أسوأ حاجة ممكن تحصلك في الحياة بعد البوتي ترينينج هو إنك تكوني عاملة أكلة حلوة زي الفراخ المشوية ولا ستيك مشوي على أساس يعني بنحافظ على القوام السمباتيك وكده وتلاقي إن الحلة ولا الطاسة اللي استخدمتيها بقا لونها أسود من لب البطيخ أو البتنجانة السودا أيهما أقرب.. ساعتها بتبقي واقفة قدام الحلل المحروقة مغلوبة على أمرك بين نارين، هل أرميها؟ هل انضفها بالسلكة وأضحي بالضوافر الجيل اللي لسه عاملاهم؟ هل أجيب طاسة وحلل تانية وأحرقها واكمل الطقم؟ عشان متتكدريش المرة الجاية لما تحرقي الطاسة أو الحلة هنقولك على حلول عشان تنضفيهم بيها ولو منفعتش ولا يهمك يا ست الكل لا يكلف الله نفسًا إلا وسعها تتحرق فوفا أكتر ما هي محروقة قومي يا بت بصوت فوفا اشتريلك طقم من رنين في العروض D:
4 طرق لتنظيف الطاسات والحلل المحروقة
-
ألحقي الحلل المحروقة قبل ما تبرد
قبل ما الطاسة أو الحلة تبرد بشكل كامل، هاتي مناديل مطبخ وشيلي براحة الدهون وآثار الحروق بس خلي بالك ايدك متتلسعش، هتلاقي إن الآثار بتطلع معاكي بمنتهى السهولة بس أهم حاجة الطاسة أو الحلة متبردش، وبعدين اغسليها عادي بالسفنجة والميه والصابون.
5 استخدامات مبتكرة ما تعرفيهاش للقهوة
2- تنظيف الحلل البيكنج صودا
- املي الطاسة أو الحلة المحروقة بشوية ميه بحيث تغطي مكان الحرق بس وضيفي حوالي كوب من الخل وشوية صابون وحطيهم على النار يغلوا.
- بعد ما تطفي النار عليهم حطي عليهم معلقتين كبار من البيكينج صودا وسيبيهم يبردوا.
- ادعكي بسفنة خشنة شوية بس خلي بالك عشان متجرحيش الطاسة أو الحلة وبعدين اغسليهم عادي بالميه والصابون.
3- تنضيف الحلل المحروقة ببيكربونات الصوديوم
- رشي البيكينج صودا على كل الأماكن اللي فيها حروق في الطاسة أو الحلة وحطي عليها شوية ميه واحدة واحدة لحد ما تعملي عجينة وسيبيها لمدة ربع ساعة.
- هاتي سفنجة وافركي آثار الحرق كويس وبعدين اغسليها عادي بالميه والصابون.
4- التنضيف بمسحوق غسالة الأطباق
- لو عندك مسحوق غسالة الأطباق أو الأقراص حطيها على مكان الحرق ومع شوية ميه وافركيها جامد سواء بايدك أو سفنجة خشنة شوية وبعدين اشطفيها كويس بالميه.
ودي كانت طرق سهلة وبسيطة عشان تنضفي بيها الحلل والطاسات المحروقة، لو عندك طريقة تانية غير اللي اتكلمنا عليها في المقال ده شاركينا بيها في كومنت
حلل سيراميك ولا جرانيت ولا تيفال .. أنواع حلل الطبخ والأكلات المناسبة لها
التعليق باستخدام حساب فيس بوك