محتويات المقال
تكيس المبايض أو “متلازمة تكيسات المبايض” باسمها الطبي هي حالة هرمونية بتصيب بعض الستات في سن الإنجاب (يعني السن اللي يقدروا فيه يحملوا ويخلفوا) والحالة دي بتؤثر على قدرة الست على الحمل، وكمان بتؤثر على الدورة الشهرية وشعر الجسم. في المفال ده، هنفهمك ما هو تكيس المبيضين ؟، أعراض تكيسات المبايض وطرق علاج تكيس المبايض بالتفصيل وكيفية تأثيرها على الحمل.
إيه هو تكيس المبايض أو أسبابه؟
كل جسم ست بيكون فيه نسبة من الهرمونات الذكرية زي ما كل جسم راجل بيكون فيه نسبة هرمونات أنثوية. المشكلة في تكيس المبيضين بتكون عدم إتزان في نسب الهرمونات والهرمون الذكري (الأندروجين) بيكون أعلى من المستوى المحبب، والهرمون الأنثوي (بروجيستيرون) ما بتكونش نسبته كافية في الجسم.
أعراض تكيس المبايض
لإن الهرمونات بتختل فأعراضه بيكون معظمها له علاقة بخلل الهرمونات، وأعراض تكيسات المبايض ما بتختلفش من إذا كانت المريضة بنت أو ست.
- عدم انتظام الدورة الشهرية (انقطاع لشهور أو عدم انتظامها في نفس الميعاد كل شهر أو طولها زيادة عن الوقت المعتاد).
- تساقط الشعر بغزارة.
- زيادة في شعر الجسم وشعر الوش.
- حبوب كتير في الوش.
- تغيرات في المود.
- وجع في منطقة الحوض.
- زيادة الوزن.
لو والدتك أو أختك أو ست من العايلة من الدرجة التانية مصابة بتكيس المبايض، ده بيعرضك للإصابة بنسبة أكبر.
طبب هل معنى ده إن انتظام الدورة دليل على عدم وجود تكيس؟ صعب جدًا يكون فيه تكيس بالمبيضين وتكون الدورة الشهرية منتظمة وعشان كده، اتطمني، لو الدورة الشهرية منتظمة، يبقى مفيش تكيسات.
ممكن تشوفي هنا … هل ممارسة العلاقة الحميمة بعد الدورة الشهرية ممكن يسبب حمل؟
إزاي أعرف لو عندي تكيسات المبايض؟
دكتور النسا غالبًا هيطلب يفحص منطقة الحوض بالسونار مع تحاليل دم عشان يعرف نسب الهرمونات في الجسم ونسبة السكر في الدم (لأن الأنسولين هو هرمون وبيتأثر بتغير الهرمونات) والكوليستيرول.
مضاعفات تكيسات المبايض
في حالة ما اتعالجش تكيس المبيضين في المراحل الأولى، ممكن يعرضك لمخاطر أكبر زي:
- عدم الإنجاب.
- مرض السكر من النوع التاني.
- مرض ارتفاع ضغط الدم.
- الإجهاض في حالة الحمل.
- الاكتئاب أو التوتر.
- سرطان في بطانة الرحم.
علاج تكيس المبايض
- العلاج بيختلف على حسب عوامل زي السن ومدى شدة الأعراض والوزن والرغبة في الحمل.
- لو وزنك زايد، غالبًا أول خطوة هتكون إنقاص الوزن حتى ولو بنسبة بسيطة لأن ده هيساعد في تخفيف الآلام وفي سرعة استجابة جسمك للدوا وفي الخصوبة.
- ممكن دكتور النسا يوصف لك علاج معين للسكر (حتى لو مش عندك) عشان يقلل مقاومة الأنسولين وينظم التبويض فيقلل الوزن.
أما لو انتي مش بتخططي للحمل أو لسه ما اتجوزتيش، فممكن الدكتور يوصف لك دوا منع حمل هرموني زي حبوب منع الحمل أو اللاصقة المانعة الأدوية دي هتقلل خطر المضاعفات وتساعد في انتظام دورتك الشهرية وتقلل الحبوب وشعر الجسم والوش. أما إذا كنتي عايزة تحملي، فممكن يوصف لك دا زيادة الخصوبة عشان يساعد المبايض إنها تنتج بويضات.
التعليق باستخدام حساب فيس بوك