محتويات المقال
حساسية الألبان تعتبر أكثر أنواع الحساسية للعناصر الغذائية انتشارًا، ولما نقول حساسية الألبان فالقصد منها حساسية ألبان البقر تحديدًا، على الرغم إنه محتمل أن أنواع الألبان التانية ممكن تسبب حساسية. ومن المعروف إن لبن البقر بيسبب مشاكل صحية لعدد كبير من الناس مش بس حساسية إنما مشاكل صحية تانية. النوع ده من الحساسية بيصيب الأطفال والرضع بشكل خاص ويعتقد إن نسبة 2% من مجمل الأطفال بيعانوا من حساسية الألبان. النوع ده من الحساسية بيختفي تلقائيًا مع التقدم بالسن عند أكثر من 70% من الحالات وتبدأ القدرة على تحمل الألبان بالتطور والظهور بعمر سنة لحد ثلاث سنوات، لكن من الوارد إن قدرة التحمل دي تحصل في عمر متأخر شوية عن كده. تعالي نشوف الطفل الرضيع حساسية الألبان بتظهر عليه ازاي.
د. محمد فاروق بيقدم لك الدليل الكامل عن حساسية الطعام
الطفل الرضيع – حساسية الألبان
يعني حساسية الألبان عند الرضع بتكون عبارة عن رد فعل تحسسي لنوع من البروتينات الموجودة في الألبان اللي مصدرها من الأبقار، أو من الرضاعة الطبيعية. وهنا لازم نقول إن أمهات الأطفال الرضع اللي بيعانوا من حساسية الألبان حقيقي أبطال،لأن الأم بتحرم نفسها من أحلى الأكلات علشان صحة صغيرها وسلامته، وبتستغنى عن جميع منتجات الالبان بما فيهم اللحوم الحمراء والسمن والجبن كل الأكل الجاهز وغيرها من الأكلات اللي بيدخل اللبن في تكوينها، ده غير معاناتها علشان توصل للتشخيص الصحيح لحالة طفلها.
أعراض حساسية الألبان عند الرضع
أعراض حساسية الألبان بتختلف من طفل للتاني، والأعراض دي بتبدأ في الظهور على مدار شهر وتلاقيها إختفت وبعد كدة ترجع تاني وخصوصا عند الاطفال اللي بيرضعوا طبيعي، وده بسبب إن الحساسية دي مرتبطة بنوع غذاء الأم نفسها ومن الأعراض دي:
- كحة
- صعوبة في التنفس
- اضطرابات في المعدة.
- احمرار وطفح جلدي مثير للحكة.
- تورم في الشفتين وحول العينين والوجه.
- ألم في المعدة.
- القيء.
- الإسهال أو الإمساك.
- السيلان أو انسداد الأنف
- صراخ متواصل.
- سماع صوت حركة الأمعاء خلال وبعد الرضاعة مباشرة.
- التهاب شديد في منطقة الحفاض.
- من الأعراض النادرة وجود دم في البراز.
- تحول لون الجلد إلى الأزرق.
مضاعفات حساسية الحليب للرضع
- الإصابة بالأكزيما.
- الربو التحسسي.
- حمى القش.
- مشكلات في التطور والنمو لدى الطفل.
تحليل حساسية اللبن عند الرضع
عادة الطبيب بيطلب إجراء شوية تحاليل اللي بدورها بتساعد على الكشف عن حساسية اللبن، زي تحليل البراز وتحليل الدم الخفي في البراز، بجانب مراجعة التاريخ المرضي للحساسية في العائلة، ولكن أفضل طريقة للتشخيص السليم هي ظهور تحسن للأعراض مع منع تناول الطفل والأم المرضعة للحليب ومنتجاته.
بعد فترة من المنع بيرجع الطبيب يطلب من الأم المرضعة إنها تدخل اللبن مرة تانية في نظامها الغذائي لتأكيد التشخيص ومتابعة ظهور الأعراض تاني، يعني نقدر نقول إن منع منتجات الألبان يعتبر نص التشخيص وإن إعادة إدخالها هو النص التاني منه.
علاج حساسية الألبان
للأسف لحد دلوقتي ما فيش علاج دوائي محدد للنوع ده من الحساسية، الطريقة الوحيدة هي امتناع الطفل والأم المرضعة عن تناول اللبن ومنتجاته واللحوم الحمراء الأكل اللي بيدخل فيه منتاجات الألبان ومشتقاتها، لحد ما الطبيب المعالج يقرر إدخال الأنواع دي من الأكل في الوقت المناسب، والحلو إن أغلب الأطفال بيتعافوا من حساسية اللبن في عمر 3 إلى 5 سنوات، وأحيانًا قبل كدة كمان.
ومن المهم إن الأم الممتنعة عن تناول اللبن ومشتقاته اللي بترضع طبيعي إنها تعوض جسمها بالمكملات الغذائية وتتناول وجبات مليانة بالكالسيوم وفيتامين “د”، زي اللوز والسمسم والبروكلي وأسماك السالمون والسردين، مع التعرض لضوء الشمس باستمرار.
وفي حالة الرضاعة الصناعية، فيه تركيبات خالية من حليب الأبقار مخصصة للأطفال اللي بيعانوا من حساسية اللبن ، بتعتمد في تكوينها على الأحماض الأمينية أو حليب الصويا، بس من المهم إن الأم التأكد من أن طفلها مش بيعاني من حساسية الصويا أو أنيميا الفول قبل تناوله حليب الصويا.
وفي الاخر هنديكي دليل سريع عن أنواع الأكل اللي فيه ألبان أو مشتقاته علشان تقدري تاخدي حذرك.
مصادر الألبان
- حليب/ لبن كامل الدسم و قليل الدسم ومنزوع الدسم ورائب.
- الزبدة
- الزبادي
- أيس كريم ومثلجات
- جبن وأي حاجة بتحتوي على الجبن
- مزيج الحليب / اللبن والقشطة.
أوقات بيكون من الصعب التعرف على اللبن عند استخدامه كمكون في الأطعمة المصنعة، وده بيشمل المخبوزات واللحوم المصنعة وحتى حبوب الإفطار. تتضمن مصادر اللبن الخفية:
- مصل الحليب/اللبن
- الكازين
- المكونات التي بيبدأ اسمها بمقطع “لاكت” مثل لاكتوز ولاكتات
- الحلويات زي الشوكولاتة والنوجا والكراميل
- مسحوق البروتين
- نكهة الزبد الصناعية
- نكهة الجبن الصناعية
وفي الآخر لازم تعرفي إننا عارفين إنك بتعاني في صمت، وإن حبك لطفلك مخليكي مستعدة تحرمي نفسك من أي حاجة إنتي بتحبيها علشان بس تتجنبي إنه يحس بأي ألم، إنتي أم جميلة وإحنا بندعمك.
التعليق باستخدام حساب فيس بوك