محتويات المقال
الناس اللي مناعتها ضعيفة هم الأكتر عرضة للإصابة بفيروس كورونا، دي أول مقولة طبية موثوقة اتقالت بعد انتشار covid-19، بس للأسف ترتب عليها كمية مغالطات رهيبة وانتشرت بين الناس بسرعة. والنصايح اللي الأطباء قالوها لزيادة المناعة، الناس تناقلوها على أساس إنها علاج لمرض كورونا. وده نفس اللي حصل مع المطهرات والأدوية، كل ما الدكاترة ينصحوا بحاجة المفروض نلتزم بيها حرفيًا، الناس تغير فيها وتنشرها، فيه منهم اللي عاوز يتشهر على السوشيال ميديا، وفيه اللي عنده أسباب تجارية خاصة، والنتيجة التأثير سلبًا على صحة الناس، وقلة وعي أثرت في زيادة عدد المصابين بفيروس كورونا. علشان كده هنقول لكم أكتر النصايح الخاطئة المنتشرة بين الناس على السوشيال ميديا، علشان تتجنبوها تمامًا:
التوم:
فيسبوك منتشرة عليه بوستات كتيرة جدًا بتتكلم عن إن التوم بيمنع العدوى من فيروس كورونا، وكان رد منظمة الصحة العالمية إنه “غذاء صحي قد يحتوي على بعض الخصائص المضادة للميكروبات” لكن مفيش أي دليل طبي إن التوم بيحمي من الإصابة بفيروس كورونا الجديد. ومفيش مانع من تناول التوم باتزان وبدون مبالغة، لأن جه خبر في صحيفة (South China) إن فيه ست جالها التهاب حلق شديد جدًا لأنها أكلت كيلو ونص توم دخلت بسببه المستشفى.
الأدوية اللي بتحتوي على الكلوروكين أو (المكملات المعدنية):
فيه شركة هي اللي طلعت الإشاعة دي، إن في دوا اسمه MMS قادر على علاج فيروس كورونا، وانتشرت عندنا بوستات بتقول إن أدوية “بلاكونيل” وأي أدوية فيها الهيدروكسيد كلوروكين، والكلوروكين لها تأثير كبير على فيروس كورونا. في حين إن مفيش أي دليل علمي أو طبي على كده، بالعكس الأدوية دي لو استخدمت بدون إشراف طبي ممكن تسبب خطورة على حياة الإنسان.
صنع المطهرات في المنزل:
بعد نصائح الأطباء بتطهير الأيادي والأسطح، بقى فيه طلب كبير على المطهرات الجاهزة، ومرات بيحصل عجز فيها فعلًا. وهنا بدأ بعض الناس باقتراح خلطات منزلية الصنع، وبعض الشركات التجارية بدأت تعمل “جل” مطهر للإيد بمواد مش فعّالة في محاربة فيروس كورونا أصلًا. وللأسف ناس كتير اتضررت صحيًا من الوصفات دي بسبب خلط مواد كيميائية ببعضها، فالأفضل استخدام الكلوركس المخفف مش المركز لتطهير الأسطح والأرضيات، مش لجسم الإنسان.
شرب الماء كل 15 دقيقة:
فيه بوست انتشر على فيسبوك بيقول إن فيه طبيب ياباني بيوصي بشرب الماء كل 15 دقيقة لطرد أي فيروس دخل الفم، وأخد 250 ألف شير بالعربي. ورد على الكلام ده البروفيسور في جامعة أكسفورد ترودي لانج Trudie Lang إن فيروس كورونا هو فيروس تنفسي، فدخول الماء لمعدتك مش هيفيد، وشرب الماء باستمرار مفيد في الحفاظ على رطوبة الجسم لكن مش في محاربة مرض كورونا.
الحرارة وتجنب الآيس كريم:
انتشرت نصايح نُسبت لليونيسيف بتتكلم عن شرب الماء الدافي والاستحمام بالماء الساخن واستخدام السشوار والتعرض للشمس وتجنب أكل الآيس كريم، وردت تشارلوت جورنيتسكا Charlotte Gornitzka اللي بتشتغل في منظمة اليونسيف وقالت إن كل المعلومات دي خاطئة ومش بتأخر الإصابة بفيروس كورونا، وإن الأقاويل اللي بتقول إن الفيروس هينحسر في الصيف هي معلومات غير مؤكدة طبيًا وعلميًا. ولكن غسل المفروشات على درجة 60 مئوية هي طريقة مؤثرة لقتل الفيروس الموجود على النسيج، وهي دي درجة الحرارة المناسبة لقتل الفيروس واللي لا يمكن جسم الإنسان يستحملها سواء في الاستحمام أو الشرب.
ونصيحتنا ليكي طول الوقت إنك ما تنفذيش أي نصيحة منتشرة على السوشيال ميديا إلا لما تتأكدي من صحتها من دكتور موثوق، وحاولي تكوني سبب في توقيف الإشاعات من الانتشار. مع تمنياتنا ليكي ولكل عيلتك بالصحة والعافية.
التعليق باستخدام حساب فيس بوك