محتويات المقال
المايكرويف دلوقتي واحد من أهم أجهزة المطبخ، وأغلبنا اشتراه واللي لسه ما جابهوش بيفكر يجيبه. ده لإنه عملي ومساعد جدًا في المطبخ حقيقي. لدرجة إن فيه إحصائية في الولايات المتحدة إن 90 % من المطابخ لازم فيها جهاز مايكرويف. لكن على الرغم من الشعبية الواسعة دي، إلا إنه واحد من أكتر الأجهزة اللي أثارت الجدل بين إمكانية إضراره للصحة ومدى فايدة وعملية استخدامه في المهام اليومية للمطبخ خصوصًا إنه يعتبر الصديق الصدوق للمرأة العاملة. فخلينا نشوف هل هو فعلًا له أضرار؟ ومدى تأثيرها على الصحة. يعني تقدري تقولي هنتكلم عن كذا أسطورة متداولة على الإنترنت مبوظة سمعة الميكرويف.
أضرار المايكرويف حقيقية؟
-
أسطورة 1: المايكرويف بيصدر إشعاعات وبيخلي الأكل مشع
هو حقيقي أول ما حد فينا بيسمع كلمة مشع أول حاجة بيفكر فيها هي المفاعلات النووية وأي كارثة نووية عدت على البشرية. وبصرف النظر عن الخيال الجامح ده، إلا إنه في الحقيقة كلمة إشعاع وبشكل مختص بتتكلم على أنواع مختلفة جدًا من حيث الطول والتأثير. ده الشمس نفسها بتصدر إشعاع! بس في حالة المايكرويف، انتي بتتكلمي على إشعاعات قصيرة جدًا لا يمكن يكون لها تأثير عليكي، ده غير إن تركيبة جهاز المايكرويف نفسه محطوط فيها شبكة زي درع واقي بحيث نقطة التسريب الإشعاعي دي ما تحصلش. كل اللي بيعمله المايكرويف إنه بيحرك ذرات المياه اللي موجودة في الأكل وبيخليها تحتك ببعض بحيث إن الاحتكاك ده هو اللي بيخليها تسخن. بس كده، لا فيه أكل مشع ولا إصابات مشعة ولا أي إعلان إن المطبخ منطقة كوارث.
-
أسطورة 2: المايكرويف بيقلل من القيمة الغذائية للأكل
أكيد سمعتي بالقول القائل إن إشعاع المايكرويف بيدمر القيمة الغذائية للأكل. الحقيقة ده مش صحيح، اللي لازم نعرفه إن اختلاف طرق الطهي أيًا كانت بتشيل جزء من القيمة الغذائية لأي صنف أكل، والمايكرويف مش استثناء. بس لا ضرر منه، الأكل هيفضل فيه فايدة برضه ومش هيأثر على صحتك. بل بالعكس، الطهي عن طريق المايكرويف بيعتبر من الطرق الجيدة، لأن في العادي انتي علشان تحتفظي بأكبر قدر ممكن من القيم الغذائية، بتحتاجي إنك تطبخي الأكل بشكل سريع ومياه قليلة، لإن الطبخ وقت طويل وفي مياه كتير بيقلل القيمة الغذائية جدًا. علشان كده، الطهي عن طريق المايكرويف مش بيأثر على القيمة الغذائية للأكل أكتر من الطرق التقليدية.
-
أسطورة 3: الحاويات البلاستيك بتطلق مواد سامة في المايكرويف
الحقيقي إن أي حاوية بلاستيك بتحتوي على كمية كبيرة ومتنوعة من المواد الكيميائية اللي مع بعض بتشكل الحاوية دي. لكن الكلام والقلق كله موجود في مادتين اللي هما: Bisphenol A (BPA) ومادة Phthalates.
والحقيقة إن تناول جرعات كبيرة من الاتنين دول ممكن يحاكي تأثير ومفعول هرمون الأستروجين في الجسم علشان كده تم إتهامهم إنهم سبب زيادة الوزن والعقم وبعض أمراض السرطان.
الحقيقة إن أي تسخين للبلاستيك بيسبب إطلاق كمية بسيطة جدًا من المواد الكيميائية اللي في حد ذاتها أقل بكتير من الحد الأقصى اللي بيوصل للخطر. الموضوع بيحتاج إنك تاخدي جرعة أكبر من المسموح بـ1000 مرة علشان تكوني عرضتي نفسك للخطر. وده لا يمكن يحصل خلال التسخين في المايكرويف. عمومًا علشان تكوني في الأمان، دايمًا غيري حاويات البلاستيك بتاعتك بشكل دوري أو بمجرد ظهور علامات التلف عليها. واستخدمي أواني زجاجية أو خزف في التسخين في المايكرويف تكون مخصصة ليه، لأن فيه أنواع غير مخصصة للمايكرويف.
-
أسطورة 4: المايكرويف بيقتل الأكل الحي
صحيح الجملة السابقة دي مثيرة للقلق ولكمية خيالات مرعبة، بس الحقيقة إنها غير صحيحة بالمرة، والكلام هنا على الخضار مش على أي كائن حي زي الفراخ أو السمك هناخده ونحطه في المايكرويف لإن ساعتها لازم تدخل قانوني سريع. عمومًا اللي لازم يتعرف إن الخضار بمجرد حصاده، فهو بدأ رحلة موته، وإن بمجرد الأكل ما يدخل معدتنا ويلمس أحماض المعدة، فهو كده مات لإن دورها الأساسي إنها تقضي على البكتيريا وأي ملوثات على الأكل لحمايتنا. وبالتالي، التسخين في المايكرويف مش بيسبب قتل لحاجة لإنها أصلًا ميتة.
عمومًا المايكرويف مش بيسبب الأضرار اللي مدعاة عليه، لكن في الآخر، هنفضل ناخد احتياطنا في التصرف مع كل الأجهزة بالشكل اللي يوفر لنا الأمان ويبعد عنا الخطر، أظن دلوقتي مفيش قلق منه، ولو انتي عندك أي تساؤل بخصوص المايكرويف، سيبيه لنا في الكومنتات واحنا هنرد عليكي.
التعليق باستخدام حساب فيس بوك