رغم إن الفريزر يعد صديق المرأة الأيام دي، خصوصًا فيما يخص إعداد وجبات وحفظها في الفريزر، علشان الأيام اللي بتكون زحمة وما فيهاش وقت للطبخ. بس اللي كان مفاجئ لينا إن فيه أكل كتير ما ينفعش أبدًا يتحفظ في الفريزر، لإن ده بيكون له أثر سلبي على تكوين الأكل ده أو حتى لدرجة إنه يسبب متاعب صحية. فتعالي نتعرف على الأكلات أو العناصر الغذائية اللي الفريزر عدوها:
طعام ممنوع تخزينه في الفريزر
- الحليب
- البطاطس
- المقليات
- البيض
- الأجبان الطرية
- الخضار والفواكه النية
- اللحمة اللي اتفكت
- المكرونة والرز
- المايونيز
- بعض البهارات
- الحليب:
اللي بيحصل مع الحليب أو اللبن إنه كل ما كان دسم أكتر، كل لما نجمده في الفريزر، ونحب نسيحه، علشان نستخدمه بالشكل الاعتيادي، بنلاقيه فصل لمياه وقطع غير ذائبة. هو مش بيكون بايظ أبدًا! بالعكس سليم وصالح للاستخدام، بس مش بالشكل الاعتيادي مثلًا في قهوتك أو حبوب الفطار. بس تقدري تستخدميه بحرية في المعجنات مثلًا أو البشاميل.
- البطاطس:
البطاطس النية غنية بالمياه. فاللي بيحصل إنها لما تتجمد ويعاد فكها من التجميد، هتلاقي إن كل المياه اللي فيها نزلت وقوامها غير محبب أبدًا والطعم بيتغير. على عكس لو حفظتيها مطبوخة، لأن في الحالة دي، بتكون تخلصت من كمية كبيرة من المياه اللي موجودة فيها، وقوامها أصبح متجانس.
- المقليات:
زي مثلًا الفراخ البانيه، البطاطس المحمرة، صوابع الموتزاريلا، كل دول هتلاقيهم بمجرد ما يتجمدوا، هيفقدوا قرمشتهم الخارجية وهتتحول لشيء شبه العجين غير محبب بالمرة وهتلاقي نفسك مضطرة للتخلص منها.
- البيض الني بقشره:
اللي بيحصل إن مع التجميد، المحتوى السائل اللي في البيضة النية بيتمدد، وده بيسبب لتشقق القشرة. وبالتالي تعرض المحتوى الداخلي ليها للبكتيريا. علشان كده، لو قررتي تشيلي بيض في الفريزر، فلازم يكون مخفوق تمامًا ومحطوط في علبة مكتوب عليها التاريخ علشان تبقى عارفة تستخدميه امتى.
- الأجبان الطرية:
اللي هيحصل مع الجبن دي هو نفسه اللي بيحصل مع اللبن: هتلاقيها لما تيجي تفك، بتنقسم لمياه وقطع بيضاء غير ذائبة. وده هتشوفيه مع الجبن الكريمي والريكوتا والقريش والريكفورد.
- الخضار والفواكه النية:
أغلب الفواكه والخضار بتحتوي على نسبة عالية من المياه. وبالتالي، لما تيجي تستخدميها، مش هينفع أبدًا تجمديها وبعد كده تخرجيها تسيح، لإن التلج هيكون قطع أنسجتها، وسابها حاجة طرية بقوام منفر. أغلب الفواكه والخضروات اللي بتتحفظ مجمدة، بتستخدم مجمدة ومتقطعة بحيث استخدامها يكون مباشر بدون ترك فرصة لها إنها تفك من تجميدها.
- اللحمة اللي سبق فك تجميدها:
اللحمة اللي تم فك تجميدها ممنوع تمامًا إن يعاد تجميدها. اللي بيحصل إن تنشيط نمو البكتيريا على سطحها بيعلى، وده ممكن يكون له تأثير خطير جدًا على مستخدم اللحمة.
- المكرونة والرز:
المكرونة والرز اللي تم طهيهم من أعداء الفريزر، لأن اللي هيحصل وبسبب احتوائهم على النشويات بجانب المياه. إن لما يتم فك تجميدهم، فهم هيتكسروا والطعم هيكون سيء فعلًا.
- المايونيز:
كتير مننا بتحب تعمل المايونيز في البيت كشكل من أشكال الحرص على صحة البيت، بس اللي هيحصل إن لو عملتي كمية كبيرة وفكرتي تشليها في الفريزر، هتخسريه لإنه هينفصل لمياه وكتل، ومش هينفع يستخدم تاني.
- بهارات معينة:
بودرة التوم والبصل والبابريكا طعمهم بيتغير لو اتحطوا في الفريزر.
دي كانت قائمة بأشهر المأكولات اللي مش مكانها الفريزر أبدًا. أعتقد دلوقتي، هتحتاجي تراجعي على اللي موجود في الفريزر عندك.
أفكار أكلات سريعة بالميكرويف تتعمل في 5 دقايق
المصادر
www.lovefood.com
food.ndtv.com
www.goodhousekeeping.com
التعليق باستخدام حساب فيس بوك