محتويات المقال
ما أفتكرش فيه حد مننا مفيش في دايرة معارفه، أصحابه أو قرايبه حد عاش في السعودية وقضى فيها معظم طفولتة أو كلها، وعنده معاها ذكريات كتير قوي دايمًا يفتكرها ويحكي لنا عنها. ومن أكتر الذكريات اللي دايمًا يتحكي عنها ونسمعها منهم هي ذكرياتهم مع أكلات سعودية متميزة وتقليدية، وقد إيه الأكل عندهم مختلف، ومميز ومكوناتهم طازة وغنية، ونكهاتهم العربية اللذيذة اللي بتعززها التوابل الشرقية العطرية اللي مشهور بيها أهل السعودية.
المطبخ السعودي بيتقسم لمطابخ متعددة بتختلف باختلاف المنطقة الجغرافية أو الإقليم الموجود فيه، يعني مثلًا هنلاقي المطبخ النجدي في إقليم نجد، والمطبخ الحجازي في إقليم الحجاز، والمطبخ الإحسائي في الإحساء، والمطبخ الجنوبي في المنطقة الجنوبية. تعالوا النهارده نروح لعالم المطبخ السعودي نستكشفه، ونتعرف على أشهر 5 أكلات سعودية بنكهاتها العربية الأصيلة. وفي نهاية المقال ده، هتعرفوا قد إيه المطبخ السعودي مطبخ أصيل وبيتميز بأكلات ووصفات كتير غير الكبسة اللي تعتبر هي الأكله الأشهر، لكن فيه أكلات تانية كتير ما نعرفهاش، تعالوا نتعرف عليها مع بعض.
أشهر 5 أكلات سعودية
- الجريش.
- المطبق السعودي.
- المعصوب.
- اللحم المقلقل.
- الحنيز
-
الجريش
المصدر youtube
الجريش طبق معروف ومشهور مش بس في السعودية، لكنه كمان معروف عند أهل الأردن وفلسطين وجنوب العراق. الجريش من الأطباق اللي اتشهرت بيها منطقة نجد، وسبب تسميته بالجريش إنه بيتعمل من نوع معين من القمح المجروش خشن، عشان كده سموه الجريش!
هو شبيه شوية في طريقة الطبخ بالكِشك يعني مرقة لحمة أو فراخ مع لبن أو زبادي، وبيستوي فيها الرز المصري وعلى الوش بنحط بصل مقلي. ده بس عشان أقرب لكم الصورة، لكن هو بيختلف في نكهاته وقوامه بشكل كبير. وأكبر اختلاف طبعًا هو استخدام الجريش نفسه.
طريقة عمل الجريش
الجريش بيتحضّر باللحمة أو الفراخ، بيتطبخ الجريش (القمح المجروش) مع كمية من الرز المصري في مرقة الفراخ أو لحم الغنم المشهورة به السعودية على نار هادية جدًا لفترة طويلة توصل لتلت ساعات. بعد كده، يضاف عليه اللبن الحليب أو الرايب أو الإتنين وبيتقدم مع تقلية أو “الكشنة” زي ما بيسميها أهل السعودية، والمكوّنة من البصل المحمر مع اللومي المطحون والكمون والقليل من معجون الطماطم والسمنة أو الزبدة على الوش. الجريش بيتقدم بدون اللحم أو الفراخ. فيه أكلة تانية مشابهة للجريش اسمها السليق بتتعمل بالقمح الكامل غير المجروش.
-
المطبق السعودي
المصدر alhilalalyoum
هي أكلة شعبية حجازية مأخوذة من التراث الماليزي، لكن مع الوقت بقت من صلب المطبخ السعودي. عشان أقرب لكم الفكرة، هي شبيهة لفكرة الفطير الشرقي اللي بيكون جواه حشوات متنوعة، بمعنى إنه بيتكون من عجينة وحشوات ممكن تكون حلوة أو حادقة، زي مطبق اللحم مثلًا أو مطبق الموز.
من أشهر الحشوات هي اللحمة المفرومة مع البصل والكرات والبقدونس والبيض. المطبق له عجينة مخصوص بيتعمل بيها، لكن مع مرور الوقت واحتياج الناس للوصفات المختصرة السريعة، بقى كتير من الناس بيستخدموا العجاين الجاهزة أو المجمدة اللي بتكون متوفرة في السوبر ماركت زي عجينة السمبوسك. المطبق من الوصفات السعودية اللي قابلة جدًا للتجديد والتطوير والتغيير فيها. عشان كده، اتقدمت بطرق كتير معاصرة ومتميزة. لو انتي من أهل السعودية، نتمنى تشاركينا طريقتك لعمل العجينة وحشواتك المفضلة للمطبق.
وده لينك لطريقة عمل المطبق السعودي على طريقة الشيف وفاء الكندري.
