محتويات المقال
في نهاية شهر أكتوبر اللي فات، الفنانة رانيا يوسف ظهرت في برنامج تلات ستات على برنامج صدى البلد واتكلمت عن تجربتها مع الجاز في تنعيم وتطويل شعرها. ومن وقتها، بدأت حالة من الجدل الشديد: يا ترى فعلًا الجاز بيطول الشعر وينعمه؟ ولا هو مؤذي وحاجة ماينفعش نعملها؟
بعض المواقع الإلكترونية المشهورة استغلت الترند وبدأت تعدد فوايد الجاز، الموضوع وصل لدرجة إن الجاز بدأ يدخل في وصفات لتنعيم الشعر زي مثلًا الوصفة اللي بتقول “ملعقة زيت خروع، ملعقة زيت جرجير، ملعقة زيت ثوم، ملعقة زيت بصل، ملعقة جاز”.
حدوتة تخوف
زمان مامتي كانت بتحكي لي حدوتة مخيفة جدًا عن ست بناتها كان شعرهم طويل جدًا وزي الحرير، تلات بنات مفيش أجمل منهم بعيون خضرا وشعر أصفر زي الأجانب، فجأة ماتوا هم التلاتة مع أمهم، والسبب إن مامتهم خلطت توكسافين مع جاز عشان تقضي على الحشرات في شعر البنات! من وقتها وأنا بقيت عارفة كويس إن الوصفات الخطيرة من النوع ده ما ينفعش نستخدمها على جسمنا أو شعرنا بأي شكل.
رانيا يوسف والجاز
“آه طبعًا باحط جاز مش عيب، وآه باستحمل ريحته، مش وحشة قوي يعني، بيقوي بصيلة الشعر ويلمعها ويقويها، دي وصفة جدتي زمان عشان يقوي شعري، المهم محدش يولع جنبي سيجارة”. الكلام ده قالته رانيا يوسف في البرنامج وضحكت وكملت: “كمان الفلفل الأحمر المشطشط على زيت زيتون على شعرك بينشط الدورة الدموية”!
الوصفة سبق وقدمتها رانيا من 6 شهور على قناتها الشخصية على موقع يوتيوب. وقتها كانت بتعاني من مشكلة صحية فقدت بسببها جزء كبير من شعرها، فقصته وبدأت تستخدمه ضمن حمام زيت فيه زيوت كتير زي الأرجان والزيتون واللوز و”الجاز”.
كثير من الترويج المجاني
الحقيقة مش رانيا يوسف بس اللي بتعمل دعاية للجاز، مواقع كتير جدًا بتتكلم عن فوايده لكن بدون مصادر علمية، وكمان بدأ مجموعة كبيرة من الإنفلونسر اللي بيقدموا نفسهم باعتبارهم خبراء في مجال العناية بالجلد والشعر يعملوا فيديوهات يتكلموا فيها عن أهمية الجاز للشعر برضه بدون سند علمي زي مقدمة برنامج مع دودي المذاع عبر فضائية النهار، تحت عنوان “مع دودي فوائد سحرية للجاز”.
المطربة الشابة ميادة سليم أعلنت من خلالها صفحتها إنها بتستخدم الجاز. وبعض المواقع الإلكترونية المشهورة استغلت الترند بشكل رهيب غير عدد كبير اليوتيوبرز اللي استغلوا الترند بنفس الطريقة.
هو مفيد فعلًا؟
في الواقع، أساتذة الأمراض الجلدية طول الوقت بيحذروا من استخدام الجاز على الشعر، وأولهم دكتور هاني الناظر الرئيس السابق للمركز القومي للبحوث، وطبيب الجلدية المصري المعروف اللي قام في فيديو سابق له بالتحذير من استخدام الجاز على الشعر، وقال حرفيًا “الجاز ده إيه؟ مش من المحروقات؟” وبدأ يسأل باستنكار: “انتي بتحطي مادة حارقة على فروة راسك، وده بيسبب التهاب شديد في فروة الراس، بيوصل لحد الجروح في بعض الأحيان، الجاز في الواقع مذيب عضوي، والجلد مادة عضوية، بيسبب تهتك الأنسجة وبيدمر الدهون والكولاجين تحت الجلد، وبيدمر الشعر، مش عارف الناس بتقول إزاي إن له فوايد، المشكلة إنه لو لمس العين أو الفم ممكن يعمل مشاكل كبيرة لأنه مادة سامة.”
التحذير نفسه أطلقه الدكتور عاصم فرج، طبيب الجلدية المعروف، حذر فيه من استخدام الجاز على الشعر خاصةً لو كان الغرض القضاء على الحشرات.
التعليق باستخدام حساب فيس بوك