أشهر أكلات عيد الأضحى .. هتخليكي توقفي دايت أيام العيد

كل سنة وانتم طيبين. مع قرب عيد الأضحى 2020، كل ست وأم بيكون لها استعداداتها الخاصة لتحضير أكلات العيد الكبير اللذيذة اللي كلنا اتربينا عليها. فيه اللي بتحب الأكلات الرسمية التقليدية واللي هي تعتبر أشهر أكلات عيد الأضحى زي الفتة بالخل والتوم وصينية الرقاق الشهيرة. وفيه اللي العيد بالنسبة لهم بيبقى عبارة عن وليمة مشويات مشكلة سهلة وخفيفة في الصيف. وفيه بقى اللي بيحب فواكه اللحوم زي ما بيسميها الجزارين من كبدة وكلاوي وممبار وكوارع وعكاوي والذي منه. عشان كده النهارده جمعنا لك مجموعة كبيرة من الوصفات والأكلات الشهية المناسبة للعيد الكبير بتناسب كل الأذواق المختلفة، وحابين دايمًا نفكرك إنك ما تحرميش نفسك من الاستمتاع بأكلات العيد، لكن خلّي كمياتك صغيرة ومعتدلة عشان تحافظي على صحتك ورشاقتك.

 

أشهر أكلات عيد الأضحى 2020

1. طريقة عمل صينية الرقاق باللحمة المفرومة.
2. طريقة عمل طاجن العكاوي بالبطاطس.
3. طريقة عمل الفتة.
4. طريقة عمل كفتة الحاتي.
5. طريقة عمل الكبدة الإسكندراني.
6. طريقة عمل فخدة الخروف المشوية في الفرن.
7. طريقة عمل شاورما اللحم.
8. طريقة عمل الحواوشي.
9. طريقة عمل الريش الضاني.
10. طريقة عمل طاجن ورق العنب بالريش الضاني.

 

• طريقة عمل صينية الرقاق باللحمة المفرومة

مقادير الرقاق باللحمة المفرومة:

• 1/2 ك لحمة مفرومة مع نسبة دهون 20%
• 1 باكيت رقاق ناشف
• 1 بصلة مفرومة ناعم
• ملح وفلفل
• 1/2 معلقة جوزة الطيب
• 1/2 معلقة بهارات لحمة
• سمنة بلدي أو زبدة
• مرقة لحمة لتسقية الرقاق

 

طريقة عمل صينية الرقاق باللحمة المفرومة:

• في طاسة على النار، شوحي اللحمة المفرومة في معلقة من السمن أو الزبدة، ضيفي البصل المفروم والبهارات والملح والفلفل.
• هتسخني كمية مناسبة من مرقة اللحم مع معلقتين كبار من السمن أو الزبدة ورشة ملح وفلفل وهتبدأي تسقي شرايح الرقاق بالمزيج ده من الاتجاهين.
• في صينية مدهونة بكمية وفيرة من السمنة أو الزبدة، ابدأي رصي طبقات من الرقاق لحد ما تخلصي نص الكمية، وبعدين ضيفي اللحمة المفرومة ووزعيها في كل الصينية، ضيفي النص التاني من شرايح الرقاق. تقدري كمان توزعي اللحمة المفرومة على طبقتين لو حبيتي.
• اسقي وش صينية الرقاق ب1/2 كوب من المرقة ومعلقة من السمنة السايحة على الوش واخبزيه في فرن متسخن على حرارة 180 لحد ما يستوي ويحمر وشه.
• ملحوظة: لو بتحبي الرقاق طري أكتر، غطيه بالفويل كويس أول ما يطلع من الفرن.

 

• طريقة عمل طاجن ورق العنب بالريش الضاني

المقادير:

لعمل محشي ورق العنب هتحتاجي

• ورق عنب طازة مسلوق في مياه وملح وليمون أو مجمد حسب المتوفر
• 1 كوب بقدونس مفروم
• 1 كوب كزبرة مفرومة
• 1 كوب شبت مفروم
• 1 بصله كبيرة مفرومة ناعم
• 3 فص توم مفروم ناعم
• 2معلقه صغيرة كزبرة ناشفة
• 1 معلقة صغيرة قرفة
• 1 معلقة صغيرة نعناع ناشف
• ملح وفلفل
• 1/2 معلقة صغيرة شطه (اختياري)
• 2 كوب رز مصري مغسول ومنقوع
• 1 كوب عصير طماطم
• 2 معلقة كبيرة صلصة طماطم
• زيت نباتي
• شرايح بصل وبطاطس لتسوية ورق العنب

تقدري تشوفي طريقة عمل طاجن محشي ورق العنب بالريش خطوة بخطوة هنا

 

 

• طريقة عمل طاجن العكاوي بالبطاطس

 

مقادير طاجن العكاوي:

