محتويات المقال
مفيش ست أو أم مش بتستحضر إفيه من إفيهات من مسلسلات عبلة كامل وأفلامها، وكمان تعبيراتها وتعليقاتها المميزة بصورة يومية، في كل موقف بنلاقيها حاضرة بشكل أو بآخر، سواء كان الموقف جد أو هزار، حب أو قسوة، في كل الحالات عبلة كامل بصوتها وآداءها بقيت جزء من يومنا كأمهات وستات بشكل مبهر.
حتى لما نفتح تليفوناتنا، صور عبلة كاملة بتفضل مصاحبانا، محدش ممكن ينسى الضحك اللي ضحكه في أفلام عبلة كامل أو مسلسلاتها: لن أعيش في جلباب أبي، أو فيلم عودة الندلة، أو اللمبي، في المقال ده جبنا لكم أشهر إفيهات وجمل عبلة كامل.
بتزهق بسرعة
عبلة كامل في فيلم اللمبي
مع الزن مفيش أم مش بييجي عليها لحظات زهق اللي هو لو اتنططت مش هاعمل لك اللي انت عاوزه، الزن مش بيجيب نتيجة، وهنا بتلاقيكي غصب عنك بترددي الجملة المعبرة لأم اللمبي “كان على عيني يا لمبي”..
اقرأي أيضا: 10 أفلام ملهمة لكل أم
أم بتدلع ولادها
مشهد الامتحان في فيلم اللمبي
كام أم بتدلع أولادها في الصح والغلط؟ حتى الفئة دي من الأمهات عبلة كامل عبرت عنهم في فيلم اللمبي لما بدأ تنصح ابنها وهو في طريقه للامتحان أشهر نصيحة في العالم: “ساندويتشاتك فى إيدك .. قلمك ومسطرتك فى كيسك .. ومذاكرتك فى دماغك اللي يقول لك غششنى قطعه .. غش أنت”
الست الغامضة
شخصية فاطمة كشري في مسلسل لن أعيش في جلباب أبي
– مالك يا فاطمة
– مفيش حاجة يا عبده
مين في مصر ما بتبقاش زعلانة ولأول وهلة لما تتسأل تقول مفيش؟ الحقيقة مسلسل لن أعيش في جلباب أبي وتحديدًا شخصية فاطمة كشري عبارة عن إفيه كبير عظيم.
مضيافة جدًا
كل إنت يا عبده ماتشغلش بالك بحد
طبعًا فرح سنية في لن أعيش في جلباب أبي أصبح أيقونة في الضحك والكوميديا لكن تبقى أكتر جملة مؤثرة ورائعة فيه جملة فاطمة لعبد الغفور وقت افتتاح البوفيه العظيم واللي ما اهتمتش إنها تاكل أو تقعد ترتاح من التعب قد ما كانت مهتمة بعبده ولحظتها قالت له الجملة الشهيرة: “كل يا عبده انت .. مالكش دعوة بحد”
مستبيعة
ريا وبديعة في مشهد من مسلسل ريا وسكينة
في مسلسل “ريا وسكينة” لما اتحكم على ريا وأختها سكينة بالإعدام، وهي واقفة جوا القفص بنتها الصغيرة بديعة جريت عليها بخوف، لكن لإن الشخصية قاسية وما عندهاش مشاعر ردت الرد الشهير: “بس يا بت هي موتة ولا أكتر”
صاحبة صاحبتها
جليلة ونعمة في مسلسل ريا وسكينة
مستحيل تقدري تمسكي دموعك في المشهد ده بالذات من مسلسل “حديث الصباح والمساء” لما عبلة كامل “جليلة” بتقف قدام جثمان صاحبتها نعمة وبتبكي بحرقة على فقدها وتقول لها الجملة الشهيرة: “عدمت الحبايب من بعدك يا نعمة.. خديني جمبك ياختي ”
بتقدر الكلمة الحلوة
جليلة ومعاوية في حديث الصباح والمساء
من نفس المسلسل محدش ممكن ينسى جملتها لجوزها معاوية واللي كانت فيه شخصية قوية جدًا لكن بتحب وتقدر جوزها جدًا، رغم شخصيته اللي ما تجيش حاجة في قوتها وجبروتها، خلطة عجيبة جدًا، لكن فجأة بيبان سر التقدير والحب الشديد من شخصية جليلة لجوزتها معاوية واللي لخصته في جملة عظيمة: “كفاية إنك كل ما تبص في وشي تقول: وأما بنعمة ربك فحدث”
قلبها بيحب بجد
عبلة كامل في فيلم قشر البندق
في فيلم قشر البندق، عبلة كانت بتحكي لصاحبتها عن الولد اللي هي بتحبه، فقالت لها جملة عظيمة ومؤثرة جدًا: “مش مهم يساوي إيه عند مين، هو عندي يساوي الدنيا كلها”
بتتراضى بكلمة
وداد في فيلم هيستريا
في فيلم هيستيريا، وداد كانت شخصية طيبة جدًا ومجنونة جدًا وغلبانة جدًا، كل اللي كانت محتاجاه شوية تقدير صغيرين جدًا ممكن تعمل قصادهم تضحيات عظيمة وتنسى تعبها ووجعها كله، وداد قالت في الفيلم ده جملة عبقرية برضه محدش يقدر ينساها: “أنا ممكن ولا آكل ولا آشرب بس الراجل اللي بحبه يطبطب عليا وكدهون ويقولي سلامة رجلك من الوقفة يا وداد”
بتتعب من قلة التقدير
شكران في هوانم جاردن سيتي
شكران في هوانم جاردن سيتي كانت بتحب ابن عمها جدًا، وبتسامحه كتير على تصرفاته الغبية، لكن هو عمره ما قدر ده. لذلك في مرة من المرات لما قررت تمشي وافتكر إنه بيحبها، وقفت وقالت له حوار طويل ختمته بجملة باعتبرها الماستر سين في مسلسل هوانم جاردن سيتي:
“أنا عمري ما كنت ست قليلة، أنا بس كنت بسيطة معاك، يا ريتك كنت قدرت ده”
راحة بالي هي منصة لراحة كل أم، انضمي لأكبر وأهم مجتمع دعم للأمهات في مصر هنا. وفري احتياجاتك ومصاريفك اليومية من خلال كارت خصومات راحة بالي هنا. اخسري وزن الحمل والرضاعة وكلي أكل صحي في برنامج رياضي ونظام غذائي متفصل على احتياجاتك هنا.
التعليق باستخدام حساب فيس بوك