهو صيغة مبالغة من قاسم. وهو اللي بيقسم أي حاجة بين الناس وبرضه بمعنى العادل.
قادير: اسم تركي أصله من الكلمة العربية “قادر” يعني اللي بيقدر يعمل أي حاجة.
التعليق باستخدام حساب فيس بوك