-
المعصوب
المصدر abuzaidrest
وجبة مشهورة جدًا بتتقدم على الفطار أو كنوع من أنواع الحلو وخصوصًا في شهر رمضان، وتعتبر نوع من أنواع أكل الشارع في السعودية أو”street food”. مكوناتها على قد ما هي بسيطة، لكن غنية جدًا والمكونات الأساسية فيها هي نوع من أنواع العيش المصنوع من الدقيق الأسمر مع الأبيض، والموز والعسل، وممكن يتضاف عليها إضافات تانية كتير زي القشطة أو التمر أو المكسرات والفواكه المجففة. وكل محل بيكون له طريقتة الخاصة وإضافاته اللي بيقدمها مع المعصوب. المعصوب طبعًا سعراته الحرارية عالية جدًا وخصوصًا لو مضاف عليه سمنة أو قشطة، وغني بعناصر غذائية متنوعة. عشان كده، الأفضل إنه يتقدم كوجبة فطور متكاملة.
وهتلاقوا هنا لينك لتحضير المعصوب بطريقة سهلة ومختصرة للشيف دعد أبو جابر المعصوب على طريقة شيف دعد أبو جابر
-
اللحم المقلقل
المصدر ngmisr
أكلات سعودية زي المقلقل والحنيز، ما افتكرش حد فينا ينساها بعد المشهد الشهير من فيلم إكس لارج، لما الفنان أحمد حلمي كان عازم دنيا سمير غانم على الأكلات اللي هي بتحبها، ويمكن تكون دي أول مرة نسمع فيها عن اللحم المقلقل والحنيز. اللحم المقلقل وصفة بسيطة بتتقدم في الأعياد وخصوصًا عيد الأضحى.
اتعرفي هنا على قطعيات اللحمة بأسمائها واللي يناسب كل أكلة
طريقة عمل المقلقل
اللحم المقلقل عبارة عن مكعبات صغيرة من لحم الغنم الطازة بتتشوح على النار مع البهارات والبصل والتوم وكمية كبيرة من الطماطم الطازة مع معجون الطماطم وبتتسبك على نار هادية جدًا، لحد اللحمة ما تستوي كويس قوي، والصوص يتركز ويبقى كثيف جدًا. ومعروف دايمًا عن اللحم المقلقل إنه بيكون حرّاق شوية لإن بيتضاف له الفلفل الحار مع تسبيك اللحمة. يقال إن الأكلة دي لها أسماء تانية في الأقاليم المختلفة في السعودية زي “الحميسة”.
وهنا لينك لطريقة عمل اللحم المقلقل على طريقة شيف أفنان طريقة عمل اللحم المقلقل.
-
الحنيز
المصدر akhbarak
واحدة من الوجبات الشعبية المميزة جدًا في أغلب مناطق المملكة، وتعتبر من أقدم الوصفات في تاريخ الجزيرة العربية. الحنيز وجبة معقدة شوية في تحضيرها وبتحتاج حرفية عالية عشان تتحضر على أصولها. وبتحتاج كمان نوع معين من الأفران اللي بتكون مبنية تحت مستوى الأرض عشان تستوي فيها الوجبة. أكتر حاجة مميزة في الحنيز هي طريقة تسوية اللحم سواءً كان تيس أو كبش كامل بدون تقطيع، ودي الطريقة الأصلية، أو مقطع لقطع أصغر على رماد النار الموجودة في الأفران اللي اتكلمنا عنها. بالتالي كل الدهون والطعم الموجود في اللحمة بينزل على الرز أو الخضار الموجود تحت اللحمة ويعزز طعمها بشكل خطير.
لحم الحنيز بيتغلف أثناء تسويته بنوع من أوراق الأشجار اسمه شجر المرخ، اللي بدورها بتحمي اللحم من إنه يتحرق، وكمان بتضيف له مذاق مميز.
زي أغلب الوصفات التقليدية القديمة، وصفة الحنيز اتعرضت لتطورات كتير عشان الناس تقدر تقدمها وتطبخها بسهولة في البيوت، لكن تظل الطريقة التقليدية في الأفران هي الأطعم والأشهر والأكثر أصالة.
في النهاية، أحب أقول لكم إن أغلب الأكلات دي ممكن تكون لها أصول من أماكن تانية في الخليج العربي، مش شرط تكون أصولها سعودية، لكن كل بلد بتضيف عليها من لمساتها وتراثها ومكوناتها وروحها. وكتير من الأكلات العربية بيكون لها نسخ متعددة في أكتر من بلد، وساعات أكتر من نسخة وطريقة جوه نفس البلد.
نتمنى يكون المقال ده قدم لك ولو نبذة بسيطة عن أكلات المطبخ السعودي الغني الأصيل، ولو انتي من أهل السعودية، نتمنى إنك تشاركينا معلومات أكتر عن المطبخ السعودي وأكلاته اللذيذة.
التعليق باستخدام حساب فيس بوك