في الفترة الأخيرة بقى في كلام كتير عن الاضطرابات النفسية اللي بتحصل للأطفال ومن أهمها مرض التوحد، اللي هو حاجة مش سهلة أبدًا سواء في التعامل مع المريض أو أسرته أو حتى الدكتور المعالج، عشان صورها بتتعدد ودرجاتها بتختلف، وممكن نلخص مفهوم التوحد:
شكل من أشكال الاضطراب النفسي اللي بيبان على الطفل، وبيأثر عليه سلوكيًا واجتماعيًا ولغويًا، وبيبان قبل سن 3 سنين.
ودلوقتي هنستعرض أهم الصفات اللي ممكن تبان على الطفل وتبقى مؤشر إن الطفل ممكن يكون مصاب بدرجة من درجات التوحد، بس لازم نأكد إن الصفات دي مش مؤشر إن الطفل عنده توحد، لا، هي علامة تحذير لازم تخلي الأهل يروحوا لمختص قادر على إنه يفصل بين حقيقة الإصابة من عدمها لأن في أعراض للتوحد شبه أعراض اضطرابات تانية زي اضطراب فرط الحركة وتشتت الانتباه مثلا.
مع الملاحظة بردو إن في صفات مش بيكون سببها التوحد لكن سببها حاجة غلط في نفسية الطفل نمط سلوكي أو غذائي أو أسري غلط.
ابني ما عندوش أصحاب .. إزاي يبقى شخص اجتماعي؟
صفات الطفل المتوحد:
- الحركة المبالغ فيها بالإيدين (زي الرفرفة) والقفز الكتير.
- غير محب للتعامل مع الآخرين (مش إجتماعي- بيخاف من الناس).
- رد فعله تجاه الحاجات اللي فيها خطر تكاد تكون منعدمة ( زي: رغم أنه عارف أن النار بتحرق إلا أنه بيمد إيده ليها متعمد).
- مرتبط بالحاجات الغريبة (مرتبط بلعبة معينة بشكل مرضي، مرتبط بورقة، مرتبط بملاية أو غطا سرير).
- تكرار الكلام من غير فهم للمعنى (أو تكرار الكلام بشكل عام. زي: عايز أشرب..أشرب..عايز أشرب).
- غير مستجيب للنداء.
- رافض للتواصل البصري مع الآخرين (مش بيبص في عينيك أثناء الكلام، حتى لما تطلبي منه ده بيبص لثواني بعدين يشرد تاني).
- محب للعب لوحده.
- غضبه شديد، وبشكل غير مبرر.
- بيتمسك بروتين حياته بشكل بيخليه رافض لأي تغيير.
- بيعيد تركيب الألعاب بشكل مستمر ونمطي.
- نشاط مفرط ورفض للراحة.
- خوف شديد من الأصوات العالية وخوف من التوبيخ (ممكن يحط إيده على ودنه عشان ما يسمعش).
وبرغم استعراضنا لبعض صفات الطفل المصاب بالتوحد، بنكرر إن في درجة من الأعراض دي مش بتشكل أي خطر وهي أعراض مؤقتة مرتبطة بحاجة ما، بس لو حسيتي بالقلق أو الصفات دي اتكررت ممكن تروحي لمختص على طول عشان التعامل المبكر مع أنواع الاضطرابات دي بيفرق جدًا في الاحتواء والتعامل والاستفادة من المريض.
تمنياتنا لكل أطفال العالم بالعافية والصحة.
المصادر:
التعليق باستخدام حساب فيس بوك