الطلاق من أصعب القرارات اللي ممكن حد ياخدها في حياته، بالذات لو كمان فيه أطفال، ومطلوب منهم يستوعبوا فكرة إنفصال الأهل. ومطلوب مننا نحافظ إنهم ما يتأثروش نفسيًا بالسلب بالانفصال ده. الإحصائيات بتقول إن نسبة الطلاق تضاعفت خلال الأربعين سنة اللي فاتوا من حالتين طلاق لكل 10 متجوزين، بقى 5 حالات طلاق لكل 10. وده تضاعف رهيب والسبب هو عدم فهمنا لبعض. واثبتوا كمان إن 80% من حالات الطلاق كانت بناءً على رغبة الزوجة، لإن احتياجات الأنثى اللي ما بتتلباش دايمًا بتخليها مش مرتاحة. طول ما الإنسان عنده احتياج ناقص، ما بيرتاحش \ الإنسان راحته في الاكتفاء. عشان كده، لازم نعرف إيه أكبر أسباب الطلاق.
تحضيرات الطلاق: حاجات لازم تاخدي بالك منها قبل خطوة الطلاق
إيه أكبر أسباب الطلاق؟
- العنف المنزلي
- الخيانة
- الفلوس
- اختلاف الأولويات
- العلاقة الحميمة
-
العنف المنزلي الأسري
طبعًا العنف بجميع أشكاله سواءً جسدي أو مادي أو جنسي على رأس القايمة، لأن الإساءة والإهانة بين الزوجين هي بداية نهاية العلاقة دي لو ما اكتشفناش من بدري إن فيه مشكلة وحاولنا نصلحها.
الخيانة الزوجية
الخيانة الزوجية بتعمل تغييرات جذرية وواضحة جدًا وبتقلب الحياة عامة لما بيتم اكتشافها. لأن لو حتى الزوجين ما انفصلوش، حياتهم بتتحول لدايرة كبيرة من قلة الثقة والشك واللي في الآخر غالبًا بيوصل للطلاق.
ممكن تشوفي هنا كمان الخيانة الزوجية: إزاي اكتشفتي خيانة جوزك
الخلافات المالية بين الزوجين
للأسف الخلافات المادية بين الزوجين في الزمن اللي احنا فيه ده بقت على رأس القايمة اللي بتوصل للطلاق. الإحصائيات بتقول إن الخلاف المادي بين الزوجين بيسبب قرب الـ41% من حالات الطلاق. عشان كده، دايمًا خبراء العلاقات بيأكدوا إن الأمور المالية من الأساسيات اللي لازم نكون متكلمين فيها ومتفقين عليها قبل الجواز.
اختلاف الأولويات والأهداف
أزواج كتير بعد الجواز بتتصدم بأن كل واحد فيهم في وادي. اللي عنده أهداف وأحلام كبيرة وطريقة في تربية الولاد. حتى في طريقة إدارتهم للخلاف بينهم، وبالتالي بيكتشفوا اختلاف أكبر في طريقة ممارسة الحياة في الحاجات الكبيرة والصغيرة. ولو ما وصلوش لحل وسط يرضيهم هم الاتنين واتفاق ضمني يجمع بينهم ممكن تكون نهاية علاقتهم الطلاق.
العلاقة الحميمة بين الزوجين
عدم توافق العلاقة الحميمة بين الزوجين بقت من أشهر أسباب الطلاق في الوقت الحالي. ومع انتشار الوعي بقى فيه رجالة وستات كتير بيقرروا ينفصلوا عن شريك حياتهم لعدم إشباع رغباتهم الجنسية أو عدم رغبة واحد من الطرفين لطلب المساعدة أو الاعتراف إن فيه مشكلة من أساسه بغض النظر عن احتياجات الطرف الآخر.
اعرفي هنا بالفيديو: مواجهة مشاكل العلاقة الجنسية
التعليق باستخدام حساب فيس بوك