مع دخول الشهر السابع، فانتي دخلتي في التلت الأخير من الحمل، وأكتر فترة بيكتمل فيها نمو الجنين. الحمل عمومًا 40 أسبوع وأي ولادة ممكن تحصل قبل الأسبوع السابع والثلاثين من الحمل بيصنّف الطفل كطفل مبتسر أو خديج واللي غالبًا بيستلزم دخوله الحضّانة وقد يعاني من بعض المشاكل الصحية بسبب عدم اكتمال نموه في الرحم وبيستكمله أكيد خارجه.
الشهر السابع هو الفترة اللي ما بين الأسبوع الـ25 والأسبوع الـ28، وزن الجنين زايد في الشهر ده وبيضغط على حجابك الحاجز وباقي أعضائك الداخلية. هتحسي إن الانقباضات اللي بتحصل بتحسي بيها بوضوح أكتر الشهر ده، واللي سببها إن جسمك بيتجهز للولادة، بس امتى تكون الانقباضات دي علامة خطر في الشهر ده، ولازم تروحي الطواريء فورًا ده اللي هنتكلم فيه مع بعض في المقال ده، وهتلاقي في مقال مراحل تطور الجنين والحمل: الشهر السابع تفاصيل تطوره وهنا هتلاقي كل شهور الحمل.
أعراض الولادة في الشهر السابع
- نزيف دموي مهبلي سواءً كان خفيف أو غزير.
- تكرار الانقباضات بحيث تبقى أكتر من خمس انقباضات في الساعة.
- تدفق سائل شفاف مهبلي فجأة، لأن ده معناه إن المياه حول الجنين بتقل.
- زيادة في الإفرازات المهبلية.
- آلام في أسفل الضهر مستمرة وبتختفي بتغير وضعك.
- آلام في المعدة مستمرة وطويلة الأمد.
- انتفاخ في جسمك بيظهر بوضوح في اليد والقدم.
- القيء الحاد، أو حتى الإصابة بأعراض تشبه الإنفلونزا.
- ألم أثناء التبول.
- الإحساس بزيادة الضغط عند منطقة الحوض أو المهبل.
- تقلصات أو تشنجات بتشبه ألم الدورة.
هي دي الأعراض العامة، طبعًا أكيد ما ينفعش تستني كلها تحصل لك ولا تنكري أي عرض واحد منهم وتقولي إنه بسيط وهيعدي أو تستنيهم كلهم يحصلوا معاكي، أول ما تظهر منها أي حاجة اتصلي بطبيبك وروحي المستشفى، هناك بعد الكشف النسائي هيحددوا إذا كان عنق الرحم اتفتح ولا لأ، لأنه في حالة إنه اتفتح فانتي دخلتي فعليًا في ولادة. ولو ما اتفتحش، هم هياخدوا معاكي الإجراء الطبي اللي يناسب حالتك.
عمومًا معرفتك بالمعلومات بتجنبك خطر القلق في لحظة وقوع أي موقف، وبيساعدك تتصرفي الصح وتخلي الموقف يعدي بسلام.
ولو عايزة تعرفي معلومات أكتر المقالات دي هتساعدك كتير:
أهم خطوات للتعامل مع الولادة المفاجئة والاسعافات الأولية لها
تجهيزات الولادة: إزاي ارتب بيتي قبل الولادة؟
لستة تحضير شنطة الولادة في فصل الشتاء
9 نصائح لتفادي الأنيميا أثناء الحمل
كل أسباب النزيف المهبلي أثناء الحمل في مراحله المختلفة
راحة بالي هي منصة لراحة كل أم، انضمي لأكبر وأهم مجتمع دعم للأمهات في مصر هنا. وفري احتياجاتك ومصاريفك اليومية من خلال كارت خصومات راحة بالي هنا. اخسري وزن الحمل والرضاعة وكلي أكل صحي في برنامج رياضي ونظام غذائي متفصل على احتياجاتك هنا.
التعليق باستخدام حساب فيس بوك