محتويات المقال
تربية الأطفال مش سهلة، والسكريات هي أكتر حاجة الطفل بيطلبها وبيكون عاوزها تقريبا طول الوقت، في وجهات نظر بتقول إن السكريات للأطفال أقل من سنتين غلط وفي وجهات نظر للناس الأكبر في العمر شوية إن مفيش مشكلة والطفل من بعد الـ6 شهور ياكل كل وأي حاجة لدرجة إن البعض بيسقّي للطفل البسكوت في الشاي كوجبة غذائية منفصلة بديلة عن لبن أمه، يا ترى التصرف ده صح ولا غلط وفين المشكلة في السكريات اللي الطفل بياخدها أول سنتين من عمره ؟
اقرأي أيضا: الكمامة وماسك الوش سبب للاختناق للأطفال أقل من سنتين
السكريات للأطفال مش مكافأة
“لو أكلت هديك حاجة حلوة” آباء وأمهات كتير جدًا للأسف بيكافئوا أطفالهم بالسكريات، سواء كجايزة لأنهم أكلوا أو لأنهم عملوا تصرف كويس ونفس الشيء مع الجدات والأجداد، خاصة مع حالة سدة النفس اللي الطفل بيعاني منها في الفترة دي لأسباب زي التسنين أو نقص الحديد أو السكريات نفسها اللي بتكون عامل مساعد في إن الطفل يرفض الأكل.
لذلك أول نقطة لازم نأكد عليها باستمرار إن السكريات مش مكافأة ومش حاجة حلوة نفرح بيها الطفل ونرجع نندم بعدين إنه أخدها، صحيح وشهم بينور وبيفرحوا وبياكلوا كفاية من الحاجات المسكرة لكن محتاجين نسأل نفسنا.. هو ده اللي هم بيطلبوه لكن هل ده اللي هم محتاجينه؟
اقرأي أيضا: الأعمال المنزلية للأطفال حسب كل سنة
كمية السكريات للطفل حسب العمر
جمعية القلب الأمريكية AHA بتوصي إن الأطفال من عمر 6 لـ 18 سنة، مفروض ياخدوا أقل من 25 جرام سكر في اليوم، يعني 6 معالق صغيرة تقريبا، في المقابل مفروض الأطفال الأقل من سنتين ماياخدوش سكر إطلاقا.
لو محتارة تقدري تعرفي كمية السكر من خلال الإرشادات (الملصق) المكتوبة على المنتج، باختصار كل 4 جرام من السكر بيساوي معلقة صغيرة، يعني مثلا 10 جرام سكر بيساوي معلقتين ونص سكر.
أضرار السكريات للأطفال أول سنتين
- زيادة نسب السكر بيفسد ذوق الطفل في عمر مبكر وبيخليه يستهلك كميات سكر أكبر على مدار عمره، ويكون عنده ميل للحلويات والعصاير والمشروبات المحلاة والشوكولاتة وغيرها.
- وجود علاقة بين زيادة السكر وزيادة الحركة والنشاط
- دخول السكر في سن مبكر، بيرتبط بمشاكل صحية بعدها زي السمنة وارتفاع ضغط الدم والسكر من النوع التاني، غير مشاكل أمراض القلب للأطفال والشباب.
- أكل السكريات بيسيب مساحة قليلة في البطون الصغيرة للأكل الصحي فعلا زي الفواكة والخضار والحبوب الكاملة والألبان قليلة الدسم.
إيه الحل؟
في مجموعة حلول ممكن أي أم تستخدمها لترشيد استهلاك السكريات عند طفلها سواء كان عمره أقل من سنتين أو أكتر:
- كلمة السر هي الجوع، كل حاجة بيكون طعمها جميل بالنسبة للطفل لو جعان فعلا، الحل الرئيسي لترشيد استهلاك السكريات، واستبدال الأكل الصحي بالسكريات هو الجوع، إدي طفلك الفرصة إنه يجوع ويطلب الأكل بنفسه أو على الأقل تكوني متأكدة إنه جعان فعلا وقدمي له أكل صحي زي الفواكة والخضار والحبوب الكاملة والألبان قليلة الدسم.
- الروتين، ضروري يكون في روتين صحي للأكل الحلويات مش جزء منه، ونظام واضح للأكل الطفل يكون عارف ومتأكد إنه مفيش بديل سواء عيط أو اتحايل غير الأكل الصحي قدامه
- اتباع عادات أكل صحية زي الأكل وسط لمة العيلة في وجود كل أفرادها هايشجع الطفل إنه ياكل زي باقي الأفراد
- عدم وجود ملهيات أو مشتات زي التلفزيون والتاب والموبايل هايزود وعي الطفل بخصوص الوجبة اللي بياكلها.
اقرأي أيضا: أكلات ممكن تسبب حساسية لطفلك لو عمره أقل سنتين
راحة بالي هي منصة لراحة كل أم، انضمي لأكبر وأهم مجتمع دعم للأمهات في مصر هنا. وفري احتياجاتك ومصاريفك اليومية من خلال كارت خصومات راحة بالي هنا. اخسري وزن الحمل والرضاعة وكلي أكل صحي في برنامج رياضي ونظام غذائي متفصل على احتياجاتك هنا.
المصادر
ويب طب
1 comment
اعجبني المقال واستفدت منه كتر..شكرا جدا