• 1 ك عكاوي كندوز
• 2 حبة بطاطس كبيرة مقطعة مكعبات كبيرة الحجم
• 2 كوب عصير طماطم طازة
• 1 معلقة كبيرة صلصة طماطم
• زبدة أو زيت نباتي
• 2 بصلة كبيرة مقطعة شرايح
• 2 فلفل أخضر مقطع شرايح
• 1 حبة جزر مقطعة مكعبات
• 5 فصوص توم
• 1 قرن فلفل حار
• 1 معلقة كبيرة دبس تمر أو عسل إسود
• ملح وفلفل أسود
• 1/2 معلقة جوزة الطيب
• 3 حبات حبهان
• 2 ورقة لورا
• 1 معلقة صغيرة سبع بهارات
• 1 معلقة صغيرة كبابة صيني
• دقيق لتعفير العكاوي
• مرقة لحمة

 

طريقة عمل طاجن العكاوي بالبطاطس:

• عفري قطع العكاوي بالدقيق والملح والفلفل. وفي طاسة سخنة جدًا، شوحي العكاوي في معلقة كبيرة من الزيت أو الزبدة لحد ما تاخد لون من كل الجهات.
• في نفس الطاسة، ضيفي شرايح البصل، فصوص التوم ،الفلفل الحار والعادي، والجزر والبطاطس وشوحي كل الخضراوات مع العكاوي.
• ضيفي كل التوابل المذكورة وصلصة الطماطم وعصير الطماطم ودبس التمر، ومرقة اللحمة وسيبي المزيج يغلي.
• في طاجن فخار كبير ويفضل إنك تسخنيه في الفرن مسبقًا، صبي كل المكونات ودخليها الفرن على حرارة 160 درجة لمدة ساعتين أو لحد العكاوي ما تستوي تمامًا.
• قدميها مع الرز الأبيض وزينيها بالبقدونس.

 

ممكن تشوفي هنا تجهيز وتنظيف المنزل قبل الولادة في العيد

 

• 3 طرق لعمل الفتة

طريقة عمل فتة السجق الشرقي

فتة السجق الشرقي دي مبتكرة جدًا ومختلفة، وتنفع للناس اللي عايزة تاكل وصفة غنية ولذيذة بس من غير غلبة ووقت طويل، زي الوقت اللي بتاخده عمل الفتة العادية وخصوصًا سلق اللحمة. السجق غني بالنكهة والبهارات اللذيذة وما بياخدش أي وقت في الطبخ. كمان الوصفة دي مزيج بين النكهة المصرية والنكهة اللبنانية للفتة لإنها بتتقدم مع صوص من الزبادي والطحينة جربوها هتدعولي.

 

المقادير:

• 2 كوب رز مصري مطبوخ
• 700 جم سجق شرقي مقطع قطع كبيرة
• 1 بصل متقطع شرايح
• فلفل ألوان شرايح
• 2 معلقة صغيرة سبع بهارات
• 1 معلقة كبيرة توم مفروم
• 1 معلقة صغيرة كزبرة ناشفة
• 1 كوب عصير طماطم
• 1 معلقة كبيرة صلصة طماطم
• 1 كوب مرقة خضار أو مياه
• ¼ كوب خل أبيض

علشان تعملي الخطوات بالظبط، وكمان لو حابة تعرفي طريقة عمل الفتة المصرية بالخل والتوم وطريقة عمل فتة الريش الضاني، ادخلي اللينك ده

 

• طريقة عمل كفتة الحاتي

مقادير كفتة الحاتي:

• 1 ك لحمة مفرومة (نسبة الدهون 25% ومفرومة وشين)
• 1 بصلة متوسطة (مفرومة ناعم جدًا ومعصورة من مياتها)
• 1 حزمة بقدونس مفرومة
• ملح وفلفل أسود
• 2 معلقة صغيرة بهارات لحمة
• 2 معلقة صغيرة كبابة صيني
• 1/2 معلقة جوزة الطيب
• 1/4 معلقة صغيرة بيكربونات الصوديوم
• 1 معلقة كبيرة بقسماط ناعم

 

طريقة عمل كتفة الحاتي:

• كاخلطي كل مكونات الكفتة مع بعض واعجنيها كويس، وتقدري كمان تخلطي كل المكونات باستخدام محضرة الطعام.
• صبعي الكفتة باستخدام أعواد خشبية وبلي إيدك بمياه البصل المعصورة.
• سيبي الكفتة في التلاجة لمدة ساعة تتشمع من غير ما تغطيها.
• اشوي الكفتة في طاسة سخنة على البوتوجاز، أو في صينية فرن، أو على الشواية الفحم.
• قدميها مع البقدونس وسلطة الطحينة، وبكده خلصتي طريقة كفتة الحاتي.

