محتويات المقال
بعد الولادة وفحص الطفل، الأم بتستلم جدول تطعيمات لطفلها، متقسم على سنواته الأولى، ولما الأم بتفوق من الولادة وتبدأ تركز، بتلاقي آراء كتير بتتقالها عن التطعيمات، منها اللي بيأكد على أهمية التطعيمات، ومنها اللي بيقول على معلومات مخيفة عنها، وللأسف كتير من الآراء دي بتكون خرافات، علشان كده في المقال ده هنقول لك على أشهر 5 إشاعات عن التطعيمات وحقيقتها:
-
الإشاعة الأولى: التطعيمات بتسبب التوحد
رغم إن اضطراب التوحد لحد دلوقتي مش معروف له سبب محدد، إلا إن في كلام بيتردد إن التطعيمات سبب من أسباب التوحد.
-
الحقيقة:
إن الكلام ده غير دقيق، وماينفعش نطلقه بشكل عام على كل التطعيمات، وبالتالي تمتنع الأم عن تطعيم طفلها، والحقيقة إن كان في مادة اسمها ” الثيميروسال (Thimerosal)” وهي مادة حافظة بتحتوي على كمية ضئيلة من الزئبق، كانت بتكون موجودة في بعض اللقاحات، واتقال عنها إنها ممكن تسبب توحد، لكن من سنة 2001 اتوقف دخولها في اللقاحات، وأثبتت كل الدراسات الطبية إن مفيش أي علاقة بين التوحد وبين التطعيمات.
-
الإشاعة التانية: كل التطعيمات بتسبب أعراض جانبية
كل الأمهات بيكونوا خايفين من الأعراض الجانبية اللي بتظهر على الأطفال بعد التطعيم، زي تورم المكان اللي اتاخد فيه التطعيم، أو ارتفاع الحرارة، والقلق والبكاء.
-
الحقيقة:
إن مش كل التطعيمات لها أعراض جانبية، لإن في تطعيمات بتكون عن طريق الفم، فمش بيحصل أي تورم، وفي تطعيمات عن طريق الإبر بس مش كل الأطفال على سبيل الحصر بيحصل لهم أعراض جانبية، حتى التطعيم الخماسي واللي بتكون أعراضه الجانبية شبه مؤكدة، وهو تطعيم بيشمل 5 تطعيمات، وهي الدفتيريا، والتيتانوس، والسعال الديكي، والالتهاب الكبدي، والانفلونزا البكتيرية، والأطفال بياخدوه في سن شهرين وأربعة أشهر وستة أشهر، تقدر الأم تتفادى الأعراض دي بإنها تدي طفلها تطعيم ” هيكساكسيم” واللي بنقول عليه برضه “التطعيم السداسي” وهو التطعيم الخماسي العادي بالإضافة لتطعيم شلل الأطفال بالحقن، لكن بدون أعراض جانبية مقلقة.
-
الإشاعة التالتة: التطعيمات مش آمنة
والكلام ده بيقوله بعض الأطباء أو العاملين في المجال الطبي، وعلى الأساس ده كتير من الأمهات بتخاف تدي أطفالها التطعيمات.
-
الحقيقة:
إن السلبيات اللي ممكن تحصل من التطعيم بتحصل لنسبة 1 من كل مليون شخص أخد التطعيم، وإن السلبيات دي خطورتها أقل بكتير جدًا من الأمراض اللي ممكن يصاب بيها الطفل لو ما أخدش التطعيم، وكتير من الأمراض الفتّاكة انحسرت بسبب التطعيمات المقاومة لها.
-
الإشاعة الرابعة: التطعيمات مش فعّالة ولا ناجحة
والكلام ده يعتبر كلام مطلق ولا يستند على أي دليل علمي.
-
الحقيقة:
الرد على الخرافة دي مش هيكون بكلام مطلق إنه لا التطعيمات فعّالة، ولكن بإحصائيات وأدلة:
أولًا: أي تطعيم علشان يظهر للاستخدام العام، بيمر على إجراءات الموافقة الأميركية (FDA) والأوروبية، واللي بتشمل العديد من التجارب السريرية العشوائية مزدوجة التعمية، وعلى 3 مراحل على الأقل، إضافة للعديد من الإجراءات التانية للتأكد من عدم حصول تشويش في نتائج البحث.
ثانيًا: كل الدراسات الوبائية بتقول إن حصل إنخفاض كبير جدًا وحقيقي في نسبة الإصابة بالمرض، والوفيات بالمرض، نتيجة تلقى التطعيمات واللقاحات الأساسية والإجبارية.
-
الإشاعة الخامسة: التطعيم المضاد للمكورات الرئوية، بيتسبب في وفاة الأطفال
والكلام ده جه نتيجة وفاة 4 أطفال من اليابان و3 من فنلندا بعد ما أخدوا تطعيم المكورات الرئوية.
-
الحقيقة:
إن الأطفال دول فعلا ماتوا بعد التطعيم، لكن موتهم كان سببه بعيد كل البعد عن التطعيم، وده اللي اظهرة تشريح ما بعد الوفاة، إن أسباب وفاتهم مكانتش بسبب التطعيم اللي أخدوه.
وزي ما بننصحك دايمًا عزيزتي الأم، إنك تسمعي آراء المختصين، والطبيب المتابع لطفلك، ومتاخديش معلوماتك من غير المختصين أو من المواقع غير الموثوقة.
مع تمنياتنا لطفلك بوافر الصحة والعافية
راحة بالي هي منصة لراحة كل أم، انضمي لأكبر وأهم مجتمع دعم للأمهات في مصر هنا. وفري احتياجاتك ومصاريفك اليومية من خلال كارت خصومات راحة بالي هنا. اخسري وزن الحمل والرضاعة وكلي أكل صحي في برنامج رياضي ونظام غذائي متفصل على احتياجاتك هنا.
المصادر:
التعليق باستخدام حساب فيس بوك