الأسبوع الأول من الحمل دايمًا بيثير التساؤل عند الستات: هل فعلًا له أعراض؟ وهل هي أعراض شائعة؟ وإيه هي الأعراض دي؟ وأسئلة تانية كتير. بس الحقيقة إن أغلب الستات مش بتعاني من أعراض الحمل المبكرة في الأسبوع الأول، وفيه ستات بتحس بأعراض خفيفة ممكن ما تكونش مثار انتباه بالنسبة لها. والباقي من السيدات بتكون الأعراض دي واضحة جدًا. بس زي ما قلت لك، الأغلب مننا مش بيحس بحاجة.
طبيًا، يقوم الأطباء بتحديد موعد الأسبوع الأول من الحمل من آخر يوم في آخر دورة شهرية زارتك، على الرغم إن فعلا ممكن ما تكونيش حامل أساسًا في التاريخ ده. بس دي أسهل طريقة لتحديد امتى هتكون الولادة. في المقال ده، هنتكلم معاكي عن أعراض الأسبوع الأول الفعلي لكي، واللي عمومًا بنعتبر إن تأخر الدورة الشهرية عن موعدها الاعتيادي علامة أولى على حدوث الحمل. وهنا بيجي السؤال: هل بتحسي بأعراض في الأسبوع الأول؟
بيحصل الحمل اللي هو تخصيب البويضة بحيوان منوي خلال 14 يوم من أول يوم للدورة الشهرية. والتخصيب بيحصل في قناة فالوب وبعدها بتخرج البويضة المخصبة إلى الرحم وبيحصل الانغراس في فترة من 6 لـ 7 أيام. واللي هو التصاق البويضة بجدار الرحم. وأوقات الانغراس ده بيسبب انفجار للأوعية الدموية. وبالتالي، هتلاقي حدوث نزيف خفيف وتشنجات خفيفة.
أعراض الحمل المبكرة في الأسبوع الأول
- النزيف
هو بيكون خفيف جدًا ولونه وسمكه مختلف عن الدورة الشهرية العادية. هيكون بعض نقاط من الدم، أو إفرازات وردية ممكن تستمر لساعات أو كام يوم.
- تشنجات أو تقلصات
بعض السيدات بيحسوا بالتشنج نتيجة لانغراس البويضة المخصبة في الرحم. والتشنج ده ممكن يكون في البطن أو الحوض أو أسفل الظهر. والشعور بيتراوح بين تشنجات بتروح وتيجي أو إحساس بعدم الراحة بيختفي بعد أيام.
- الشعور بالغثيان والميل للقيء.
- تغيرات في الثدي: انتفاخ أو وخز، وأوقات ظهور أوردة زرقا.
- التبول أكتر من المعتاد.
- صداع في الرأس بدون سبب.
- ارتفاع في درجة حرارة الجسم.
- انتفاخ في البطن وغازات.
- تقلب شديد في المزاج.
- الرغبة الشديدة في الأكل أو النفور منه.
- حاسة شم قوية وحساسة جدًا.
- الشعور بطعم معدني في الفم.
دي الأعراض العامة اللي ممكن تحسي بيها في أسبوع الحمل الأول، بس أكيد مش كلها، وأوقات مش بتحسي بأي حاجة منها. وعلشان تتأكدي لازم تقومي بعمل اختبار حمل، ويفضل يكون عن طريق الدم لأن نتيجته بتكون أكيدة أكتر من اختبار الحمل المنزلي.
عمومًا بينصح الأطباء إن الأم حتى لو ظهرت عليها أعراض الحمل في الأسبوع الأول، فأفضل وقت لاختبار الحمل بيكون بعد غياب الدورة الشهرية في الفترة من 5 لـ 7 أيام. ساعتها بيكون هرمون الحمل علي في الدم والنتيجة بتكون أكيدة، مبروك مقدمًا.
1 comment
معظم الاعراض كانت عندي و مكنتش عارفه 😂😂