بالصور: أفكار مبتكرة علشان ما ترميش الجينز القديم

ساعات كتير بيبقى فيه حاجات عزيزة على قلبنا بس قدمت ومش حابين إننا نستغنى عنها زي الجينز القديم، الجينز القديم ممكن يتعمل بيه أعمال يدوية سهلة وحاجات كتير لو عندك وقت فاضي وممكن كمان تعملي activity لطيف مع ولادك وتعرفيهم إزاي يستغلوا الجينز القديم عن طريق إعادة التدوير الأشياء والاستفاده منها، في الموضوع ده هنقولك على شوية أفكار لطيفة وسهلة تعمليها فى البيت بتكاليف قليلة تستغلي بيها الجينز القديم.

 

حولي الجينز القديم لشورت

أسهل وأسرع حاجة تعمليها للجينز القديم إنك تقصيه على هيئة شورت، هتجيبي مقص وتعلمي على المكان اللي هتقصي منه في الناحيتين عشان يكونوا متساويين.

 

 

زيني البنطلون الجينز

لو حاسة إن ستايل وشكل الجينز قدم، ممكن تجيبي patch على هيئة ورد أو أى شكل يعجبك بتحطيه عن طريق إنك تكويها أو تطرزيها، هتلاقي أشكال كتير جدًا في محلات بيع مستلزمات الخياطة زي النمرسي وفتلة وإبرة.

 

 

مريلة مطبخ صغيرة لطفلك

لو بتحبي الخياطة ممكن تقصي الجينز على شكل مريلة للمطبخ و بنتك هتتبسط بيها جدًا وهي بتلعب لعب الطبخ وممكن كمان إبنك يلبسها كـapron وقت التلوين عشان لبسه ميتبقعش الوان.

 

 

شوفي هنا .. ازاي تلعبي مع طفلك حرب الألوان بطريقة صحية وآمنة

 

ديكور على الحيطة

هتقطعي البنطلون وتلزقيه على لوح خشب ليه سمك البرواز أو اللوح بس تكوني فرداه كويس على اللوح زي الصورة كده وتكتبي أو ترسمي عليه.

 

 

إعادة تدوير الجينز كمنظم

ممكن تجيبي علب صفيح قديمة زي علب اللبن الصناعي وتغسليها كويس وتلفي قماش الجينز عليها وتلزقيه.. ممكن تلوني عليه أو تعملي ورد صغير كروشيه كديكور وتستخمي العلب دي فى تنظيم ألوان ولادك أو توك الشعر.

 

 

شنطة صغيرة

ممكن تعملي شنطة صغيرة سهلة جدًا إنها تتعمل، ممكن تقفليها بسوستة أو بزرار صغير وتستخدميها عشان تحطي فيها الميك أب جوه شنطتك وممكن تحطي فيها كريمات البيبي في شنطة الحفاضات.

 

 

ديكور لإوضة نوم طفلك

ممكن تجيبي حروف خشب أو فوم جاهزة من المكتبة وتلزقي عليها القماش الجينز وتعلقيها إسم إبنك على باب الأوضة أو على الحيطة.

 

جوانتي للفرن

ممكن تقصي الجينز وتقفليه زي شكل جوانتي الفرن وأهم حاجة تبطنيه من جوه عشان قماش الجينز لوحده مش كفاية إنه يحمي إيدك من درجة الحرارة العالية.

 

 

قوليلنا رأيك في أفكار إعادة تدوير الجينز القديم وإيه أكتر فكرة عجبتك

 

هل عندك تعليق على المقال ده؟ شاركينا هنا

Leave a Comment Cancel Reply

التعليق باستخدام حساب فيس بوك