لما ابني\بنتي حد من أصحابهم يرفض يلعب معاهم أو يقول لهم “أنا مش بحبك” وولادنا ييجوا يشتكوا لنا، طبيعي كأمهات هنتضايق عشان ولادنا جدًا، بس ممكن زعلنا عشانهم ومحاولتنا لترضية خاطرهم دي تبقي بتضرهم ساعات زي لما نقول لهم: “ولا يهمك يا حبيبي، دول ما يستاهلوش” \ “دول مش كويسين، أحسن!” أو أي محاولة لإلقاء اللوم على الطرف اللي قدامهم من غير ما نساعد ولادنا بجد يتعودوا يفكّروا في سبب المشكلة ويحلّوا مشاكلهم من غير ما يكون أسهل طريق هو إلقاء اللوم على الطرف التاني، حتى لو الطرف التاني غلطان فعلًا.
طريقة التعامل مع الابن الوحيد
طيب في الحالة ده ممكن نعمل إيه ونساعدهم ازاي؟
- إقرار المشاعر:
“اممم أكيد اتضايقت جدًا” / “فعلًا حاجة تزعل قوي بجد”
لإن مشاعر الضيق أو الغضب من الموقف ده مشاعر طبيعية ومشروعة، لازم أدي له فرصة يعبر عنها براحته وأدعمه فيها من غير كلام كتير.
- الأسئلة الفضولية:
طيب تعرف هو قال لك كده ليه؟ / طيب تحب تتصرف ازاي في الموضوع ده؟ / تحب أساعدك وأقول لك أفكار؟
وتبدأوا تتكلموا ويحكي لك من غير أحكام عليه منك ولا على صاحبه ولا كلام زي “طز فيه، اللي يقول لك كده قل له أنا كمان مش بحبك” / “أحسن هو الخسران، والكلام ده” لإن ولادنا معرّضين لإحباط كتير طول حياتهم ومواقف زي دي كتير قوي، فاحنا عايزينهم يبقى عندهم مناعة نفسية ويقدروا يتعاملوا من غير ما يتكسروا ومن غير ما يحسوا إنهم ضحية ومن غير ما يبقوا في وضع الهجوم والانتقام.
فكلامك معاه بحيادية وتفريغه لمشاعر الغضب أو الحزن اللي حاسس بيها هيساعده يعمل ربط لعقله مع مشاعره، ويقدر يفكر إيه اللي خلّى صاحبه يقول له كده وإيه اللي يخليه مرتاح فعلًا يتصرف بيه لما يتقال له كده. هل هو فعلًا بيعمل حاجات تضايق أصحابه فيبطّلها أو هل أصحابه شخصيتهم كده وقرروا يغلسوا عليه غلاسة الأطفال، فـوقتها يشوف حل تاني ولّا إيه السبب.
- البحث عن حلول:
آخر حاجة بعد ما ساعدته يفرغ مشاعره وسمعته واتكلمنا، إني أساعده بقى يدور على حلول تريّحه وتخليه ما يتعرضش لأذى من اللي بيقوله كده تاني، وتعرضوا سوا كذا حل وتمرنيه عليه زي إنه يرد أو يتصرف بطريقة معينة.
راحة بالي هي منصة لراحة كل أم، انضمي لأكبر وأهم مجتمع دعم للأمهات في مصر هنا. وفري احتياجاتك ومصاريفك اليومية من خلال كارت خصومات راحة بالي هنا. اخسري وزن الحمل والرضاعة وكلي أكل صحي في برنامج رياضي ونظام غذائي متفصل على احتياجاتك هنا.
التعليق باستخدام حساب فيس بوك