 

 

• طريقة عمل الكبدة الإسكندراني

 

مقادير عمل الكبدة الإسكندراني:

• ½ كيلو كبدة كندوز متقطعة شرايح
• 1معلقة صغيرة كمون
• 1 معلقة صغيرة من الكزبرة الناشفة
• ¼ معلقة من جوزة الطيب
• 1 معلقة كبيرة خل أبيض
• 5 فصوص توم مفرومين ناعم
• 1 قرن فلفل حار اختياري
• شرايح فلفل أخضر
• عصير ليمون
• ملح وفلفل
• زيت نباتي لتشويح الكبدة

ممكن تشوفي الطريقة خطوة بخطوة هنا 

 

• طريقة عمل فخدة الخروف المشوية في الفرن

المقادير:

• فخدة ضاني (وزنها في حدود 2.5 كيلو)

تتبيلة فخدة الخروف المشوية:

• 2 كوب زبادي (كوب معياري)
• 1 معلقة كبيرة نعناع مجفف
• 1 معلقة كبيرة كبابة صيني
• 1 معلقة كبيرة سبع بهارات
• 2 حبة طماطم مبشورة
• ملح وفلفل أسود
• 10 فصوص توم مفرومين
• 1/4 كوب صويا صوص
• 1/4 كوب دبس الرمان
• 1/4 كوب عصير ليمون

لتسوية فخدة الخروف:

• 2 بصلة مقطعة شرايح
• 3 حبات بطاطس مقطعة قطع كبيرة
• 2 حبه جزر شرايح
• 1 كوب كرفس مفروم
• 3 ورقة لورا
• 2 عود روزماري
• 5 فصوص توم سليمة
• 2 كوب مرقة لحمة أو ماء

 

طريقة عمل فخدة الخروف المشوية في الفرن:

• اخلطي كل مكونات التتبيلة، وبالسكينة قومي بعمل شقوق في الفخدة وتبليها كويس بالتتبيلة ودخليها جوه الشقوق عشان تتوغل جوه اللحمة، سيبي الفخدة في التتبيلة لمدة ليلة كاملة.
• في صينية فرن كبيرة قومي بعمل قاعدة من الخضراوات والروزماري وورق اللورا وفوقهم الفخدة المتبلة وضيفي كوب من مرقة اللحمة وغطي الفخدة بالفويل.
• سخني الفرن قبل تسوية الفخدة بـ30-60 دقيقة على أعلى درجة حرارة، اخبزي الفخدة متغطية في الفرن لمدة ساعة، وبعدين ارفعي الفويل ونزلي حرارة الفرن لـ200 درجة لحد ما تستوي الفخدة تمامًا ولو حسيتي إن الخضراوات ناشفة ومحتاجة مرقة زودي.
• قدميها مع الرز بالمكسرات وسلطة الزبادي.

 

• طريقة عمل الحواوشي

المقادير:

• 1 ك لحم مفروم كندوز(نسبة دهون 20%)
• 1/4 كيلو لحم ضاني مفروم
• 2 بصلة كبيرة مفرومة
• 3 حبات فلفل أخضر مفروم
• 2 فلفل أحمر حار مفروم
• 5 فصوص توم مفروم
• 1 معلقة كبيرة بهارات الحواوشي
• 1 معلقة صغيرة جوزة الطيب
• 1 معلقة صغيرة كبابة صيني
• 1 معلقة صغيرة بابريكا
• ملح وفلفل إسود
• 5 أرغفة عيش بلدي
• زيت نباتي

طريقة عمل الحواوشي:

• في محضرة الطعام، اخلطي كل المكونات مع بعض لحد ما يبقى المزيج متجانس.
• وزعي خلطة الحواوشي في العيش البلدي وادهني العيش بالزيت النباتي من كل الجوانب ورصيه على صينية للفرن.
• سويه في الفرن بدون تغطية لمدة 1/2 ساعة أو لحد ما تستوي اللحمة والعيش يتحمص من بره. قدميه مع سلطة بلدي وسلطة طحينة.

 

 

• طريقة عمل شاورما اللحم

 

مقادير شاورما اللحمة:

• 1/2 كيلو لحمة كندوز من وش الفخدة، مقطعة شرايح رفيعة
• 1/4 كيلو دهون كندوز أو ضاني مقطعة قطع صغيرة
• 1 بصلة متوسطة مقطعة شرائح
• 1 معلقة كبيرة خل أبيض
• 1 معلقة كبيرة عصير ليمون
• 3 معلقة كبيرة زيت نباتي

طريقة عمل شاورما اللحمة وتتبيلة الشاورما بالتفصيل هنا 

 

لو عندك أطفال في سن صغير ممكن تشوفي ” امتى ينفع يشوفوا ذبح الأضحية ” .. وبكده بنكون قدمنا لك منيو العيد فيها أشهر أكلات عيد الأضحى اللي كلنا بنحبها .. وكل سنة وأنتم طيبين.

 

هل عندك تعليق على المقال ده؟ شاركينا هنا

Leave a Comment Cancel Reply

Δ

التعليق باستخدام حساب فيس بوك